ബ്രൂവറി, ഡിസ്റ്റലറി അഴിമതി വിവാദത്തില്‍ പ്രതിപക്ഷനേതാവ് രമേശ് ചെന്നിത്തല നിയമയുദ്ധം തുടങ്ങി. ഇതിന്റെ ഭാഗമായി ഇന്ന് രാവിലെ തിരുവനന്തപുരം വിജിലന്‍സ് കോടതിയില്‍ കേസ് ഫയല്‍ ചെയ്തു. അടുത്തമാസം 10ന് കേസ് പരിഗണിക്കുമെന്ന് കോടതി അറിയിച്ചു. രാവിലെ 11 മണിയോടെ അദ്ദേഹം നേരിട്ടെത്തിയാണ് പരാതി നല്‍കിയത്. മുഖ്യമന്ത്രി പിണറായി വിജയനും എക്‌സ്സൈസ് മന്ത്രി ടി.പി രാമകൃഷ്ണനും എതിരെ കേസ് എടുക്കണമെന്നാണ് ആവശ്യം. സംഭവം വിവാദമായതിനെ തുടര്‍ന്ന് ഹൈക്കോടതി ഇത് സംബന്ധിച്ച കേസുകള്‍ തീര്‍പ്പാക്കിയിരുന്നു. എന്നാല്‍ സി.ആര്‍.പി.സി പ്രകാരമാണ് താന്‍ കേസ് നല്‍കിയതെന്നും കോടതിയില്‍ വിശ്വാസമുണ്ടെന്നും ചെന്നിത്തല പറഞ്ഞു. കട്ടമുതല്‍ തിരിച്ച് നല്‍കിയാല്‍ കളവില്ലാതാകുമോ എന്നും പ്രതിപക്ഷനേതാവ് ചോദിച്ചു.

പ്രളയത്തിന്റെ മറവില്‍ സര്‍ക്കാര്‍ നടത്തിയ ബ്രൂവറി, ഡിസ്റ്റലറി ഇടപാട് പ്രതിപക്ഷനേതാവാണ് പുറത്ത് കൊണ്ടുവന്നത്. അഴിമതി നിരോധന നിയമത്തിലെ( 2018 ഭേദഗതി) സെക്ഷന്‍ 17 എ(1) പ്രകാരം അന്വേഷണത്തിന് അനുമതി നല്‍കണമെന്ന് ആവശ്യപ്പെട്ട് പ്രതിപക്ഷ നേതാവ് രമേശ് ചെന്നിത്തല നാല് തവണ ഗവര്‍ണ്ണര്‍ക്ക് കത്ത് നല്‍കിയെങ്കിലും ഹൈക്കോടതി ഹര്‍ജികള്‍ തീര്‍പ്പാക്കിയതിനാല്‍ കേസ് എടുക്കേണ്ടെന്ന് നിലപാടാണ് ഗവര്‍ണ്ണര്‍ സ്വീകരിച്ചത്. അനുമതി റദ്ദാക്കിയാലും മുഖ്യമന്ത്രിക്കും എക്‌സൈസ് മന്ത്രിക്കും എതിരെ കേസ് എടുക്കാമെന്നാണ് അഴിമതി നിരോധന നിയമത്തിലെ സെക്ഷന്‍ 15 പറയുന്നത് കുറ്റം ചെയ്താല്‍ മാത്രമല്ല കുറ്റം ചെയ്യാനുള്ള ശ്രമം നടന്നുവെന്ന് ബോധ്യപ്പെട്ടാലും അന്വേഷണം നടത്തി കേസ് എടുക്കാം എന്നാണ് പ്രതിപക്ഷനേതാവ് പറയുന്നത്.

അഴിമതി നിരോധന നിയമം സെക്ഷന്‍ 13 ലെ സബ് സെ്ക്ഷന്‍ 1 പ്രകാരം രണ്ട് വര്‍ഷത്തില്‍ കുറയാത്ത തടവ് ശിക്ഷ കിട്ടാവുന്ന കുറ്റമാണിത്. അതോടൊപ്പം ക്രിമിനല്‍ ഗൂഡാലോചനക്ക് 120 ബി പ്രകാരവും ഇവര്‍ക്ക് രണ്ടു പേര്‍ക്കുമെതിരെ കേസ് എടുക്കാവുന്നതാണ്. 1999ലെ സര്‍ക്കാര്‍ ഉത്തരവ് കാറ്റില്‍ പറത്തിക്കൊണ്ടാണ് മൂന്ന് ബ്രൂവറിക്കും, ഒരു ഡിസ്റ്റലറിക്കും ഉള്ള അനുമതി സര്‍ക്കാര്‍ നല്‍കയിത്. വളരെ രഹസ്യമായി സര്‍ക്കാരിന് വേണ്ടപ്പെട്ട നാല് പേരില്‍ നിന്ന് മാത്രം അപേക്ഷകള്‍ എഴുതി വാങ്ങി അവര്‍ക്ക് ബ്രൂവറികളും ഡിസ്റ്റലറികളും അനുവദിക്കുകയാണ് ചെയ്തത്. 

സാമ്പത്തിക നേട്ടത്തിന് വേണ്ടി ഔദ്യേഗിക പദവികള്‍ ദുരുപയോഗം ചെയ്ത് മുഖ്യമന്ത്രിയും എക്‌സൈസ് മന്ത്രിയും ബ്രൂവറി ഡിസ്റ്റലറി ഉടമകളുമായി നടത്തിയ ഗൂഡാലോചനയാണ് ഈ ക്രമ വിരുദ്ധമായ ഇടപാടിലേക്കും അഴിമതിയിലേക്കും നയിച്ചതെന്ന് ചെന്നിത്തല ചൂണ്ടിക്കാണിച്ചു. ശ്രീ ചക്ര ഡിസ്റ്റലറീസ്, പവര്‍ ഇന്‍ഫ്രാടെക്, അപ്പോളോ ഡിസ്റ്റലിറീസ്, ശ്രീധര്‍ ബ്രൂവറീസ് എന്നിവയുടെ ഉടമകളുമായി മുഖ്യമന്ത്രിയും, എക്‌സൈസ് മന്ത്രിയും കുറ്റകരമായ ഗൂഡാലോചന നട്ത്തിയാണ് ചട്ടങ്ങള്‍ എല്ലാം ലംഘിച്ച് അവയ്ക് അനുമതി നല്‍കിയത്. ഇതില്‍ പവര്‍ ഇന്‍ഫ്രാടെക് വ്യാജ മേല്‍വിലാസമാണ് അപേക്ഷയില്‍ കാണിച്ചിരിക്കുന്നത്.