ശബരിമല വിഷയത്തില്‍ സി.പി.എമ്മിന് വിശ്വാസികളുടെ പിന്തുണയുണ്ടെന്ന് മുഖ്യമന്ത്രി പിണറായി വിജയന്‍. നവോത്ഥാന കാഴ്ചപ്പാട് മുന്നോട്ട് വെക്കുന്ന മതേതര സമൂഹം ഗുരുതരമായ വെല്ലുവിളികള്‍ നേരിടുകയാണ്. ശബരിമല വിഷയത്തിലെ ബി.ജെ.പി സമരം വിജയിച്ചില്ലെന്ന് അവര്‍ തന്നെ സമ്മതിച്ചിട്ടുണ്ടെന്നും പിണറായി പറഞ്ഞു. ശബരിമല വിഷയത്തില്‍ 1991ലെ ഹൈക്കോടതി വിധി നിയമപരമായിരുന്നില്ല. ഇതാണ് സുപ്രീംകോടതി തിരുത്തിയത്.
കോടതിക്കെതിരെ നീങ്ങാന്‍ കഴിയാത്തതിനാലാണ് സര്‍ക്കാറിനെതിരെ നീങ്ങുന്നത്. ഹിന്ദുമുസ്‌ലിം ധ്രൂവീകരണമുണ്ടാക്കാന്‍ ചിലര്‍ ശ്രമിക്കുന്നുണ്ടെന്നും മുഖ്യമന്ത്രി കുറ്റപ്പെടുത്തി. സുപ്രീംകോടതി വിധി സ്ത്രീകളുടെ മുന്നേറ്റത്തിനാണ്. ഈ വിധിയെ ചില സ്ത്രീകള്‍ എതിര്‍ക്കുകയാണെന്നും പിണറായി പറഞ്ഞു. ശബരിമല പ്രശ്‌നം പരിഹരിക്കാന്‍ ചര്‍ച്ചക്ക് തയ്യാറാണെന്ന് പന്തളം കൊട്ടാരം വ്യക്തമാക്കിയതിന് പിന്നാലെ യൂണിവേഴ്‌സിറ്റി കോളജില്‍ നടന്ന സെമിനാറിലാണ് പിണറായി വിജയന്‍ നിലപാട് വ്യക്തമാക്കിയത്.