കയ്യില് കിട്ടിയാല് ആക്രമിക്കും: കനകദുര്ഗയേയും ബിന്ദുവിനെയും തിരഞ്ഞ് ബിജെപിയുടെ വാഹനപരിശോധന: പിടികൊടുക്കാതെ യുവതികള്
ശബരിമലയില് പ്രവേശിച്ച് ചരിത്രത്തിന്റെ ഭാഗമായി മാറിയെങ്കിലും കനകദുര്ഗയും ബിന്ദുവും നേരിടുന്നത് വധഭീഷണിയുള്പ്പെടെ. ഇവരെ കയ്യില് കിട്ടിയാല് ആക്രമിക്കാനൊരുങ്ങി വിശ്വാസികളുള്പ്പെടെ ഒരുസംഘം രംഗത്തിറങ്ങിയിട്ടുണ്ട്. ഇവര്ക്കു വേണ്ടി ബിജെപി പ്രവര്ത്തകര് റോഡിലിറങ്ങി വാഹനങ്ങള് പരിശോധിച്ചെങ്കിലും യുവതികളെ കണ്ടെത്താനായിട്ടില്ല. ആര്ക്കും പിടികൊടുക്കാതെ ബിന്ദുവും കനകദുര്ഗയും സുരക്ഷിതയിടത്തിലാണ്.
ശബരിമലയില് നിന്നുള്ള മടക്കയാത്രയില് ബിന്ദുവും കനകദുര്ഗയും തങ്ങിയത് അങ്കമാലി നോര്ത്ത് കിടങ്ങൂര് സെന്റ് സെബാസ്റ്റ്യന്സ് പള്ളിക്കു സമീപമുള്ള വീട്ടില്. ബിന്ദുവിന്റെ സുഹൃത്തായ ജോണ്സന്റെ വീട്ടില് രാവിലെ 10 മണിയോടെയാണ് സ്വകാര്യവാഹനത്തില് ഇരുവരും എത്തിയത്. കാലടിയില് നിന്ന് ഉള്വഴികളിലൂടെ സഞ്ചരിച്ചാണ് അവിടെയെത്തിയത്. യുവതികളെ വീട്ടിലാക്കിയ ശേഷം ഇവര്ക്കൊപ്പമുണ്ടായിരുന്ന സഹായികള് മടങ്ങി. യുവതികള് എത്തുന്നതിനു മുന്പ് 9 മണിയോടെ പൊലീസ് വീടിന്റെ പരിസരത്ത് നിരീക്ഷണം ഏര്പ്പെടുത്തിയിരുന്നു. എന്നാല് ഇവരിവിടെ എത്തിയെന്ന വിവരം ചോര്ന്നു. അതോടെ 12.15ന് യുവതികളേയും പിന്നീട് ജോണ്സണെയും കുടുംബത്തെയും മാറ്റി. പിന്നാലെ ബിജെപിയുടെയും കര്മ്മസമിതിയുടേയും പ്രവര്ത്തകര് പ്രതിഷേധവുമായെത്തി. വീടിന് സുരക്ഷ ഏര്പ്പെടുത്തി.
ഈ വീട്ടില് നിന്ന് ഇവര് പോയതിനു പിന്നാലെ ഇവരെ തിരഞ്ഞ് ബിജെപി പ്രവര്ത്തകര് ദേശീയ പാതയിലേയ്ക്കിറങ്ങി. പാലിയേക്കര ടോള്പ്ലാസയില് മണിക്കൂറുകളോളം നിന്ന് പ്രവര്ത്തകര് വാഹനങ്ങള് പരിശോധിച്ചെങ്കിലും ഇവരെ കിട്ടിയില്ല. കുന്നംകുളത്തും പുഴയ്ക്കലിലും ഷൊര്ണൂര് റോഡിലും ബിജെപി പ്രവര്ത്തകര് വാഹനങ്ങള് പരിശോധിച്ചിരുന്നു.
ബിന്ദുവിന്റെ പൊയില്ക്കാവിലെ വീടിനുനേരെ ആകമണം ഭയന്ന് പൊലീസ് സുരക്ഷ ഏര്പ്പെടുത്തി. കണ്ണൂര് സര്വകലാശാലയുടെ തലശ്ശേരിയിലെ സ്കൂള് ഓഫ് ലീഗല് സ്റ്റഡീസില് അധ്യാപികയായ പത്തനംതിട്ട ളാക്കൂര് സ്വദേശിനിയായ ബിന്ദു ഭര്ത്താവ് ഹരിഹരനൊപ്പം പൊയില്ക്കാവിലാണു താമസം. വീട്ടില് ഇപ്പോള് ആരുമില്ല. ഹരിഹരന് സിപിഐ എംഎല്ലിന്റെ സജീവ പ്രവര്ത്തകനായിരുന്നു.
കനകദുര്ഗയുടെ ഭര്തൃവീട്ടിലും കുടുംബ വീട്ടിലും പൊലീസ് കാവല്. അങ്ങാടിപ്പുറത്തെ ഭര്തൃവീട്ടില് ഇന്നലെ പുലര്ച്ചെയെത്തിയ പൊലീസ് ഭര്ത്താവ് കൃഷ്ണനുണ്ണിയെയും അമ്മയെയും സുരക്ഷിത സ്ഥാനത്തേക്കു മാറ്റി. ശബരിമല കര്മസമിതിയുടെ നേതൃത്വത്തില് ഇവിടേക്ക് നടത്തിയ പ്രതിഷേധ പ്രകടനം വീടിനു സമീപം പൊലീസ് തടഞ്ഞു. കനകദുര്ഗയുടെ അരീക്കോട്ടെ കുടുംബവീട്ടിലും പൊലീസ് സുരക്ഷ ഒരുക്കി. അമ്മയും സഹോദരനുമാണ് ഇവിടെ താമസം. ശബരിമല ദര്ശനത്തിനായി കഴിഞ്ഞമാസം 21ന് അങ്ങാടിപ്പുറത്തു നിന്നു പുറപ്പെട്ട കനകദുര്ഗ പിന്നീട് ഇവിടേക്കു തിരിച്ചെത്തിയിരുന്നില്ല. മക്കളെ ഇതിനു മുന്പ് മഞ്ചേരിയിലെ സഹോദരിയുടെ വീട്ടിലേക്കു മാറ്റിയിരുന്നു. ആനമങ്ങാട് മാവേലി സ്റ്റോറിലെ താല്ക്കാലിക ജീവനക്കാരിയാണ് കനകദുര്ഗ.
https://www.facebook.com/Malayalivartha
