ഒരു വേള പോലീസ് രാജില്‍ വിരണ്ടുപോയ അയ്യപ്പഭക്തര്‍ക്ക് തുണയായി അമിത് ഷായുടെ യുദ്ധകാഹളം. രണ്ടായിരത്തി അഞ്ഞൂറിലധികം പ്രവര്‍ത്തകര്‍ ജയിലറക്കുള്ളില്‍ ആകുമോ എന്നു ബി.ജെ.പി ഭയന്ന വേളയില്‍, ഇന്നലെ കോടതി കരുത്തായി. കോടതിയുടെ ഇടപെടലില്‍ ഭയപ്പെട്ടുപോയ ഡി.ജി.പി ഇന്നു പോലീസിന്റെ നടപടികള്‍ ദുര്‍ബലമാക്കിയിരുന്നു.

നാമജപയാത്ര നടത്തിയ സ്ത്രീകളെ അറസ്റ്റു ചെയ്യാനുറച്ച സര്‍ക്കാര്‍ പിന്നോട്ടു മാറി. കളി കൈവിട്ടുപോകുമെന്ന സൂചന കോടതിയും ഒപ്പം പോലീസ് തലപ്പത്തുള്ളവരും നല്‍കി. തുടര്‍ന്ന് അടിയന്തിരമായി ഇത്തരം അറസ്റ്റുമായി മുന്നോട്ടു പോകണ്ട എന്ന നിലപാടിലേക്ക് സര്‍ക്കാര്‍ മാറി.

തൊട്ടുപുറകേ കണ്ണൂരിന്റെ നെഞ്ചിലേക്ക് പോര്‍വിളിയുമായി ബി.ജെ.പി അഖിലേന്ത്യാ അധ്യക്ഷന്‍ പറന്നിറങ്ങിയത് വെറുതെയല്ല. നേര്‍ക്കു നേര്‍ പോരിനു വിളിച്ചായിരുന്നു. ബി.ജെ.പി യുടെ ദേശീയ ശക്തി ഉപയോഗിച്ച് സി.പി.എം നെയും സര്‍ക്കാരിനെയും പ്രതിരോധിക്കുമെന്ന് പറയുമ്പോള്‍ അതിന് അര്‍ത്ഥങ്ങള്‍ ഒരുപാടുണ്ട്. സുപ്രീംകോടതി വിധിയെപ്പോലും വിമര്‍ശിച്ച അമിത് ഷാ, തൊടുത്തത് സമാനതകളില്ലാത്ത ആക്രമണ തന്ത്രമാണ്.

ഇന്നലെവരെ സംഘടനയെയും, പോലീസിനെയും, സര്‍ക്കാരിനെയും , ദേവസ്വം ബോര്‍ഡിനെയുമുപയോഗിച്ച് അയ്യപ്പഭക്തരെ ചിതറിക്കാന്‍ മുഖ്യമന്ത്രി നടത്തിയ ശ്രമങ്ങള്‍ ഒരു പരിധിവരെ വിജയിച്ചിരുന്നു. വിശ്വാസികള്‍ എന്ന തലത്തില്‍ നിന്നും ആര്‍.എസ്.എസ്, ബി.ജെ.പി, സംഘപരിവാര്‍ എന്നിങ്ങനെ തരംതിരിച്ചുള്ള ആക്രമണ തന്ത്രമായിരുന്നു മുഖ്യമന്ത്രിയുടേത്. ശബരിമല പ്രതിഷേധം വിശ്വാസ സമരത്തില്‍ നിന്നും രാഷ്ട്രീയ സമരമാക്കി ചിത്രീകരിക്കാന്‍ പിണറായി വിജയനു കഴിഞ്ഞിരുന്നു.

ഇതിനിടയില്‍ അമിത് ഷാ, ഇന്നു കൊളുത്തിയ അഗ്നി ആളിക്കത്തുമെന്ന് ഉറപ്പ്. വിശ്വാസി സമൂഹം ഒരു രക്ഷകനെ കിട്ടിയ ആനന്ദത്തിലാണ്. കേന്ദ്ര നേതൃത്വത്തിന്റെ പിന്തുണയില്‍ കൈവിട്ട കളിക്കൊരുങ്ങുകയാണ് ബി.ജെ.പി. സമാനതകളില്ലാത്ത പോര്‍വിളിയും മുന്നറിയിപ്പുമായി അമിത് ഷാ മുന്നില്‍ നേതൃത്വം നല്കുമ്പോള്‍ സംസ്ഥാന നേതാക്കള്‍ തിളച്ചുമറിയുകയാണ്.

അമിത് ഷായുടെ ശരണം വിളി വിശ്വാസികള്‍ക്ക് ആശ്വാസവും, ആവേശവുമാകുന്നു. സര്‍ക്കാരിന് ഇനി തങ്ങളെ അത്രവേഗം അടിച്ചമര്‍ത്താനാകില്ല എന്ന് അവരുറപ്പിക്കുന്നു.

വിശ്വാസി സമരം ഒരിക്കലും ഒരു കലാപമാകരുത് എന്ന് ഏറ്റവുമധികം ആഗ്രഹിക്കുന്നത് സര്‍ക്കാരാണ്. ശബരിമലയില്‍ ഒരു തീപ്പൊരി വീണാല്‍ കേരളം നിശ്ചലമാകുമെന്ന് എല്ലാവര്‍ക്കുമറിയാം. ഒരു സംഘര്‍ഷം തടഞ്ഞുനിര്‍ത്താന്‍ കഴിയില്ല.

ഭക്തജനത്തിരക്കില്‍ ഒഴുകുന്ന പമ്പയും സന്നിധാനവുമൊക്കെ ഒരു ചെറിയ സംഘര്‍ഷത്തെപ്പോലും അതിജീവിക്കുക അത്രയെളുപ്പമല്ല.

ക്രമസമാധാനത്തകര്‍ച്ചയുടെ പേരില്‍ സംസ്ഥാന സര്‍ക്കാരിനെ വലിച്ചു താഴെയിടാന്‍ തക്കം പാര്‍ത്തിരിക്കുന്ന കേന്ദ്രത്തിന് ഇരയാകാതിരിക്കാന്‍ സര്‍ക്കാരും ശ്രദ്ധിക്കും. പാര്‍ലമെന്റ് ഇലക്ഷന്‍ അടുത്തുവരുന്ന വേളയില്‍ ബി.ജെ.പി കൈവിട്ട കളിക്കിറങ്ങും. കേരളത്തില്‍ വേരോടാന്‍ ഇതിലും നല്ലൊരു വിഷയം അവര്‍ക്കുടന്‍ കിട്ടില്ല. നേര്‍ക്കുനേര്‍ പോരിനു വിളിച്ച് യുദ്ധസമാനമായ അന്തരീക്ഷമൊരുക്കുന്നതില്‍ സര്‍ക്കാരിനും, മുഖ്യമന്ത്രിക്കും പാളിച്ച പറ്റി. സമവായത്തിനു പകരം അടിച്ചമര്‍ത്തല്‍ തന്ത്രമാണ് പയറ്റിയത്. അതാണിപ്പോള്‍ വിനയാകുന്നതും.