കോടതി ഉത്തരവ് നടപ്പാക്കേണ്ടതില്ലെന്ന് തഹസില്‍ദാര്‍ക്ക് രേഖാമൂലം നിര്‍ദേശം നല്‍കിയ ഹാരിസണിന്റെ അനധികൃത ഭൂമി തിരിച്ചുപിടിക്കാന്‍ ചുമതലപ്പെട്ട സ്‌പെഷല്‍ ഓഫിസര്‍ എം.ജി. രാജമാണിക്യത്തിനെതിരെ കോടതിയലക്ഷ്യ നടപടി. കോടതി ഉത്തരവ് തെറ്റായി സമ്പാദിച്ചതാണെന്നും പുന$പരിശോധനാ ഹരജി നിലവിലുള്ളതിനാല്‍ നടപ്പാക്കേണ്ടതില്ലെന്നും വ്യക്തമാക്കി എറണാകുളം കലക്ടര്‍ കൂടിയായ രാജമാണിക്യം പത്തനാപുരം തഹസില്‍ദാര്‍ക്ക് രേഖാമൂലം നല്‍കിയ നിര്‍ദേശമാണ് കോടതിയലക്ഷ്യത്തിനിടയാക്കിയിരിക്കുന്നത്. ഹാരിസണില്‍നിന്ന് റിയ റിസോര്‍ട്ട്‌സ് ആന്റ് പ്രോപ്പര്‍ട്ടീസ് ലിമിറ്റഡ് പത്തനാപുരത്ത് രജിസ്റ്റര്‍ ചെയ്ത് വാങ്ങിയ ഭൂമിയുടെ പോക്കുവരവ് ചെയ്ത് കൊടുക്കണമെന്ന് ഹൈകോടതി ഉത്തരവിട്ടിരുന്നു.
ഈ ഉത്തരവ് നടപ്പാക്കാത്തതിനെ തുടര്‍ന്ന് റിയ റിസോര്‍ട്ടസ് നല്‍കിയ ഹരജിയിലാണ് നേരത്തെ ഉത്തരവിട്ട ജസ്റ്റിസ് സി. കെ അബ്ദുല്‍ റഹീം കോടതിയലക്ഷ്യ നടപടിക്ക് തുടക്കംകുറിച്ചത്.
ഒരു മാസത്തിനകം ഹരജിക്കാരുടെ അപേക്ഷ പരിഗണിച്ച് ഭൂമി പോക്കുവരവ് ചെയ്ത് നല്‍കണമെന്നായിരുന്നു സിംഗ്ള്‍ ബെഞ്ചിന്റെ ഉത്തരവ്. എന്നാല്‍, ഉത്തരവ് നടപ്പാക്കാതിരുന്നതിനെ തുടര്‍ന്ന് ഹരജിക്കാര്‍ നടത്തിയ അന്വേഷണത്തിലാണ് സ്‌പെഷല്‍ ഓഫിസറുടെ നിര്‍ദേശമുള്ളതായി മനസ്സിലായത്. ഈ നിര്‍ദേശം വിവരാവകാശ നിയമ പ്രകാരം സമ്പാദിച്ച ഹരജിക്കാര്‍ ഇതും ഹരജിക്കൊപ്പം കോടതിയില്‍ ഹാജരാക്കി.
കോടതിയുടെ ഉത്തരവിനെ \'തെറ്റായി സമ്പാദിച്ചത്\' എന്ന തരത്തില്‍ വ്യാഖ്യാനിച്ച ഉദ്യോഗസ്ഥന്റെ നടപടിയെ സിംഗ്ള്‍ ബെഞ്ച് രൂക്ഷമായി വിമര്‍ശിച്ചു. പുന$പരിശോധനാ ഹരജി നിലവിലുള്ളതിനാല്‍ ഉത്തരവ് നടപ്പാക്കേണ്ടെന്നാണ് തഹസില്‍ദാര്‍ക്ക് നല്‍കിയ മറ്റൊരു നിര്‍ദേശം. കോടതി ഉത്തരവ് നടപ്പാക്കുന്നത് തടയാന്‍ ഉദ്യോഗസ്ഥന് എന്തധികാരമാണുള്ളതെന്ന് കോടതി ആരാഞ്ഞു.
തുടര്‍ന്നാണ് രേഖാമൂലം കീഴുദ്യോഗസ്ഥന് നല്‍കിയ നിര്‍ദേശത്തിലെ പരാമര്‍ശങ്ങള്‍ കോടതിയലക്ഷ്യമാണെന്ന് കോടതി നിരീക്ഷിച്ചത്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha