സ്‌കൂള്‍ കലോല്‍സവത്തില്‍ മത്സര ദിനങ്ങള്‍ മൂന്നായി കുറച്ചതില്‍ കലോല്‍സവ സംഘാടകര്‍ അപ്പീല്‍ പേടിയിലാണ്. 29 വേദികളിലായി 188 ഇനങ്ങളാണ് പൂര്‍ത്തിയാക്കേണ്ടത്. രാത്രി ഒന്‍പതിനുശേഷം മത്സരങ്ങള്‍ പാടില്ലെന്ന നിര്‍ദേശവുമുണ്ട്. അപ്പീല്‍ പ്രളയം സ്‌കൂള്‍ കലോത്സവങ്ങളുടെ താളം തെറ്റിക്കുന്നത് പതിവാണ്. മുന്‍വര്‍ഷങ്ങളില്‍ പരിധിയില്ലാതെ അപ്പീല്‍ അനുവദിക്കുന്നതായിരുന്നു പതിവ്. അടുത്ത കാലത്തായി ആകെ അപ്പീലുകളുടെ നിശ്ചിത ശതമാനം അനുവദിച്ചാല്‍ മതിയെന്ന് കര്‍ശന നിര്‍ദേശമുണ്ടാകാറുണ്ട്. 121 അപ്പീലുകളില്‍ 16 എണ്ണം മാത്രമാണ് ആലപ്പുഴയില്‍ അനുവദിച്ചിരിക്കുന്നത്.ഡെപ്യൂട്ടി ഡയറക്ടര്‍മാര്‍ അപ്പീല്‍ തള്ളിയാല്‍ ലോകായുക്തയിലും കോടതികളിലും അഭയം തേടുന്നവരുണ്ട്.

പലപ്പോഴും അവസാന നിമിഷമായിരിക്കും ഇങ്ങനെയുള്ളവര്‍ രേഖകളുമായി വേദിയില്‍ ഓടിയെത്തുക. ഇത് മത്സരക്രമം തന്നെ തകിടം മറിച്ച അനുഭവങ്ങളുണ്ടായിട്ടുണ്ട്. നൃത്ത ഇനങ്ങളില്‍ ആദ്യം വേദിയില്‍ കയറാന്‍ ഭൂരിപക്ഷം മത്സരാര്‍ഥികളും ഇഷ്ടപ്പെടാറില്ല. ഇതിനാല്‍ പരമാവധി വൈകി വേദിയില്‍ എത്താനാകും ശ്രമം. ഇതും സി.ഡി. പണിമുടക്കുന്നതും സ്‌റ്റേജിലെ ലൈറ്റിന്റെയും മൈക്കിന്റെയും പ്രശ്‌നങ്ങള്‍ തുടങ്ങി പലവിധ തടസ്സങ്ങളുണ്ടാകും.

ഇതെല്ലാം മറികടന്ന് സമയത്ത് മത്സരങ്ങള്‍ പൂര്‍ത്തിയാക്കാനുള്ള ശ്രമം നടക്കുമ്പോഴാണ് കൂട്ടമായെത്തുന്ന അപ്പീലുകാര്‍ തലവേദനയാകുന്നത്.