ശ​ബ​രി​മ​ല വിഷയത്തില്‍ അക്രമങ്ങളോടനുബന്ധിച്ച്‌ കേരള സര്‍ക്കാരിനെ പിരിച്ചുവിട്ട് രാ​ഷ്ട്ര​പ​തി ഭ​ര​ണം ഏ​ര്‍​പ്പെ​ടു​ത്ത​ണ​മെ​ന്ന ബി​ജെ​പിയുടെ ആവശ്യം വെ​റും മ​ണ്ട​ത്ത​ര​മെ​ന്ന് കോ​ണ്‍​ഗ്ര​സ് എ​ഐ​സി​സി ജ​ന​റ​ല്‍ സെ​ക്ര​ട്ട​റി കെ.​സി. വേ​ണു​ഗോ​പാ​ല്‍. ലോ​ക്സ​ഭ​യി​ല്‍ ബി​ജെ​പി ഉന്നയിച്ച ആവശ്യം രാ​ഷ്ട്രീ​യ മു​ത​ലെ​ടു​പ്പ് ലക്ഷ്യമിട്ടാണെന്നും വേ​ണു​ഗോ​പാ​ല്‍ കുറ്റപ്പെടുത്തി.

അക്രമത്തിലൂടെയല്ല ശബരിമല വിഷയത്തിന് പരിഹാരമുണ്ടാകേണ്ടത്. അക്രമസമരങ്ങളോട് കേരള സമൂഹത്തിന്റെ പിന്തുണയില്ലെന്നും അദ്ദേഹം പറഞ്ഞു. ശബരിമല വിഷയത്തിന് ആത്യന്തികമായി പരിഹാരം ഉണ്ടാകണമെങ്കില്‍ നിയമനിര്‍മ്മാണം നടത്തുകയാണ് വേണ്ടത്. എന്നാല്‍ ഇക്കാര്യത്തെ പറ്റി ബിജെപി ഒരക്ഷരം മിണ്ടുന്നില്ല. സംസ്ഥാനത്ത് ആക്രമണം നടത്തി രാഷ്ട്രീയ മുതലെടുപ്പ് നടത്താനാണ് ബിജെപിയും സിപിഎമ്മും ശ്രമിക്കുന്നതെന്നും കെസി വേണുഗോപാല്‍ മാധ്യമങ്ങളോട് പറഞ്ഞു.

കേരളത്തില്‍ പിണറായി സര്‍ക്കാരിനെ പിരിച്ചുവിട്ട് രാഷ്ട്രപതി ഭരണം ഏര്‍പ്പെടുത്തണമെന്ന് ബിജെപി പാര്‍ലമെന്റില്‍ ആവശ്യപ്പെട്ടിരുന്നു. സംസ്ഥാനത്തെ സിപിഎം അക്രമത്തെക്കുറിച്ച്‌ ജുഡീഷ്യല്‍ അന്വേഷണം നടത്തണമെന്നും ബിജെപി ആവശ്യപ്പെട്ടു. ഝാര്‍ഖണ്ഡില്‍നിന്നുള്ള അംഗം നിഷികാന്ത് ദുബൈയാണ് വിഷയം ലോക്‌സഭയില്‍ ഉന്നയിച്ചത്.

ശബരിമല വിധിയെത്തുടര്‍ന്ന് കേരളത്തിലുണ്ടായ രാഷ്ട്രീയ സംഘര്‍ഷങ്ങള്‍ ദേശീയ തലത്തില്‍ ചര്‍ച്ചയാക്കാന്‍ ബിജെപി ഒരുങ്ങുന്നതായി നേരത്തെ റിപ്പോര്‍ട്ടുകളുണ്ടായിരുന്നു. ഈ പശ്ചാത്തലത്തിലാണ് ഇക്കാര്യം പാര്‍ലമെന്റില്‍ ഉന്നയിച്ചിരിക്കുന്നത്. സംസ്ഥാനത്ത് ഭരണത്തിന്റെ മറവില്‍ സിപിഎം വ്യാപകമായി അക്രമം നടത്തുകയാണെന്നാണ് ബിജെപിയുടെ ആരോപണം. കേരളത്തില്‍ ബിജെപിയുടെ സ്വാധീനം കൂടുന്നത് സിപിഎമ്മിനെ ഭയപ്പെടുത്തുന്നതായി നിഷികാന്ത് ദുബെ പറഞ്ഞു. ത്രിപുരയിലേതു പോലെ കേരളത്തില്‍ ബിജെപി അധികാരത്തിലെത്തുമോയെന്ന ഭയമാണ് സിപിഎമ്മിന്. ഇതുകൊണ്ടാണ് വ്യാപകമായി അക്രമം നടത്തുന്നതെന്ന് ദുബെ ആരോപിച്ചു.

അതേസമയം സംസ്ഥാനത്ത് ക്രമസമാധാന നില തകര്‍ന്നെങ്കിലും രാഷ്ട്രപതി ഭരണത്തിന്റെ ആവശ്യമില്ലെന്ന് കെപിസിസി അധ്യക്ഷന്‍ മുല്ലപ്പള്ളി രാമചന്ദ്രന്‍ പറഞ്ഞു. കേരളത്തില്‍ കേന്ദ്രം ഇടപെടേണ്ട സാഹചര്യം ഇല്ലെന്നും ബിജെപിയുടേത് അതിമോഹമാണെന്നും മുല്ലപ്പള്ളി രാമചന്ദ്രന്‍ പറഞ്ഞു.

കേരളത്തില്‍ രാഷ്ട്രപതിഭരണം എന്ന ബിജെപി ആവശ്യത്തിനെതിരെ പ്രതിപക്ഷ നേതാവ് രമേശ് ചെന്നിത്തലയും രംഗത്ത് വന്നു . കേരളത്തില്‍ രാഷ്ട്രപതി ഭരണത്തിന്റെ ആവശ്യമില്ലെന്നും രണ്ടു വര്‍ഷം കഴിഞ്ഞാല്‍ പിണറായി സര്‍ക്കാരിനെ ജനങ്ങള്‍ ബാലറ്റിലൂടെ തന്നെ പുറത്താക്കുമെന്നും ചെന്നിത്തല പറഞ്ഞു. ലോക്സഭയില്‍ അക്കാര്യം പറഞ്ഞത് കേരളത്തെ പറ്റി അറിയാത്ത എംപിയാണ്. കോണ്‍ഗ്രസ് വക്താക്കളുടെ പ്രതികരണങ്ങള്‍ ശബരിമല വിഷയത്തില്‍ കാര്യങ്ങള്‍ അറിയാതെയാണെന്ന് ചെന്നിത്തല പറഞ്ഞു. ഹൈക്കമാന്റില്‍ നിരവധി വക്താക്കള്‍ ഉണ്ട്. അവര്‍ ശബരിമല വിഷയത്തില്‍ കാര്യങ്ങള്‍ അറിയാതെ സംസാരിക്കുകയാണ്. പക്ഷെ മുഖ്യ വക്താവ് രന്‍ദീപ് സുര്‍ജേവാല പറഞ്ഞതാണ് പാര്‍ട്ടി നിലപാട്. താന്‍ കൊണ്ടുവന്ന ഹര്‍ത്താല്‍ നിയന്ത്രണ ബില്‍ ഹൈക്കോടതി പരിഗണിക്കണമെന്നും ഹര്‍ത്താലുകള്‍ മുഴുവനായി നിരോധിക്കരുതെന്നും ഹര്‍ത്താല്‍ ഹൈക്കോടതി ഇടപെടലില്‍ ചെന്നിത്തല പറഞ്ഞു. എന്നാല്‍ നിയന്ത്രണം വേണമെന്നും അദ്ദേഹം കൂട്ടിച്ചേര്‍ത്തു.