അപകടങ്ങളില് പരിക്കേല്ക്കുന്നവര്ക്ക് ഇനി ചികിത്സ നിഷേധിക്കാനാവില്ല... ചെലവ് സര്ക്കാര് വഹിക്കും
അപകടങ്ങളില് പരിക്കേല്ക്കുന്നവര്ക്ക് ഇനി ചികിത്സ നിഷേധിക്കാനാവില്ല. കേസുകള് ഭയന്നും ചെലവ് വഹിക്കാന് മടിച്ചും മിക്കവാറും പരിക്കേല്ക്കുന്നവര്ക്ക് ചികിത്സ കിട്ടാറില്ല. എന്നാല് ഇനി അങ്ങനെയുള്ളവരുടെ ചെലവ് സര്ക്കാര് വഹിക്കും. ഇതിനായി സര്ക്കാര് പ്രത്യേക ചികിത്സസഹായ പദ്ധതിക്ക് തുടക്കം കുറിക്കണമെന്ന് ജസ്റ്റിസ് കെ.ടി. തോമസ് അധ്യക്ഷനായ നിയമപരിഷ്കാര കമീഷന് തയാറാക്കിയ കരട് ബില് നിര്ദേശിക്കുന്നു.
കഴിഞ്ഞവര്ഷം കൊല്ലം ചാത്തന്നൂരില് അപകടത്തില്പെട്ട തമിഴ്നാട് സ്വദേശി മുരുകന് ചികിത്സ കിട്ടാതെ മരിച്ച സംഭവത്തെത്തുടര്ന്നാണ് നിയമനിര്മാണത്തിന്റെ സാധ്യത കമീഷന് പരിശോധിച്ചത്. നിയമം പ്രാബല്യത്തില്വന്നാല് ഒരുമാസത്തിനകം സര്ക്കാര് പ്രത്യേക അത്യാഹിത ചികിത്സസഹായ പദ്ധതിക്ക് തുടക്കംകുറിക്കണമെന്ന് ബില് നിഷ്കര്ഷിക്കുന്നു. ആശുപത്രികള്ക്കും ആംബുലന്സിനും ചെലവായ തുക ചികിത്സസഹായ പദ്ധതി വഴി നല്കണമെന്നും കരട് ബില് നിര്ദേശിക്കുന്നു. ഇതോടെ അത്യാഹിത ചികിത്സ ആശുപത്രികളുടെ മാത്രമല്ല സര്ക്കാറിന്റെ കൂടി ഉത്തരവാദിത്തമാകും.
അടിയന്തരചികിത്സ നല്കാന് സൗകര്യമില്ലാത്ത സാഹചര്യത്തില് രോഗിയെ മറ്റൊരിടത്തേക്ക് ചികിത്സക്കോ പരിശോധനക്കോ അയക്കുന്നത് അതതിടത്തെ ഡോക്ടറുടെ ചുമതലയായിരിക്കും. മറ്റേതെങ്കിലും ആശുപത്രികളിലേക്ക് രോഗിയെ അയക്കുന്നതിന് മതിയായ കാരണവും രോഗിയുടെ സമ്മതപത്രവും വാങ്ങണം. മറ്റ് ആശുപത്രികളിലേക്ക് അയക്കുന്നതിനെ രോഗി എതിര്ത്താല് അക്കാര്യം രോഗിയില്നിന്ന് എഴുതിവാങ്ങണം. അത്യാഹിത വിഭാഗത്തിലെത്തിച്ച രോഗിക്കും ഗര്ഭിണിയാണെങ്കില് അവര്ക്കും ഗര്ഭസ്ഥ ശിശുവിനും അപകടമില്ലെന്ന് ഉറപ്പാക്കിവേണം മറ്റ് ആശുപത്രികളിലേക്ക് മാറ്റാന്. ജീവന് നിലനിര്ത്താന് തങ്ങളാല് കഴിയുന്നത് ചെയ്തുവെന്ന് ഉറപ്പുവരുത്തിയായിരിക്കണം ആശുപത്രിമാറ്റം. പരിശോധന, നല്കിയ ചികിത്സ തുടങ്ങി എല്ലാ രേഖകളും പ്രത്യേക റിപ്പോര്ട്ടും സഹിതമാകണം രോഗിയെ കൊണ്ടുപോകേണ്ടത്
ആശുപത്രിക്ക് സ്വന്തം ആംബുലന്സ് ഇല്ലെങ്കില് സ്വകാര്യ ആംബുലന്സുകളുടെയോ ഏജന്സികളുടെയോ പൊലീസിന്റെയോ സഹായം തേടാം. ആംബുലന്സുകള്ക്കും വിസ്സമ്മതം പറയാനാവില്ല. അത്യാഹിത ചികിത്സക്കായി ആശുപത്രികള് പ്രത്യേക രജിസ്റ്റര് സൂക്ഷിക്കണം. നല്കിയ ചികിത്സ, പരിശോധന, ഈടാക്കിയ ഫീസ് തുടങ്ങിയ എല്ലാ വിവരങ്ങളും ഈ രജിസ്റ്ററില് ഉണ്ടാകണമെന്നും ബില് നിഷ്കര്ഷിക്കുന്നുണ്ട്.
https://www.facebook.com/Malayalivartha
