ശബരിമല ദര്‍ശനശ്രമം പരാജയപ്പെട്ട് തിരിച്ചുപോകേണ്ടി വന്ന ഭൂമാതാ ബ്രിഗേഡര്‍ നേതാവ് തൃപ്തി ദേശായിക്ക് മുംബൈ വിമാനത്താവളത്തിലും നാമജപ പ്രതിഷേധം നേരിടേണ്ടിവന്നു. നെടുമ്പാശ്ശേരിയില്‍ നിന്നും തിരിച്ച് പോകേണ്ടി വന്ന തൃപ്തി ദേശായി മുംബൈയിലെ വിമാനത്താവളത്തില്‍ അര്‍ദ്ധരാത്രിയിലാണ് എത്തിയത്. മണിക്കൂറുകള്‍ കാത്തിരുന്ന ശേഷം ഇവരെ മാധ്യമങ്ങളുടെയും പ്രതിഷേധക്കാരുടെയും കണ്ണു വെട്ടിച്ച് മറ്റൊരു വഴിയിലൂടെ പോലീസ് പുറത്തേക്ക് കൊണ്ടുപോയി. 

വിവിധഹിന്ദു സംഘടനകളാണ് മുംബൈ വിമാനത്താളവത്തിലും പ്രതിഷേധവുമായി എത്തിയത്. ശബരിമലയില്‍ പ്രവേശിക്കാന്‍ വേണ്ടി ഇന്നലെ പുലര്‍ച്ചെ നാലു മണിയോടെ നെടുമ്പാശ്ശേരി വിമാനത്താവളത്തില്‍ ഇറങ്ങിയ തൃപ്തി ദേശായിയെ നാമജപ പ്രതിഷേധവുമായി പുലര്‍ച്ചെ മുതല്‍ എത്തിയവര്‍ തടയുകയായിരുന്നു. പുറത്തിറങ്ങാന്‍ കഴിയാതെ രാത്രി വരെ വിമാനത്താവളത്തില്‍ കാത്തു നിന്ന അവര്‍ അനുരഞ്ജന ചര്‍ച്ചയെ തുടര്‍ന്നാണ് പൂനെയിലേക്ക് മടങ്ങിയത്. 

ശബരിമലയിലേക്ക് പോകാന്‍ തനിക്ക് പോലീസ് സംരക്ഷണവും വാഹനവും താമസ സൗകര്യവും കേരള സര്‍ക്കാര്‍ നല്‍കണമെന്നായിരുന്നു തൃപ്തിയുടെ ആവശ്യം. എന്നാല്‍ എല്ലാ സാധാരണക്കാര്‍ക്കും നല്‍കുന്ന സുരക്ഷ തൃപ്തിക്കും നല്‍കുമെന്നും നിലയ്ക്കല്‍ വരെ സ്വന്തം നിലയ്ക്ക് എത്തിയാല്‍ ശബരിമലയിലേക്ക് സുരക്ഷ നല്‍കാമെന്നും പോലീസ് പറയുകയായിരുന്നു. എന്നാല്‍ തൃപ്തിദേശയായിയെയും ഒപ്പം വന്ന അഞ്ചു പേരെയും നെടുമ്പാശ്ശേരിയില്‍ നിന്നും ഹോട്ടലിലേക്ക് കൊണ്ടുപോകാന്‍ പോലും ഓണ്‍ലൈന്‍, പ്രീ പെയ്ഡ് ടാക്‌സി ഡ്രൈവര്‍മാരാരും തയ്യാറായില്ല. പോലീസ് വാഹനവും പ്രതിഷേധക്കാര്‍ തടയുമെന്നായതോടെയാണ് പോലീസ് ഇവരുമായി സംസാരിച്ച് മടക്കിയയച്ചത്.