തുലാവര്‍ഷം ശക്തിപ്രാപിക്കുമെന്ന് കാലാവാസ്ഥാ നിരീക്ഷണകേന്ദ്രത്തിന്റെ മുന്നറിയിപ്പ്. അടുത്ത 24 മണിക്കൂറില്‍ ഏഴു സെ.മീ. മുതല്‍ 11 സെ. മീറ്റര്‍ വരെ മഴയ്ക്കു സാധ്യതയുണ്ട്. ഇന്നും ഏഴിനും ശക്തമായ മഴയ്ക്കും സാധ്യതയുണ്ട്. ലക്ഷദ്വീപിലും കനത്ത മഴ പെയ്യും. അറബിക്കടലിലും ബംഗാള്‍ ഉള്‍ക്കടലിലും രൂപപ്പെട്ട ന്യൂനമര്‍ദം മഴയുടെ ശക്തി കൂട്ടും. മഴയോടൊപ്പം ഇടിമിന്നലിനും സാധ്യതയുണ്ട്. കടല്‍ക്ഷോഭത്തിനു സാധ്യതയുള്ളതിനാല്‍ ആറാം തീയതി മുതല്‍ കേരള, കര്‍ണാടക, ലക്ഷദ്വീപ് തീരങ്ങളില്‍ മത്സ്യത്തൊഴിലാളികള്‍ കടലില്‍ പോകരുതെന്നു നിര്‍ദേശമുണ്ട്.

ഡിസംബര്‍ 15 വരെയെങ്കിലും സംസ്ഥാനത്തു തുലാവര്‍ഷം നീളും. കനത്ത മഴമൂലം തിരുവനന്തപുരം ജില്ലയിലെ ഡാമുകളില്‍ ജലനിരപ്പ് ഉയര്‍ന്നു. ഇതേത്തുടര്‍ന്ന് നെയ്യാര്‍, പേപ്പാറ ഡാമുകളുടെ ഷട്ടറുകള്‍ തുറന്നു. നെയ്യാര്‍ ഡാമിന്റെ നാലുഷട്ടറുകള്‍ ഒരടിവീതമാണ് ഷട്ടര്‍ ഉയര്‍ത്തിയത്. പേപ്പാറയില്‍ ഒരു ഷട്ടര്‍ ഒരടിഉയര്‍ത്തി. സംസ്ഥാനത്ത് ഒക്‌ടോബര്‍ പാതിയോടെ തുലാവര്‍ഷം പെയ്യുകയാണു പതിവ്.

എന്നാല്‍, ഇക്കുറി 15 ദിവസത്തോളം വൈകിയാണ് തുലാവര്‍ഷം എത്തിയത്. ബംഗാള്‍ ഉള്‍ക്കടലില്‍ രൂപംകൊണ്ട ന്യൂനമര്‍ദങ്ങളായിരുന്നു മഴയെത്തുന്നതു വൈകിപ്പിച്ചത്.സംസ്ഥാനത്തു പെയ്യുന്ന ആകെ മഴയുടെ 20 ശതമാനം തുലാവര്‍ഷത്തില്‍നിന്നാണ് ലഭിക്കുന്നത്. ശരാശരി 420 മി.മീറ്റര്‍ മഴയാണ് തുലാവര്‍ഷത്തില്‍ ലഭിക്കുന്നത്. തെക്കുപടിഞ്ഞാറന്‍ മണ്‍സൂണില്‍ ഇക്കുറി 2200 മില്ലിമീറ്റര്‍ മഴ ലഭിച്ചു.


സംസ്ഥാനത്തു തുലാമഴ ശക്തമായതോടെ മലപ്പുറം, കോഴിക്കോട് ജില്ലകളില്‍ യെലോ അലെര്‍ട്ട് പ്രഖ്യാപിച്ചു. ഇന്നലെയും ആറു ജില്ലകളില്‍ യെലോ അലെര്‍ട്ട് പ്രഖ്യാപിച്ചിരുന്നു. തിരുവനന്തപുരം, കൊല്ലം, പത്തനംതിട്ട, ഇടുക്കി, പാലക്കാട്, മലപ്പുറം ജില്ലകളില്‍ ബുധനാഴ്ച യെലോ അലെര്‍ട്ട് പ്രഖ്യാപിച്ചിട്ടുണ്ട്. ബുധനാഴ്ചവരെ സംസ്ഥാനത്ത് ഇടിയോടു കൂടിയ കനത്തമഴ ലഭിക്കുമെന്നാണു കേന്ദ്ര കാലാവസ്ഥാവകുപ്പിന്റെ മുന്നറിയിപ്പ്. തിരുവനന്തപുരത്തു കനത്തമഴയേത്തുടര്‍ന്ന് ഇന്നലെ നെയ്യാര്‍, അരുവിക്കര, പേപ്പാറ അണക്കെട്ടുകള്‍ തുറന്നു. നെയ്യാറിന്റെ ഇരുകരകളിലും താമസിക്കുന്നവര്‍ക്കു ജാഗ്രതാനിര്‍ദേശമുണ്ട്.