ഞാന് നിങ്ങളെ ഉപദ്രപിക്കാന് വന്നതല്ല... രഹന ഫാത്തിമയെ പോലീസ് അകമ്പടിയോടെ സന്നിധാനം വരെയെത്തിച്ച ഐജി ശ്രീജിത്ത് അയ്യപ്പന്റെ മുമ്പില് പൊട്ടിക്കരഞ്ഞു; ശ്രീജിത്തിനെതിരെ പ്രതിഷേധം കത്തുമ്പോള് നിയമം നടപ്പിലാക്കുന്ന യഥാര്ത്ഥ ഭക്തന്റെ മനസ് ഇതല്ലേ...
ശബരിമലയില് രഹന ഫാത്തിമയേയും കവിതയേയും കയറ്റിയതിന്റെ പേരില് ഏറെ പേരുദോഷം കേട്ടയാളാണ് ഐജി ശ്രീജിത്ത്. അന്ന് ഭക്തരെ ശാന്തരാക്കാന് പടച്ചട്ട ഊരി വച്ച് പറഞ്ഞ ആ വാക്ക് ഇപ്പോഴും കാതുകളില് മുഴങ്ങുന്നു. ഞാന് നിങ്ങളെ ഉപദ്രപിക്കാന് വന്നതല്ല... ഞാന് എന്റെ ഡ്യൂട്ടി ചെയ്യുന്നു.
ശബരിമലയിലെ സ്ത്രീപ്രവേശനം സംബന്ധിച്ച സുപ്രീം കോടതി വിധിക്കെതിരെ ഒരുവശത്ത് പ്രതിഷേധം വ്യാപകമാകവെ മല ചവിട്ടാനെത്തിയ യുവതികള്ക്ക് സുരക്ഷ ഒരുക്കുന്ന ചുമതല ഐ.ജി: എസ്.ശ്രീജിത്തിനായിരുന്നു. മാസപൂജയ്ക്കായി ശബരിമല നട തുറന്നതു മുതല് പമ്പയിലും സന്നിധാനത്തുമായി നിലകൊണ്ട ശ്രീജിത്തിന്റെ നേതൃത്വത്തിലായിരുന്നു സ്ത്രീകള് സന്നിധാനം വരെ എത്തിയത്.
സ്ത്രീകള് ശബരിമലയില് പ്രവേശിക്കുന്നതില് എതിര്പ്പുമായി നിന്ന ഭക്തരുടെ പ്രതിഷേധം സംഘര്ഷത്തിലേക്കും ക്രമസമാധാന പ്രശ്നത്തിലേക്കും വഴിമാറാതെ നോക്കിയതില് ശ്രീജിത്തിന്റേയും സംഘത്തിന്റേയും അവസരോചിതമായ ഇടപെടലും ഉണ്ടായിരുന്നു. ഇപ്പോള് ശ്രീജിത്ത് സാധാരണ ഭക്തനെ പോലെ ശബരിമലയില് നിറഞ്ഞൊഴുകുന്ന മിഴികളോടെ അയ്യപ്പനെ ദര്ശിക്കുന്ന ചിത്രം വൈറലാവുകയാണ്. ഇന്ന് പുലര്ച്ചെയാണ് ശ്രീജിത്ത് ശബരിമലയില് ദര്ശനം നടത്തിയത്. കൈകള് കൂപ്പി ഭക്തര്ക്കിടയില് നിന്ന് മനമുരുകി പ്രാര്ത്ഥിക്കുന്ന ശ്രീജിത്തിന്റെ കണ്ണുകള് നിറഞ്ഞൊഴുകുന്നത് കാണാം.
ചുംബന സമരത്തിലൂടെ ശ്രദ്ധേയയായ വിമന് ആക്ടിവിസ്റ്റ് രഹ്നാ ഫാത്തിമയും ഹൈദരാബാദില് നിന്നുള്ള മോജോ ടി.വി റിപ്പോര്ട്ടര് കവിതാ കോശിയും ശനിയാഴ്ച ശബരിമലയില് ദര്ശനത്തിനായി എത്തിയിരുന്നു. ശ്രീജിത്തിന്റെ നേതൃത്വത്തിലുള്ള സംഘമാണ് യുവതികളെ ശബരിമല നടയുടെ പതിനെട്ടാംപടിക്ക് ഇരുനൂറ് മീറ്റര് അകലെ നടപ്പന്തലില് എത്തിച്ചത്. എന്നാല് ഭക്തരുടെ പ്രതിഷേധത്തെ തുടര്ന്ന് അവര് മടങ്ങിപ്പോയിരുന്നു. നടപ്പന്തലിലെ പ്രതിഷേധക്കാരോട് ഐ.ജി സംസാരിച്ചത് വിശ്വാസികളുടെ ഭാഷയിലായിരുന്നു. തന്റെ സുരക്ഷാകവചവും ഹെല്മറ്റും അഴിച്ചുവച്ച ശേഷമായിരുന്നു ഇത്.
മറ്റ് വിശ്വാസകളെ പോലെ ഞാനും ഭക്തനാണ്. എന്നാല്, സുപ്രീം കോടതി ഉത്തരവ് പ്രകാരം നിയമം നടപ്പാക്കേണ്ട സാഹചര്യമുണ്ട് . നിങ്ങളുടെ വിശ്വാസം മാത്രമല്ല സംരക്ഷിക്കേണ്ടതെന്നും ഐ.ജി പ്രതിഷേധക്കാരോട് വ്യക്തമാക്കുകയായിരുന്നു. നിയമം നടപ്പാക്കേണ്ട ബാദ്ധ്യതയുള്ളതിനാലാണ് താന് അവര്ക്ക് സുരക്ഷ ഒരുക്കിയതെന്നും ഐ.ജി പറഞ്ഞു. ഐ.ജിയുടെ ഈ വാക്കുകളെ സമചിത്തതയോടെയാണ് ഭക്തര് കേട്ടുനിന്നത്. പിന്നീട് പ്രതിഷേധം ശക്തമായതോടെ യുവതികള് ദര്ശനം നടത്താതെ മടങ്ങുകയായിരുന്നു.
https://www.facebook.com/Malayalivartha
