ടീനേജ് പ്രായത്തില്‍ പ്രണയം കടന്നുവരാത്തവരായി ആരുമില്ല.എന്നാല്‍ ഇവിടെ ഒരാള്‍ക്ക് പ്രണയം തോന്നിയതാകട്ടെ ടീച്ചറിനോടാണ്. അത് വെറും പ്രണയമായിരുന്നില്ല, അസ്ഥിയില്‍ പിടിച്ച പ്രണയം. ടീച്ചറെ കെട്ടിയാലെ അടങ്ങുവെന്ന വാശിക്ക് മുന്നില്‍ വീട്ടുകാരും തോറ്റു.അവിടെയും രക്ഷയില്ലന്നായപ്പോള്‍ ടീച്ചറെ കെട്ടാനായി കോടതിയോട് സഹായം അഭ്യര്‍ഥിച്ചു. എന്നാല്‍ സംഭവം കോടതിയിലെത്തിയതോടെ കഥമാറി.
പ്രണയത്തിലായ അധ്യാപികയെ വിട്ടുകിട്ടണമെന്നാവശ്യപ്പെട്ട് ഹേബിയസ് കോര്‍പ്പസ് നല്‍കിയ വിദ്യാര്‍ഥിയാണ് പുലിവാല് പിടിച്ചത്. കോടതിയുടെ സമയം കളഞ്ഞതിന് വിദ്യാര്‍ഥിയോട് 10,000 രൂപ പിഴയടയ്ക്കാനും ഹൈക്കോടതി ഉത്തരവിട്ടു. തൊടുപുഴ കോഓപറേറ്റീവ് കോളജിലെ ബി.കോം. വിദ്യാര്‍ത്ഥിയും 21കാരനായ മനീഷ് മോഹനാണ് പുലിവാല് പിടിച്ചത്.

കോളേജിലെ 27കാരിയായ അദ്ധ്യാപികയുമായി മനീഷ് മോഹന്‍ പ്രണത്തിലായിരുന്നുവെന്നാണ് ഹര്‍ജിയില്‍ പറയുന്നത്. അദ്ധ്യാപിക തന്നെയും പ്രണയിച്ചതിനാല്‍ വീട്ടുതടങ്കലിലാക്കിയിരിക്കുകയാണെന്നും വിവാഹം കഴിക്കാന്‍ ആഗ്രഹിക്കുന്നുവെന്നും ആവശ്യപ്പെട്ട് വിദ്യാര്‍ഥി കോടതിയെ സമീപിക്കുകയായിരുന്നു. വിദ്യാര്‍ത്ഥിയുടെ ഹേബിയസ് കോര്‍പ്പസ് ഹര്‍ജിയില്‍ അദ്ധ്യാപികയെ ഹാജരാക്കാന്‍ കോടതി നിര്‍ദ്ദേശിച്ചു. ഇതനുസരിച്ച് അദ്ധ്യാപിക ഭര്‍ത്താവിന്റെ കൂടെ കോടതിയിലെത്തി. ഇതോടെയാണ് ഹര്‍ജിക്കാരനായ വിദ്യാര്‍ത്ഥി വെട്ടിലായത്.
താന്‍ ആരെയും പ്രണയിച്ചിട്ടില്ലെന്നും വിവാഹിതയാണെന്നും അദ്ധ്യാപിക കോടതിയെ അറിയിച്ചു. ഇതോടെയാണ് അനാവശ്യ വ്യവഹാരവുമായി കോടതിയുടെയും അദ്ധ്യാപിക ഉള്‍പ്പെടെ കക്ഷികളുടെയും സമയം നഷ്ടപ്പെടുത്തിയതിന് വിദ്യാര്‍ഥിയോട് പിഴയടയ്ക്കാന്‍ കോടതി ഉത്തരവിട്ടത്. പിഴസംഖ്യ അദ്ധ്യാപികയ്ക്കു നല്‍കാനും കോടതി നിര്‍ദ്ദേശിച്ചു. ഹരജിക്കാരന്റെ ഭാഗത്തുനിന്ന് ശല്യമുണ്ടായാല്‍ മതിയായ പൊലീസ് സംരക്ഷണം അദ്ധ്യാപികയ്ക്കു നല്‍കാനും കോടതി ഉത്തരവിട്ടു.
ഭര്‍ത്താവുമായി അദ്ധ്യാപിക കോടതിയിലെത്തിയപ്പോഴാണ് വിവാഹം കഴിഞ്ഞത് വിദ്യാര്‍ത്ഥി അറിഞ്ഞത്. വിദ്യാര്‍ത്ഥി എന്നതിലപ്പുറമുള്ള ബന്ധമൊന്നുമില്ലെന്ന് അദ്ധ്യാപിക കോടതിയില്‍ വ്യക്തമാക്കുകയും ചെയ്തു. അദ്ധ്യാപിക വസ്തുത അറിയിച്ചതോടെ ഹര്‍ജിയിലെ ആവശ്യത്തില്‍ സമ്മര്‍ദ്ദം ചെലുത്തുന്നില്ലെന്ന് ഹരജിക്കാരന്റെ അഭിഭാഷകന്‍ അറിയിച്ചു. എന്നാല്‍ അനാവശ്യമായി കോടതിയുടെ സമയം ചെലവഴിക്കുകയും കക്ഷികള്‍ക്കു ബുദ്ധിമുട്ടുണ്ടാക്കുകയും ചെയ്‌തെന്നു ചൂണ്ടിക്കാട്ടി കോടതി 10,000 രൂപ പിഴയടയ്ക്കാന്‍ ഉത്തരവിടുകയായിരുന്നു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha