ഇടതുപക്ഷ അനുഭാവമുള്ള വിവിധ സംഘടനകളില്‍പെട്ടു അയ്യായിരത്തോളം യുവതികള്‍ ഒരുമിച്ച് ശബരിമലയിലെത്താന്‍ നീക്കം. ഇതു സംബന്ധിച്ച മെസേജുകള്‍ സോഷ്യല്‍ മീഡിയയില്‍ രഹസ്യമായി പരക്കുന്നു. വാട്‌സ് ആപ് ഗ്രൂപ്പുകളില്‍ താത്പര്യമുള്ളവര്‍ ഒത്തുചേരണമെന്ന ആഹ്വാനവും.

മണ്ഡലകാലത്ത് യുവതികള്‍ ഒത്തൊരുമിച്ചെത്തി പ്രതിഷേധത്തിന്റെ മുനയൊടിക്കുകയാണ് ലക്ഷ്യം. എന്നാല്‍ അയ്യായിരം യുവതികള്‍ ഒരുമിച്ചു നീങ്ങണോ അതോ വിവിധ ഗ്രൂപ്പുകളായി തിരിഞ്ഞ് മലകയറണോ എന്ന ആലോചനയും തകൃതിയായി നടക്കുന്നു. ഇത്തരമൊരു നീക്കമുണ്ടായാല്‍ സര്‍ക്കാരില്‍ നിന്ന് പൂര്‍ണ്ണ പരിരക്ഷ കിട്ടുമെന്ന് അവരുറപ്പിച്ചു പറയുന്നു.

നവംബര്‍ 16 ന് സുപ്രീംകോടതി യുവതീപ്രവേശനവുമായി ബന്ധപ്പെട്ട് എന്തുപറയും എന്നതിനെ അടിസ്ഥാനമാക്കിയായിരിക്കും മുന്നോട്ടുള്ള നീക്കങ്ങള്‍. ശബരിമല വിഷയം രാഷ്ട്രീയമായി കൈകാര്യം ചെയ്യുക എന്ന നിലപാടും ഇത്തരം നീക്കങ്ങള്‍ക്കു ശക്തി പകരും. ബഹുജനാടിത്തറയുള്ള സി.പി.എം പോലുള്ള പാര്‍ട്ടി ഒറ്റതിരിഞ്ഞ ബി.ജെ.പി, ആര്‍.എസ്.എസ് ആക്രമങ്ങളെ ഭയപ്പെടേണ്ടതില്ല എന്ന സന്ദേശം ബൂത്തുതലത്തില്‍ വരെ പാര്‍ട്ടി എത്തിച്ചുകഴിഞ്ഞു. പിണറായി വിജയന്റെ ഉറച്ച നിലപാടും, പാര്‍ട്ടിയില്‍ ഭിന്നാഭിപ്രായം പരസ്യമായി ഉയര്‍ന്നുവരാത്തതും ഒരു പോരിന് കളമൊരുക്കിയിരിക്കുന്നു. ശബരിമല ആക്രമണവുമായി ബന്ധപ്പെട്ട കേസുകള്‍ ശക്തമാക്കി ബി.ജെ.പി. യുടെ ആക്രമണ നിരയിലുള്ളവരുടെ മനോബലം കുറയ്ക്കാമെന്നും സര്‍ക്കാര്‍ കണക്കുകൂട്ടുന്നു.

ബി.ജെ.പി സംഘപരിവാര്‍ അജണ്ട എന്ന നിലയില്‍ മാത്രം പ്രശ്‌നങ്ങളെ സമീപിച്ചാല്‍ മതി. മറിച്ച് വിശ്വാസികളുടെ പ്രശ്‌നമായി എടുക്കേണ്ടതില്ല എന്നതാണ് മുഖ്യമന്ത്രിയുടെ നിലപാട്.
എതിര്‍പ്പുകളെ രാഷ്ട്രീയമായി തച്ചുടയ്ക്കുക എന്നും സി.പി.എം നയമായിരുന്നു. അതുതന്നെയാണ് ശബരിമല വിഷയത്തിലും പാര്‍ട്ടി സ്വീകരിക്കുക.