സംസ്ഥാന രാഷ്ട്രീയത്തെ പിടിച്ച്‌ കുലുക്കിയ ഫോണ്‍ ചോര്‍ത്തല്‍ വിവാദത്തില്‍ പുതിയ വെളിപ്പെടുത്തലുമായി മുന്‍ പൊലീസ് മേധാവി ടി പി സെന്‍കുമാര്‍. കോടിയേരി ബാലകൃഷ്ണന്‍ ആഭ്യന്തരമന്ത്രിയായിരുന്ന കാലത്താണ് സംസ്ഥാനത്ത് ഫോണ്‍ ചോര്‍ത്തല്‍ തുടങ്ങിയതെന്ന് ടി.പി സെന്‍കുമാര്‍ വെളിപ്പെടുത്തി. 

അന്ന് ജേക്കബ് പുന്നൂസ് ആയിരുന്നു സംസ്ഥാന പൊലീസ് മേധാവിയെന്നും അദ്ദേഹം തുറന്നടിച്ചു. തിരുവനന്തപുരത്ത് നടന്ന ബി.ജെ.പി നവാഗത നേതൃസംഗമത്തിലാണ് സെന്‍കുമാറിന്റെ പ്രതികരണം.

തിരുവനന്തപുരം പേരൂര്‍ക്കടയിലെ പൊലീസിന്റെ രഹസ്യകേന്ദ്രത്തില്‍ വച്ച്‌ പ്രമുഖരുടെ ഫോണുകള്‍ ചോര്‍ത്തുന്നുവെന്നത് കാലങ്ങളായുള്ള ആരോപണമുയരുന്നുണ്ട്. എന്നാല്‍ ഇതാദ്യമായാണ് ഫോണ്‍ ചോര്‍ത്തല്‍ വിവാദത്തില്‍ പൊലീസിന്റെ ഭാഗമായിരുന്ന ഒരാള്‍ പ്രതികരിക്കുന്നത്.

2012ല്‍ രാജ്യസുരക്ഷയെപ്പോലും ബാധിക്കുന്ന ഇമെയിലുകളും ഫോണ്‍ വിളികളും പരിശോധിക്കണമെന്ന് ആവശ്യപ്പെട്ട് ഇന്റലിജന്‍സ് മേധാവി പൊലീസ് ആസ്ഥാനത്തെ ഹൈടെക് സെല്ലിന് നല്‍കിയ വിവരങ്ങള്‍ ചോര്‍ന്നത് വന്‍ വിവാദങ്ങള്‍ക്ക് കാരണമായിരുന്നു. ഇതിന് പിന്നാലെ സോളാര്‍ വിവാദം കത്തിനില്‍ക്കുന്ന കാലത്തും മാദ്ധ്യമപ്രവര്‍ത്തകരുടെയും രാഷ്ട്രീയ പ്രവര്‍ത്തകരുടെയും ഫോണ്‍ ചോര്‍ത്തുന്നുവെന്നും ആരോപണം ഉയര്‍ന്നിരുന്നു.

സംസ്ഥാന പൊലീസ് മേധാവിയായിരുന്ന ഒരാള്‍ ഔദ്യോഗിക രഹസ്യങ്ങള്‍ രാഷ്ട്രീയ വേദിയില്‍ തുറന്ന് പറയുന്നത് അനൗചിത്യമാണെന്ന് ഡിവൈഎഫ്‌ഐ സംസ്ഥാന സെക്രട്ടറി എ.എ.റഹീം പ്രതികരിച്ചു. രാഷ്ട്രീയ എതിരാളികളുടെ ഫോണ്‍ ചോര്‍ത്തുന്നത് ഇടത് സംഘടനകളുടെ നയമല്ല. എല്ലാകാലത്തും ഇടത് നേതാക്കളാണ് ഫോണ്‍ ചോര്‍ത്തലിന് ഇരകളായിട്ടുള്ളത്. സെന്‍കുമാറിന്റെ വെളിപ്പെടുത്തലുകള്‍ വെറും രാഷ്ട്രീയ പ്രേരിതമായ പ്രതികരണം മാത്രമാണെന്നും അദ്ദേഹം കൂട്ടിച്ചേര്‍ത്തു.അതേസമയം പൊലീസിലെ കാര്യങ്ങള്‍ വ്യക്തമായി അറിയുന്ന ഒരാള്‍ നടത്തിയ വെളിപ്പെടുത്തലുകള്‍ ഗൗരവമായി എടുക്കണമെന്ന് ബിജെപി സംസ്ഥാന ജനറല്‍ സെക്രട്ടറി കെ.സുരേന്ദ്രന്‍ ആവശ്യപ്പെട്ടു.