അയ്യപ്പഭക്തര്‍ ഒരുപൊലീസ് നടപടിയെയും ഭയപ്പെടുന്നില്ലെന്ന് കെ.സുരേന്ദ്രന്‍. തന്റെ ഫേസ്ബുക് പോസ്റ്റിലൂടെയായിരുന്നു സുരേന്ദ്രന്റെ പ്രതികരണം. 'ഒരു പൊലീസ് നടപടിയേയും അയ്യപ്പഭക്തര്‍ ഭയപ്പെടുന്നില്ല. നട്ടെല്ലുനിവര്‍ത്തി നെഞ്ചുവിരിച്ച്‌ ശരണമന്ത്രങ്ങളോടെ നേരിടും. തല കുനിക്കുമെങ്കില്‍ അത് കലിയുഗവരദനായ സാക്ഷാല്‍ അയ്യപ്പസ്വാമിയുടെ മുമ്ബില്‍ മാത്രം.' എന്ന് സുരേന്ദ്രൻ ഫേസ്ബുക്കിൽ കുറിച്ചു.

അതേസമയം ശബരിമലയിൽ സ്ത്രീപ്രവേശനം അനുവദിച്ചുകൊണ്ട് സുപ്രീം നടത്തിയ നിര്‍ണ്ണായക കോടതി വിധി നടപ്പാക്കുന്നതിനെതിരെ നടന്ന സംഘർഷങ്ങളിൽ സംസ്ഥാനത്താകെ ഇതുവരെ 1,407 പേർ അറസ്റ്റിലായി. ശബരിമല സംഘർഷവുമായി ബന്ധപ്പെട്ട് ഇതുവരെ 258 കേസുകളും രജിസ്റ്റർ ചെയ്തതായി പൊലീസ് അറിയിച്ചു.

ശബരിമലയിൽ അക്രമം നടത്തിയവരെന്ന് പൊലീസ് തിരിച്ചറിഞ്ഞ 210 പേരുടെ ചിത്രങ്ങളടങ്ങിയ ലുക്ക് ഔട്ട് നോട്ടീസ് ഇന്നലെ പൊലീസ് പുറത്തുവിട്ടിരുന്നു. ഇതിൽ 160 പേരെ പൊലീസ് തിരിച്ചറിഞ്ഞിട്ടുണ്ട്. അവരില്‍ പലരും അറസ്റ്റിലായി. ഈ പട്ടികയിൽ ഉൾപ്പെട്ടവരും അല്ലാത്തവരുമായ 157 പേരെ പൊലീസ് അറസ്റ്റ് ചെയ്തു. ശബരിമലയില്‍ മണ്ഡലകാലത്ത് തീര്‍ത്ഥാടകര്‍ക്ക് നിയന്ത്രണമേര്‍പ്പെടുത്തുമെന്നും 24 മണിക്കൂറില്‍ കൂടുതല്‍ ആരെയും തങ്ങാന്‍ അനുവദിക്കില്ലെന്നും പൊലീസ് ഉന്നതതലയോഗത്തില്‍ തീരുമാനമെടുത്തിരുന്നു. ഇതിന് പുറമേ തുലാമാസ പൂജയ്ക്കായി നട തുറന്നപ്പോള്‍ അക്രമം കാട്ടിയവര്‍ക്കെതിരെ കര്‍ശന നടപടി എടുത്തുവരികയുമാണ്.