അക്കൗണ്ട് തന്നെ മുഖ്യം... കേരളത്തിലെ ബിജെപിയെ മെച്ചപ്പെടുത്തുന്നതിനായി അമിത്ഷാ; കേരളത്തില്‍ തങ്ങുന്നത് 15-20 ദിവസങ്ങള്‍
കേരളത്തിലെ ബിജെപിയെ മെച്ചപ്പെടുത്തുന്നതിനായി അമിത്ഷാ കേരളത്തില്‍ കൂടുതല്‍ സമയം ചെലവഴിക്കുന്നു. ബിജെപി അംഗത്വവിതരണ പ്രവര്‍ത്തനങ്ങള്‍ വിലയിരുത്താനും തിരഞ്ഞെടുപ്പു തന്ത്രങ്ങള്‍ക്കു രൂപം നല്‍കാനുമാണ് പാര്‍ട്ടി അധ്യക്ഷന്‍ അമിത് ഷാ ജനുവരിയില്‍ സംസ്ഥാനം സന്ദര്‍ശിക്കുന്നത്. തുടര്‍ന്നു തദ്ദേശഭരണ സ്ഥാപന തിരഞ്ഞെടുപ്പിനും നിയമസഭാ തിരഞ്ഞെടുപ്പിനും ഇടയ്ക്കു പല ഘട്ടങ്ങളിലായി 15 -20 ദിവസങ്ങള്‍ അമിത് ഷാ കേരളത്തില്‍ തങ്ങും. അമിത് ഷാ നിയോഗിക്കുന്ന സംഘങ്ങള്‍ സംസ്ഥാനത്തെ വിവിധ മണ്ഡലങ്ങളില്‍ രഹസ്യ സര്‍വേകള്‍ നടത്താനും പരിപാടിയുണ്ട്.
സംസ്ഥാനത്തെ ബിജെപിയുടെ പ്രവര്‍ത്തനശൈലിയില്‍ സമൂലമായ മാറ്റമാണ് അമിത് ഷാ നിര്‍ദേശിക്കുന്നത്. ആര്‍എസ്എസുമായി സഹകരിച്ചു സംസ്ഥാന, ജില്ലാ, മണ്ഡലം, പഞ്ചായത്ത് തലങ്ങളില്‍ നിരന്തരം പരിവാര്‍ ബൈഠക്കുകള്‍ വിളിച്ചു ചേര്‍ത്ത് പ്രവര്‍ത്തനം ഊര്‍ജിതമാക്കാനും നിര്‍ദേശം നല്‍കി. പഞ്ചായത്ത് തലം മുതല്‍ സ്ഥാനാര്‍ഥി നിര്‍ണയം ഉള്‍പ്പെടെയുള്ള കാര്യങ്ങളില്‍ ആര്‍എസ്എസ് മാര്‍ഗനിര്‍ദേശങ്ങള്‍ അനുസരിക്കാനും ആവശ്യപ്പെട്ടിട്ടുണ്ട്. ആര്‍എസ്എസുമായി സഹകരിക്കാത്ത നേതാക്കളെ പരിവാര്‍ ബൈഠക്കുകളില്‍ പങ്കെടുപ്പിക്കില്ലെന്ന മുന്നറിയിപ്പും നല്‍കി.
സംസ്ഥാന തല പരിവാര്‍ ബൈഠകുകളില്‍ നിന്നു മുന്‍ അധ്യക്ഷരായ സി.കെ.പത്മനാഭനെയും പി.എസ്.ശ്രീധരന്‍ പിള്ളയെയും മാറ്റി നിര്‍ത്തിയിരിക്കുന്ന് മറ്റു നേതാക്കള്‍ക്കുള്ള പാഠമാണ്. സംസ്ഥാന നേതൃത്വത്തിലെ വിഭാഗീയത പരിഹരിക്കാന്‍ ശക്തമായ ആര്‍എസ്എസ് ഇടപെടലെന്ന നയമാണ് അമിത് ഷാ സ്വീകരിക്കുന്നത്. അംഗത്വ വിതരണം പൂര്‍ത്തിയായാലുടന്‍ സംഘടനാ തിരഞ്ഞെടുപ്പിലൂടെ യുവ നേതൃനിരയെ സംസ്ഥാന തലത്തില്‍ അവതരിപ്പിക്കും. നേതൃനിരയില്‍ വനിതകള്‍ക്കു കൂടുതല്‍ പ്രാതിനിധ്യം നല്‍കാനും പദ്ധതിയുണ്ട്.
കഴിഞ്ഞ ലോക്‌സഭാ തിരഞ്ഞെടുപ്പിലെ പ്രവര്‍ത്തന പാളിച്ചകളെ കുറിച്ചു മുതിര്‍ന്ന നേതാക്കള്‍ നല്‍കിയ പരാതികള്‍ കേന്ദ്ര നേതൃത്വം അതീവ ഗൗരവത്തിലെടുത്തിട്ടുണ്ട്. സ്ഥാനാര്‍ഥി നിര്‍ണയം വൈകിപ്പിച്ചതിലും സ്ഥാനാര്‍ഥികള്‍ക്കുള്ള ഫണ്ടു വിതരണത്തിലും ഗുരുതരമായ ക്രമക്കേടുകള്‍ ചൂണ്ടിക്കാണിച്ചിട്ടുണ്ട്. കഴിഞ്ഞ ലോക്‌സഭാ, നിയമസഭാ തിരഞ്ഞെടുപ്പുകളില്‍ ബിജെപി വോട്ടുകള്‍ ക്രമാനുഗതമായി വര്‍ധിച്ച മണ്ഡലങ്ങളില്‍ ശ്രദ്ധകേന്ദ്രീകരിക്കാനും ജനപിന്തുണയുള്ള നേതാക്കള്‍ക്ക് മുന്‍തൂക്കം നല്‍കാനുമാണു നിര്‍ദേശം.
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക
https://www.facebook.com/Malayalivartha
