ശബരിമലയില് ഇനിയും കൂടുതല് യുവതികള് ദര്ശനത്തിനെത്തുമെന്ന് ഇന്റലിജന്സ് റിപ്പോര്ട്ട്... സംസ്ഥാനത്തിനു പുറത്തുനിന്നുള്ള യുവതികളാണ് ഇനിയും ദര്ശനത്തിന് എത്തുന്നതെന്നാണു വിവരം
ശബരിമലയില് ഇനിയും കൂടുതല് യുവതികള് ദര്ശനത്തിനെത്തുമെന്ന് ഇന്റലിജന്സ് റിപ്പോര്ട്ട്. സംസ്ഥാനത്തിനു പുറത്തുനിന്നുള്ള യുവതികളാണ് ഇനിയും ദര്ശനത്തിന് എത്തുന്നതെന്നാണു വിവരം. കഴിഞ്ഞ ദിവസങ്ങളില് ഒന്പതു യുവതികള് ദര്ശനം നടത്തിയെന്ന വിവരം പുറത്തുവന്നതിനു പിന്നാലെയാണു കൂടുതല് യുവതികള് ദര്ശനത്തിനു വരുന്നുവെന്നു പോലീസ് ഉന്നതര് പറയുന്നത്.
ഇന്നലെ വലിയ നടപ്പന്തല് വിരി വെക്കാന് സൗകര്യം ഒരുക്കുന്ന വ്യാജേന പോലീസ് സന്നിധാനത്തിന് പിറകിലുള്ള 4 വഴികളില്, സ്റ്റാഫ് ഗേറ്റ് , വടക്കേ നട, നെയ്യഭിഷേകം വഴി , ഭസ്മക്കുളം തുടങ്ങിയിടത്തു നിന്നും സ്വാമിമാരെ മാറ്റിയത് യുവതി പ്രവേശനത്തിന് കളം ഒരുക്കുന്നത്തിനു വേണ്ടിയാണെന്ന് അയ്യപ്പ ഭക്തര് കരുതിയത് ചെറിയ സങ്കര്ഷങ്ങള്ക്കിടയാക്കിയിരുന്നു.
44 വയസ്സുള്ള പത്മാവതി ശബരിമലയ്ക്കു പോകാന് കോട്ടയം റെയില്വേ സ്റ്റേഷനിലെത്തിയതും ഇന്നലെ ഭക്തരെ ആശങ്കയിലാക്കിയിരുന്നു.
ഓപ്പറേഷന് ദര്ശന് കൊഴുക്കുന്നു. മകരവിളക്കിനു മുന്പായി ഇരുപതോളം പേരെങ്കിലും എത്തിയേക്കുമെന്നാണു സൂചന.
യുവതികളെ സംബന്ധിച്ച കൂടുതല് വിവരങ്ങള് ശേഖരിച്ചുവരികയാണെന്നു പോലീസ് അറിയിച്ചു. കഴിഞ്ഞ ദിവസങ്ങളില് കൂടുതല് യുവതികള് ദര്ശനം നടത്തിയെന്ന വിവരം മുഖ്യമന്ത്രിയുടെ ഓഫീസും സ്ഥിരീകരിച്ചു. ഇവരുടെ സുരക്ഷ മാനിച്ചാണു വിവരങ്ങള് പുറത്തുവിടാത്തതെന്നാണ് അധികൃതര് പറയുന്നത്. യുവതികളുടെ ശബരിമല ദര്ശനം സംബന്ധിച്ച വിവരം 22ന് സുപ്രീംകോടതിയില് സര്ക്കാര് നല്കുന്ന റിപ്പോര്ട്ടില് വിശദമാക്കും.യുവതികള്ക്കു സുരക്ഷ നല്കുന്ന പോലീസുകാര് അയ്യപ്പവേഷത്തിലാണ് ഇവരെ അനുഗമിക്കുന്നത്. പോലീസ് വേഷത്തില് സുരക്ഷ ഒരുക്കുന്പോള് പെട്ടന്നു തിരിച്ചറിയപ്പെടുന്നത് ഒഴിവാക്കുന്നതിന്റെ ഭാഗമായാണ് ഈ നീക്കം. തന്ത്രപരമായാണ് പോലീസിന്റെ നീക്കം.
എന്നാല്, പ്രതിഷേധങ്ങള്ക്കു വഴിയൊരുക്കിക്കൊണ്ടു സംരക്ഷണമൊരുക്കേണ്ടതില്ലെന്ന നിലപാടും ഉന്നത പോലീസ് ഉദ്യോഗസ്ഥര്ക്കുണ്ട്. ശബരിമലയില് എത്തിയ സ്ത്രീകളുടെ പേരും വയസും ഉള്പ്പടെയുള്ള വിവരങ്ങള് വ്യക്തമാക്കിയാകും സുപ്രീംകോടതിയില് റിപ്പോര്ട്ട് സമര്പ്പിക്കുക. സുപ്രീംകോടതി വിധിയുടെ അടിസ്ഥാനത്തില് ശബരിമലയില് യുവതികള്ക്ക് സര്ക്കാര് പ്രവേശനത്തിനു സൗകര്യമൊരുക്കിയെന്നും കോടതിയെ അറിയിക്കും. കൂടുതല് സ്ത്രീകള് ശബരിമലയിലെത്തിയെന്നതു സംബന്ധിച്ച സൂചനകള് ദേവസ്വം മന്ത്രി കടകംപള്ളി സുരേന്ദ്രനും പ്രകടിപ്പിച്ചു. ഇക്കാര്യത്തില് പോലീസ് നിലപാടിനെ അനുകൂലിച്ചാണു മന്ത്രി അഭിപ്രായം നടത്തിയത്.
https://www.facebook.com/Malayalivartha
