കഴിഞ്ഞ ദിവസത്തെ വനിതാ മതില്‍ സര്‍ക്കാരിനും സിപിഎമ്മിനും ലഭിച്ച ഇമേജ് വളരെ വലുതായിരുന്നു. എന്നാല്‍ ഒറ്റ രാത്രി കൊണ്ട് എല്ലാം കലങ്ങി മറിഞ്ഞു. കനക ദുര്‍ഗയേയും ബിന്ദുവിനേയും ശബരിമലയില്‍ പോലീസ് രഹസ്യമായി കയറ്റിയതോടെ വനിതാ മതിലില്‍ നേടിയ പ്രശസ്തിയെല്ലാം പെട്ടെന്ന് കെട്ടടങ്ങി. ചാനലുകളും സോഷ്യല്‍ മീഡിയയുമെല്ലാം ശബരിമല കൊട്ടി ഘോഷിക്കുകയാണ്. 

അതേസമയം ആചാര ലംഘനം നടന്നതിന്റെ പേരില്‍ ശബരിമല നട അടച്ചു. തീര്‍ത്ഥാടകരെ സന്നിധാനത്ത് നിന്ന് ഒഴിപ്പിച്ചു. പുലര്‍ച്ചെ മൂന്നേ മുക്കാലോടെയാണ് യുവതികളായ ബിന്ദുവും കനകദുര്‍ഗ്ഗയും ആചാരലംഘനം നടത്തിയത്. ഇതോടെ തന്ത്രിയും മേല്‍ശാന്തിയും പന്തളം കൊട്ടാരവുമായി നടത്തിയ ചര്‍ച്ചയിലാണ് നട അടച്ചിടാന്‍ തീരുമാനിക്കുകയുമായിരുന്നു.

മുഖം മറച്ചെത്തിയ യുവതികള്‍ ആചാരലംഘനം നടത്തിയതായി പോലീസും, ഇന്റലിജന്‍സും സ്ഥിരീകരിച്ചു. മഫ്തിയിലെത്തിയ പോലീസ് തങ്ങള്‍ക്ക് സുരക്ഷ ഒരുക്കിയതായും പതിനെട്ടാം പടി വഴിയല്ല തങ്ങളെ പോലീസ് സന്നിധാനത്ത് എത്തിച്ചതെന്നും യുവതികള്‍ പറഞ്ഞു. കഴിഞ്ഞ മാസം ഇതേ യുവതികള്‍ തന്നെ ശബരിമലയില്‍ ദര്‍ശനം നടത്താന്‍ എത്തിയിരിരുന്നു. എന്നാല്‍ ഭക്തരുടെ പ്രതിഷേധത്തെ തുടര്‍ന്ന് മടങ്ങിപോകുകയായിരുന്നു.

അതേസമയം യുവതികളുടെ ശബരിമല ദര്‍ശനം നടത്തിയ സംഭവത്തില്‍ പ്രതികരണവുമായി മുഖ്യമന്ത്രി പിണറായി വിജയനും രംഗത്തെത്തി. സ്ത്രീകള്‍ കയറിയെന്നത് വസ്തുതയാണെന്നും മുമ്ബ് കയറാതിരുന്നത് സുരക്ഷയുടെ പ്രശ്‌നങ്ങള്‍ കൊണ്ടാണെന്നും അദ്ദേഹം പറഞ്ഞു.

തിരുവനന്തപുരം വിമാനത്താവളത്തില്‍ മാധ്യമങ്ങളോട് സംസാരിക്കുകയായിരുന്നു മുഖ്യമന്ത്രി. മുമ്ബും താന്‍ പറഞ്ഞിട്ടുണ്ട് ദര്‍ശനത്തിന് എത്തുന്ന സ്ത്രീകള്‍ക്ക് പോലീസ് സംരക്ഷണം നല്‍കുമെന്ന്. അത് തന്നെയാണ് ചെയ്തതെന്നും മുഖ്യമന്ത്രി പറഞ്ഞു.

ഇന്ന് പുലര്‍ച്ചെ 3.45ഓടെയാണ് കനകദുര്‍ഗ, ബിന്ദു എന്നീ യുവതികള്‍ ദര്‍ശനം നടത്തിയത്. ഇവര്‍ ദര്‍ശനം നടത്തുന്നതിന്റെ ദൃശ്യങ്ങള്‍ സ്വകാര്യ ചാനലാണ് പുറത്തുവിട്ടത്. ദര്‍ശനം നടത്തിയെന്ന് ഇന്റലിജന്‍സ് വിഭാഗം സ്ഥിരീകരിച്ചു.

ഒരു മണിയോടെയാണ് ഇവര്‍ പമ്ബയില്‍ എത്തിയതെന്നാണ് ചാനല്‍ റിപ്പോര്‍ട്ട്. ഈ മാസം 24 നാണ് പെരിന്തല്‍മണ്ണ സ്വദേശിയായ കനക ദുര്‍ഗയും കൊയിലാണ്ടി സ്വദേശിയായ ബിന്ദുവും ശബരിമല ദര്‍ശനത്തിനായി എത്തിയിരുന്നെങ്കിലും പ്രതിഷേധത്തെ തുടര്‍ന്ന് ഇവര്‍ക്ക് മടങ്ങിപ്പോരേണ്ടി വന്നിരുന്നു. തിരിച്ച് വരുമെന്ന് ഉറപ്പ് ലഭിച്ചതിനാലാണ് തിരിച്ച് പോകുന്നതെന്ന് അന്ന് കനക ദുര്‍ഗ്ഗ പറഞ്ഞിരുന്നു.