ശബരിമലയില്‍ മകരവിളക്കിനു മുന്നോടിയായി എല്ലാ കേന്ദ്രങ്ങളിലും കനത്തസുരക്ഷയൊരുക്കി പൊലീസും ജില്ലഭരണകൂടങ്ങളും. ഈമാസം 14നാണ് മകരവിളക്കെങ്കിലും നടയടക്കുന്ന 20വരെ സുരക്ഷാസംവിധാനങ്ങള്‍ തുടരും. എരുമേലി, കാനനപാതകള്‍, നിലക്കല്‍, പമ്പ, സന്നിധാനം, മകരവിളക്ക് ദര്‍ശിക്കാന്‍ തീര്‍ഥാടകര്‍ തിങ്ങിക്കൂടുന്ന പുല്ലുമേട്, പരുന്തുംപാറ, പാഞ്ചാലിമേട് എന്നിവിടങ്ങളിലാണ് സുരക്ഷ ശക്തമാക്കിയത്. ജനുവരി പത്തിന് നടക്കുന്ന എരുമേലി ചന്ദനക്കുടത്തിനും 11ന് നടക്കുന്ന അമ്പലപ്പുഴ ആലങ്ങാട് സംഘങ്ങളുടെ പേട്ടകെട്ടിനും സുരക്ഷ ശക്തമാക്കി.
രണ്ടുദിവസങ്ങളിലും ഇവിടെ കൂടുതല്‍ ജാഗ്രതപാലിക്കണമെന്നാണ് നിര്‍ദേശം. വാവരുപള്ളിക്കും സുരക്ഷ വര്‍ധിപ്പിച്ചു. ഇവിടങ്ങളില്‍ സുരക്ഷ വര്‍ധിപ്പിക്കണമെന്ന് രഹസ്യാന്വേഷണ വിഭാഗവും റിപ്പോര്‍ട്ട് നല്‍കിയിട്ടുണ്ട്. കോട്ടയം, പത്തനംതിട്ട, ഇടുക്കി ജില്ലഭരണകൂടങ്ങളുടെ നേതൃത്വത്തിലാകും ക്രമീകരണം. 3500ലധികം പൊലീസുകാരെയാകും ആകെ വിന്യസിക്കുക. കഴിഞ്ഞ വര്‍ഷം 1400 പൊലീസുകാരെയാണ് മകരവിളക്ക് സമയത്ത് പുല്ലുമേട്, സത്രം, വണ്ടിപ്പെരിയാര്‍ എന്നിവിടങ്ങളില്‍ നിയോഗിച്ചിരുന്നത്. ഇക്കുറി 500600 പേരെക്കൂടി വിന്യസിക്കും. മകരവിളക്ക് സമയത്ത് പുല്ലുമേട് വഴി യുവതികള്‍ വന്നേക്കുമെന്ന റിപ്പോര്‍ട്ടിനെ തുടര്‍ന്നാണിത്.
കാനനപാതകളിലും പ്രതിഷേധ സാധ്യത പൊലീസ് തള്ളുന്നില്ല. കാനനപാതകളിലും സുരക്ഷ ഒരുക്കിയിട്ടുണ്ട്. ജില്ല പൊലീസ് മേധാവികള്‍ക്കൊപ്പം കലക്ടര്‍മാരുടെ നേരിട്ടുള്ള നിയന്ത്രണവും ഉണ്ടാകും. ആര്‍.ഡി.ഒമാരും തഹസില്‍ദാര്‍മാരും സ്ഥലത്തുണ്ടാകും. യുവതി പ്രവേശനമടക്കമുള്ള ഏതുസാഹചര്യത്തിലും അത് തീര്‍ഥാടകര്‍ക്ക് ബുദ്ധിമുട്ടുണ്ടാക്കരുതെന്നാണ് കര്‍ശന നിര്‍ദേശം എരുമേലിയില്‍ ഇടമുറിയാതെ പേട്ടതുള്ളല്‍ നടക്കുകയാണ്. സന്നിധാനത്ത് മാത്രം ലക്ഷത്തിലേറെ പേര്‍ പ്രതിദിനം ദര്‍ശനത്തിനെത്തുന്നുണ്ട്. പാര്‍ക്കിങ്ങിനും മറ്റും കൂടുതല്‍ സംവിധാനം ഏര്‍പ്പെടുത്തും. കുടിവെള്ളം, വെളിച്ചം, വൈദ്യസഹായം എന്നിവയും ഉറപ്പാക്കി.