യുവതീപ്രവേശനത്തില്‍ ഹൈക്കോടതി നിരീക്ഷക സമിതിയെ വലിച്ചിഴച്ച ദേവസ്വം മന്ത്രി കടകംപള്ളി സുരേന്ദ്രന്‍ ചുട്ടമറുപടിയുമായി ജസ്റ്റിസ് പി.ആര്‍ രാമന്‍. യുവതീപ്രവേശനം നിരീക്ഷക സമിതിയുടെ പരിധിയില്‍ വരില്ല. ക്രമസമാധാന പ്രശ്‌നങ്ങളില്‍ ഇടപെടില്ലെന്ന് നേരത്തേ പറഞ്ഞഥാണ്. സമിതിയോട് ആരും ഉപദേശം തേടിയിട്ടില്ല. നിലവില സംവിധാനങ്ങളിലെ അതൃപ്തി ഹൈക്കോടതിയെ അറിയിക്കും. മന്ത്രിക്ക് എന്തും പറയാം അതിനൊന്നും മറുപടി പറയാനില്ലെന്നും ജസ്റ്റിസ് രാമന്‍ അറിയിച്ചു. ഇന്ന് രാത്രിയോടെ നിരീക്ഷണ സമിതി സന്നിധാനത്തെത്തും. രണ്ട് ജസ്റ്റിസ്മാരും ഡി.ജി.പി ഹേമചന്ദ്രനും അടങ്ങുന്നതാണ് നിരീക്ഷണ സമിതി.

ഇന്നലെ 11 അംഗ യുവതികള്‍ ദര്‍ശനത്തിനെത്തിയപ്പോള്‍ ഉണ്ടായ ക്രമസമാധാന പ്രശ്‌നങ്ങളടക്കം ഹൈക്കോടതി നിരീക്ഷക സമിതി തീരുമാനിക്കട്ടെയെന്ന് ദേവസ്വം മന്ത്രി കടകംപള്ളി സുരേന്ദ്രന്‍ ഇന്നലെ വ്യക്തമാക്കിയിരുന്നു. ശബരിമലയിലെ കക്കൂസുകളുടെ എണ്ണമെടുക്കലല്ല നിരീക്ഷകസമിതിയുടെ പണിയെന്ന് മന്ത്രി വിമര്‍ശിച്ചിരുന്നു. ഹൈക്കോടതി നിരീക്ഷക സമിതിയുടെ നിര്‍ദ്ദേശമനുസരിച്ചാണ് സര്‍ക്കാര്‍ പ്രവര്‍ത്തിക്കുന്നതെന്നും അതിനാല്‍ അവര്‍ കാര്യങ്ങള്‍ പരിശോധിക്കുമെന്നാണ് കരുതുന്നതെന്നും ദേവസ്വം മന്ത്രി പറഞ്ഞിരുന്നു. ഇന്നലത്തെ പ്രശ്‌നങ്ങള്‍ നിരീക്ഷക സമിതിയെ ആരും അറിയിച്ചിരുന്നില്ല. ദേവസ്വം ബോര്‍ഡോ, പൊലീസോ അത്തരത്തിലുള്ള നീക്കവും നടത്തിയില്ല. അതിന് ശേഷം മന്ത്രി തന്നെ ഹൈക്കോടതി സമിതിയുടെ മേല്‍ കാര്യങ്ങള്‍ തലയില്‍ കെട്ടിവയ്ക്കാന്‍ ദേവസ്വം മന്ത്രി ശ്രമിക്കുകയായിരുന്നെന്ന് ആരോപണം ഉയര്‍ന്നിട്ടുണ്ട്.

ശബരിമലയിലെ കാര്യങ്ങള്‍ പരിശോധിക്കാന്‍ ഹൈക്കോടതി നിരീക്ഷണസമിതിയെ ഏര്‍പ്പെടുത്തിയതിനെതിരെ സര്‍ക്കാര്‍ സുപ്രീംകോടതിയെ സമീപിച്ചിരിക്കുകയാണ്. എന്നിട്ട് ആ സമിതി യുവതീപ്രവേശന വിഷയത്തില്‍ ഇടപെടണമെന്ന് ദേവസ്വം മന്ത്രി ആവശ്യപ്പെട്ടത് വലിയ വിരോധാഭാസമാണെന്ന് പ്രതിപക്ഷവും ചൂണ്ടിക്കാണിക്കുന്നു. സര്‍ക്കാരിന്റെ എക്‌സിക്യൂട്ടീവ് അധികാരങ്ങള്‍ കവര്‍ന്നെടുക്കാനാണ് നിരീക്ഷകസമിതിയുടെ ശ്രമം എന്നാണ് മന്ത്രിമാരുടെയും എല്‍.ഡി.എഫിന്റെയും പ്രധാന ആക്ഷേപം.