അനാവശ്യ ഹര്‍ജി നല്‍കിയതിനാല്‍ പിഴ അടയ്ക്കണമെന്ന് പറഞ്ഞ ഹൈക്കോടതി നിര്‍ദ്ദേശം പാലിക്കില്ലെന്ന് ബി.ജെ.പി നേതാവ് ശോഭാ സുരേന്ദ്രന്‍. ഹൈക്കോടതിക്ക് മുകളില്‍ സുപ്രീംകോടതിയുണ്ട്. ഹര്‍ജിയുമായി അവിടേക്ക് പോകും. ഹൈക്കോടതിയില്‍ അഭിഭാഷകന്‍ തനിക്ക് വേണ്ടി മാപ്പ് പറഞ്ഞതായി അറിവില്ല. അക്കാര്യം അദ്ദേഹം പറയട്ടെ. വിലകുറഞ്ഞ പ്രശസ്തി നേടേണ്ട കാര്യം തനിക്കില്ലെന്നും അവര്‍ വ്യക്തമാക്കി. ശബരിമലയിലെ പൊലീസ് നടപടിയെ ചോദ്യം ചെയ്താണ് ശോഭാ സുരേന്ദ്രന്‍ ഹൈക്കോടതിയെ സമീപിച്ചത്. കോടതി കാര്യങ്ങള്‍ അഭിഭാഷകനോട് ചോദിക്കും. 

പബ്ലിസിറ്റി സ്റ്റണ്ട് നടത്താന്‍ കോടതിയെ ഉപയോഗിക്കരുതെന്നും താക്കീത് നല്‍കിക്കൊണ്ട് ശോഭാ സുരേന്ദ്രന്‍ നല്‍കിയ ഹര്‍ജി നിരുപാധികം തള്ളിക്കളഞ്ഞു. തുടര്‍ന്നാണ് 25,000 രൂപ പിഴ നല്‍കണമെന്ന് നിര്‍ദ്ദേശിച്ചത്. ഈ തുക അടയ്ക്കില്ലെന്നാണ് അവര്‍ വ്യക്തമാക്കിയത്. കേന്ദ്രമന്ത്രി പൊന്‍രാധാകൃഷ്ണനെയും ഹൈക്കോടതി ജഡ്ജിയെയും തടഞ്ഞ പൊലീസ് നടപടിക്കെതിരെയാണ് ഹര്‍ജി നല്‍കിയത്. ജഡ്ജിയെ തടഞ്ഞ സംഭവത്തില്‍ ഹൈക്കോടതി ഇടപെട്ടതാണ്. പരാതിയില്ലെന്ന് ജഡ്ജി തന്നെ സമ്മതിച്ചതാണ്. ഈ വിഷയത്തില്‍ പൊലീസിലോ, അധികൃതരിലോ പരാതി നല്‍കാതെ ശോഭാ സുരേന്ദ്രന്‍ കോടതിയെ സമീപിച്ചതും ശരിയല്ലെന്ന് കോടതി ചൂണ്ടിക്കട്ടി. 

സമയം വെറുതേ പാഴാക്കിയെന്നും കോടതി പരിഹസിച്ചു. ശോഭാ സുരേന്ദ്രനെതിരായ നടപടി മറ്റുളളവര്‍ക്ക് പാഠമായിരിക്കണമെന്നും കോടതി പറഞ്ഞു. പിഴയായി വിധിച്ച തുക ലീഗല്‍ സര്‍വീസ് സൊസൈറ്റിയിലേക്ക് അടയ്ക്കാനും കോടതി ഉത്തരവിട്ടു. പോലീസ് നടപടിയ്‌ക്കെതിരെ തിരിഞ്ഞ ശോഭ സുരേന്ദ്രന് ഹൈക്കോടതിയില്‍ നിന്നും തിരിച്ചടി. ബിജെപി നേതാവ് ശോഭാ സുരേന്ദ്രന് ഹൈക്കോടതിയാണ് പിഴ വിധിച്ചത്. 25000 രൂപ പിഴ ഈടാക്കിയാണ് ശബരിമല വിഷയത്തിലെ പൊലീസ് നടപടിക്കെതിരെ ശോഭ സമര്‍പ്പിച്ച ഹര്‍ജി കോടതി തള്ളിയത്. 

കഴിഞ്ഞയാഴ്ച തൃശൂര്‍ എസ്.പി യതീഷ് ചന്ദ്രയ്‌ക്കെതിരെ മോശം പരാമര്‍ശം നടത്തിയതിന് ശോഭാ സുരേന്ദ്രനെതിരെ പൊലീസ് കേസ് എടുത്തിരുന്നു. യതീഷ് ചന്ദ്രയുടെ ബൂട്ട് ബി.ജെ.പി-ആര്‍.എസ്.എസ് പ്രവര്‍ത്തകരുടെ ശരീരത്ത് പതിക്കും മുമ്പ് ദണ്ഡപരിശീലനം നടത്തിയ ഞങ്ങളുടെ പ്രവര്‍ത്തകര്‍ തിരിച്ചടിക്കുമെന്നാണ് പ്രകോപനപരമായി പ്രസംഗിച്ചത്. പൊലീസ് സേനയെ നിര്‍വീര്യമാക്കുന്ന ഇത്തരം പ്രസംഗങ്ങള്‍ക്കും നടപടികള്‍ക്കും എതിരെ വ്യാപകമായ പ്രതിഷേധമാണ് ഉയര്‍ന്നിട്ടുള്ളത്.