പമ്പയിലും പത്തനംതിട്ടയിലും ഭക്തരോട് പൊരുതി തോറ്റോടി മടങ്ങിയ മനിതി സംഘത്തിലെ മൂന്ന് പേര് മുഖ്യമന്ത്രി പിണറായി വിജയനെ കാണാനെത്തിയെങ്കിലും തിരുവനന്തപുരത്തെ ഭക്തജനം അവരെ തുരത്തി ഓടിച്ചു, പൊലീസ് മുഖ്യമന്ത്രിയെ കാണാന് അനുമതിയും നല്കിയില്ല
പമ്പയിലും പത്തനംതിട്ടയിലും ഭക്തരോട് പൊരുതി തോറ്റോടി മടങ്ങിയ മനിതി സംഘത്തിലെ മൂന്ന് പേര് മുഖ്യമന്ത്രി പിണറായി വിജയനെ കാണാനെത്തിയെങ്കിലും തിരുവനന്തപുരത്തെ ഭക്തജനം അവരെ തുരത്തി ഓടിച്ചു. ഭക്തരുടെ പ്രതിഷേധത്തെ തുടര്ന്ന് മനിതി സംഘം കയറിയ തിരുച്ചിറപ്പള്ളി എക്സ്പ്രസ് ട്രെയിനിന്റെ ബോഗിയിലെ ജനാലകളും വാതിലുകളും പൊലീസ് അടച്ചു. ഇവരെ കാണണമെന്നും സംസാരിക്കണമെന്നും മഹിളാമോര്ച്ച ഉള്പ്പെടെയുള്ള വനിതകള് ആവശ്യപ്പെട്ടെങ്കിലും പൊലീസ് അനുവദിച്ചില്ല. മുദ്രാവാക്യംവിളികളും നാമജപവുമായി ഭക്തര് ട്രെയിനിന് ചിറ്റും തമ്പടിച്ചു. ഇതോടെ പൊലീസും ശക്തമായി നിലയുറച്ചു.
ശബരിമലയില് ദര്ശനത്തിന് പോയ 11 അംഗ മനിതി സംഘത്തിന് പൊലീസ് സുരക്ഷ ഒരുക്കിയില്ലെന്ന് ആരോപിച്ചാണ് ഇവരുടെ സംഘത്തിലെ മറ്റ് മൂന്ന് സ്ത്രീകള് ഇന്നലെ രാത്രി പത്തനംതിട്ട എസ്.പിയെ സമീപിച്ചത്. ഇവരെ കാര്യങ്ങള് പറഞ്ഞ് ബോധിപ്പിച്ചെങ്കിലും പിന്മാറാന് തയ്യാറായില്ല. അതോടെ മുഖ്യമന്ത്രി പിണറായി വിജയനെ നേരില് കണ്ട് കാര്യങ്ങള് ബോധ്യപ്പെടുത്തണമെന്ന് മൂന്ന് യുവതികളും ആവശ്യപ്പെട്ടു. അതോടെ പൊലീസ് സംരക്ഷണയില് ഇവരെ തിരുവനന്തപുരത്തേക്ക് കൊണ്ടുവരുകയായിരുന്നു. എന്നാല് മുഖ്യമന്ത്രിയെ കാണാന് സിറ്റി പൊലീസ് ഇവര്ക്ക് അനുമതി നല്കിയില്ല. അതോടെയാണ് സംഘം തിരുവനന്തപുരം റെയില്വേസ്റ്റേഷനില് നിന്ന് തമിഴ്നാട്ടിലേക്ക് മടങ്ങാന് തീരുമാനിച്ചത്.
ശബരിമലയിലെ നിരോധനാജ്ഞ പിന്വലിക്കണമെന്നും ആചാരംസംരക്ഷിക്കണമെന്നും ആവശ്യപ്പെട്ട് ബി.ജെ.പി നേതാക്കള് തിരുവനന്തപുരം സെക്രട്ടറിയേറ്റിന് മുന്നില് റിലേ സത്യഗ്രഹം നടത്തുകയാണ്. അവിടെ തമ്പടിച്ചിരുന്ന ഭക്തര് മാധ്യമങ്ങളിലൂടെയും സമൂഹമാധ്യമങ്ങളിലൂടെയുമാണ് മനിതി സംഘം റെയില്വേ സ്റ്റേഷനിലുണ്ടെന്ന് അറിഞ്ഞത്. മനിതി സംഘത്തിന് മാവോയിസ്റ്റ് ബന്ധമുണ്ടെന്ന് പന്തളം കൊട്ടാരം നിര്വാഹക സമിതി അംഗം ശശികുമാരവര്മ ആരോപിച്ചിരുന്നു. ഇതേ തുടര്ന്നാണ് ശബരമല കര്മസമിതിയും ആര്.എസ്.എസും മറ്റ് ഭക്തജ കൂട്ടായ്മയും മനിതി സംഘത്തിനെതിരെ കൂടുതല് ശക്തമായ പ്രതിഷേധ മതില് തീര്ത്തത്.
നാഗര്കോവില് വഴി തമിഴ്നാട്ടിലേക്ക് തിരുച്ചിറപ്പള്ളി എക്സ്പ്രസ് തിരിച്ചിട്ടുണ്ടെങ്കിലും മറ്റ് സ്റ്റേഷനുകളില് പ്രതിഷേധക്കാര് എത്താനിടയുണ്ട്. അതനുസരിച്ച് എല്ലായിടത്തും കനത്ത സുരക്ഷ ഏര്പ്പെടുത്തിയിട്ടുണ്ട്. മാത്രമല്ല കേരളാ അതിര്ത്തിവരെ കേരളാ പൊലീസും ആര്.പി.എഫും പിന്നീട് തമിഴ്നാട് പൊലീസും ട്രെയിനില് സുരക്ഷ നല്കും. തങ്ങള് ഇനിയും മടങ്ങിവരുമെന്ന് പറഞ്ഞ ശേഷമാണ് സംഘം മടങ്ങിയത്. തൃപ്തിദേശായി മടങ്ങിവരുമെന്ന് പറഞ്ഞിട്ട് ഇതുവരെ എത്തിയിട്ടില്ല എന്നതും ശ്രദ്ധേയമാണ്.
https://www.facebook.com/Malayalivartha
