വര്‍ഗീയവാദികള്‍ കൊലചെയ്ത എസ്.എഫ്.ഐ നേതാവും എറണാകുളം മഹാരാജാസ് കോളജിലെ വിദ്യാര്‍ത്ഥിയുമായ അഭിമന്യുവിന്റെ കുടുംബത്തിനായി പണി കഴിപ്പിച്ച വീടിന്റെ താക്കോല്‍ 14 ന് മുഖ്യമന്ത്രി പിണറായി വിജയന്‍ കൈമാറും. മാതാപിതാക്കളുടെ സംരക്ഷണത്തിനായി സമാഹരിച്ച കുടുംബസഹായ നിധിയും മുഖ്യമന്ത്രി നല്‍കും. നാല്‍പ്പത്‌ലക്ഷത്തോളം രൂപ ചെലവഴിച്ചാണ് സ്ഥലം വാങ്ങി വീട് പൂര്‍ത്തിയാക്കിയത്. ഇപ്പോള്‍ താമസിക്കുന്ന വീടിന് അരക്കിലോമീറ്റര്‍ അകലെയാണ് പുതിയ വീട്.

എസ്എഫ്‌ഐ ഇടുക്കി ജില്ലാ കമ്മിറ്റിയംഗമായിരുന്ന അഭിമന്യുവിനെ 2018 ജൂലൈ രണ്ടിന് എറണാകുളം മഹാരാജാസ് കോളേജില്‍ എസ്ഡിപിഐ- ക്യാമ്പസ് ഫ്രണ്ട് പ്രവര്‍ത്തകര്‍ മൃഗീയമായി കൊലപ്പെടുത്തുകയായിരുന്നു. അഭിമന്യുവിന്റെ കുടുംബത്തിന്റെ സംരക്ഷണം സിപിഐ എം ഏറ്റെടുക്കുമെന്ന് അന്നുതന്നെ പ്രഖ്യാപിച്ചിരുന്നു. ഇതിനായി ബഹുജനങ്ങളില്‍ നിന്നും സമാഹരിച്ച പണം ഉപയോഗിച്ച് കൊട്ടാക്കാമ്പൂരില്‍ വാങ്ങിയ പത്തര സെന്റിലാണ് എല്ലാവിധ സൗകര്യങ്ങളോടും കൂടിയ വീട് നിര്‍മിച്ചിരിക്കുന്നത്.

വീട് കൈമാറുമ്പോഴും കേസില്‍ ഇതുവരെ പ്രതികളെ മുഴുവനും പിടികൂടാന്‍ പൊലീസിനായില്ല. അതില്‍ കുടുംബത്തിന് അതൃപ്തിയുണ്ട്. മന്ത്രി എം എം മണി, സിപിഐ എം എറണാകുളം ജില്ലാ സെക്രട്ടറി സി എന്‍ മോഹനന്‍, ഇടുക്കി ജില്ലാ സെക്രട്ടറി കെ കെ ജയചന്ദ്രന്‍, സംസ്ഥാന കമ്മിറ്റി അംഗങ്ങളായ ഗോപി കോട്ടമുറിക്കല്‍, കെ പി മേരി, ജില്ലാ സെക്രട്ടറിയറ്റംഗം കെ വി ശശി, എസ് രാജേന്ദ്രന്‍ എംഎല്‍എ, എസ്എഫ്‌ഐ അഖിലേന്ത്യാ പ്രസിഡന്റ് വി പി സാനു, സംസ്ഥാന സെക്രട്ടറി കെ എം സച്ചിന്‍ ദേവ്, പ്രസിഡന്റ് വി എ വിനീഷ് എന്നിവര്‍ പങ്കെടുക്കും.