മണ്ഡലകാല തീര്‍ഥാടനത്തിനായി ഇന്നു ശബരിമല നട തുറക്കാനിരിക്കേ, തീര്‍ഥാടകര്‍ക്കു പമ്പാ സ്‌നാനവും അന്നദാനവും ശൗചാലയങ്ങളും ഉള്‍പ്പെടെ അടിസ്ഥാനസൗകര്യങ്ങളൊന്നും ഒരുക്കാതെ തിരുവിതാംകൂര്‍ ദേവസ്വം ബോര്‍ഡ്. എരുമേലിയിലും പമ്പയിലും സന്നിധാനത്തും യാതൊരു സൗകര്യങ്ങളും ഏര്‍പ്പെടുത്തിയിട്ടില്ല. പ്രവര്‍ത്തനങ്ങള്‍ ഏകോപിപ്പിക്കാന്‍ വേണ്ടത്ര ഉദ്യോഗസ്ഥരെയും നിയോഗിച്ചിട്ടില്ല.

തീര്‍ഥാടനകാലത്തു നിലയ്ക്കലില്‍ കണ്‍ട്രോളിങ് ഓഫീസ് തുറക്കാറുണ്ടെങ്കിലും ഇക്കുറി അതേക്കുറിച്ച് ആലോചിച്ചിട്ടുപോലുമില്ല. കണ്‍ട്രോളിങ് ഓഫീസ് പ്രവര്‍ത്തിക്കേണ്ട സ്ഥലത്ത് നിലവില്‍ ജില്ലാ കലക്ടറുടെ ദുരിതാശ്വാസ ക്യാമ്പുമായി ബന്ധപ്പെട്ട പ്രവര്‍ത്തനങ്ങളാണു നടക്കുന്നത്. ലക്ഷക്കണക്കിനു തീര്‍ഥാടകരെത്തുന്ന എരുമേലി, നിലയ്ക്കല്‍, പമ്പ എന്നിവിടങ്ങളില്‍ പാര്‍ക്കിങ് സ്ഥലങ്ങളുടെ ലേലം പൂര്‍ത്തിയായില്ല. എരുമേലിയിലെ നാളികേരലേലം സംബന്ധിച്ച തീരുമാനവും എങ്ങുമെത്തിയില്ല. കടകള്‍ പലതും ഏറ്റെടുക്കാന്‍ ആരും മുന്നോട്ടുവന്നിട്ടില്ല. ദേവസ്വം ബോര്‍ഡിന്റെ മുഖ്യവരുമാനമാര്‍ഗങ്ങളാണ് ഇവ. പ്രളയത്തില്‍ ഒലിച്ചുപോയ പമ്പയിലെ ശൗചാലയങ്ങള്‍ പുനര്‍നിര്‍മിച്ചിട്ടില്ല. പമ്പയില്‍നിന്നു ജെ.സി.ബി ഉപയോഗിച്ച് മണ്ണുമാറ്റി, സ്‌നാനസൗകര്യങ്ങള്‍ ഒരുക്കുന്നതേയുള്ളൂ. അന്നദാനമണ്ഡപം സജ്ജമായിട്ടില്ല.

അന്നദാനത്തിനുള്ള അരിയും മറ്റു സാധനങ്ങളും എത്തിച്ചിട്ടില്ല. പ്രളയമെടുത്ത പമ്പയില്‍ വിരിവയ്ക്കാന്‍ യാതൊരു സൗകര്യവുമില്ല. തീര്‍ഥാടകരുടെ ആശ്രയമായിരുന്ന രാമമൂര്‍ത്തി മണ്ഡപവും തകര്‍ന്നുകിടക്കുകയാണ്. സന്നിധാനത്തു വിരിവയ്ക്കാനുള്ള ഷെഡ്ഡുകള്‍ ലേലം ചെയ്തിട്ടില്ല.
മുമ്പ് അയ്യപ്പസേവാസംഘവും അയ്യപ്പസമാജവും ശബരിമലയിലും പമ്പയിലും അന്നദാനംനടത്തിയിരുന്നു. അതിനു തടയിട്ടാണു ബോര്‍ഡ് നേരിട്ട് അന്നദാനം ഏറ്റെടുത്തത്. ഇതിനെതിരേ അയപ്പസേവാസംഘം കോടതിയെ സമീപിച്ചിരുന്നു. എന്നാല്‍ 24 മണിക്കൂറും ഭക്തര്‍ക്കു ഭക്ഷണം നല്‍കാമെന്നു ബോര്‍ഡ് അറിയിക്കുകയായിരുന്നു. അതും ഇപ്പോള്‍ പ്രതിസന്ധിയിലായി.

മുന്‍വര്‍ഷങ്ങളില്‍ ചിത്തിര ആട്ടവിശേഷത്തിനു ശരാശരി 1500 പേര്‍ എത്തിയിരുന്ന സ്ഥാനത്ത് ഇക്കുറി എത്തിയത് 12,000 പേരാണ്. യുവതീപ്രവേശനവിവാദത്തിന്റെ പശ്ചാത്തലത്തില്‍ മണ്ഡലമകരവിളക്കുകാലത്ത് സ്ഥിതി വഷളാകുമെന്ന ഇന്റലിജന്‍സ് റിപ്പോര്‍ട്ടും നിലവിലുണ്ട്.