ശബരിമലയില്‍ യുവതികളെ പ്രവേശിപ്പിക്കണമെന്ന സുപ്രീംകോടതി വിധി പു:നപ്പരിശോധിക്കണമെന്ന് ആവശ്യപ്പെട്ട് അയ്യപ്പസേവാസംഘം ഉള്‍പ്പെടെ നല്‍കിയ 19 ഹര്‍ജികള്‍ എന്ന് പരിഗണിക്കുമെന്ന് നാളെ തീരുമാനിക്കും. ചീഫ് ജസ്റ്റിസ് രഞ്ജന്‍ഗോഗോയ് അധ്യക്ഷനായ ബെഞ്ചാണ് ഇക്കാര്യം തീരുമാനിക്കുന്നത്. കോടതി വിധിക്കെതിരെ ഭക്തരുടെ നേതൃത്വത്തില്‍ വിവിധ സംഘടനകള്‍ സന്നിധാനത്തും പമ്പയിലും നിലയ്ക്കലിലും ഉള്‍പ്പെടെ കോട്ടയം, പത്തനംതിട്ട ജില്ലകളില്‍ പ്രതിഷേധം ശക്തമാക്കിയിരിക്കുകയാണ്. ഇന്ന് ശബരിമല നട അടയ്ക്കുന്നതോടെ പ്രശ്‌നങ്ങള്‍ക്ക് താല്‍ക്കാലിക ആശ്വാസമാകും. എന്നാല്‍ അടുത്തമാസം 15ന് മണ്ഡലകാലത്തിനായി നട തുറക്കുമ്പോള്‍ പ്രശ്‌നം വീണ്ടും ഗുരുതരമാകാനാണ് സാധ്യത.

സാധാരണഗതിയില്‍ റിവ്യൂ ഹര്‍ജികളൊന്നും നിലനില്‍ക്കില്ലെന്നാണ് സുപ്രീംകോടതി, ഹൈക്കോടതി അഭിഭാഷകനായ കാളീശ്വരം രാജ് പറയുന്നത്. കോടതി ചട്ടങ്ങളിലെ 47ാം വകുപ്പനുസരിച്ചും സിവില്‍ നടപടിക്രമങ്ങളിലെ 47ാം ഓര്‍ഡര്‍ അനുസരിച്ചും റിവ്യൂ അധികാരം അപൂര്‍വമായി ഉപയോഗിക്കുന്ന ഒന്നാണ്. വിധിയില്‍ പ്രകടമായ പിഴവുണ്ടെങ്കില്‍ അത് തിരുത്താന്‍ മാത്രമേ റിവ്യൂഹര്‍ജികൊണ്ട് സാധിക്കൂ. വിഷയത്തിന്റെ എല്ലാവശങ്ങളും പരിശോഘിച്ച ശേഷം പറഞ്ഞ വിധി റിവ്യൂ ഹര്‍ജികളുടെ അടിസ്ഥാനത്തില്‍ മാറ്റിയെഴുതാനുള്ള സാധ്യതയും കുറവാണ്. വിധി പുനപ്പരിശോധിക്കപ്പെടാത്തിടത്തോളം കാലം ഓര്‍ഡിനന്‍സിലൂടെയും നിയമനിര്‍മാണത്തിലൂടെയും ഭരണഘടനാ ബെഞ്ചിന്റെ വിധി നിര്‍വീര്യമാക്കുന്ന നിയമം നിര്‍മിക്കാന്‍ ആര്‍ക്കാണ് അധികാരം എന്ന ചോദ്യം തന്നെ തെറ്റാണെന്നും കാളിശ്വരം രാജ് മാതൃഭൂമിയിലെഴുതിയ ലേഖനത്തില്‍ പറയുന്നു.