ശബരിമലയില്‍ ദര്‍ശനം നടത്തിയെന്ന്‌ അവകാശവാദം ഉന്നയിച്ച കൊല്ലം ചാത്തന്നൂര്‍ സ്വദേശിയും കെ.ഡി.എഫ്‌. വനിതാ വിഭാഗം നേതാവുമായ മഞ്‌ജുവിന്റെ വീടിനുനേരേ വീണ്ടും ആക്രമണം. കഴിഞ്ഞ ദിവസം രാത്രി പത്തോടെയാണു ചാത്തന്നൂരുള്ള മഞ്‌ജുവിന്റെ വീടിനു നേരേ കല്ലേറുണ്ടായത്‌. കല്ലെറിയുന്ന ശബ്‌ദംകേട്ടു പുറത്തിറങ്ങവെ തന്റെ കഴുത്തിലും കല്ലു പതിച്ചെന്നു മഞ്‌ജു പറഞ്ഞു. മഞ്‌ജുവിന്റെ സുരക്ഷയ്‌ക്കായി നിയോഗിച്ചിരുന്ന രണ്ടു പോലീസുകാരും ആക്രമണം നടക്കുമ്പോള്‍ സ്‌ഥലത്തുണ്ടായിരുന്നു. വീടിനു സമീപം ആള്‍ത്താമസമില്ലാത്ത മറ്റൊരു വീടുണ്ട്‌. ഈ ഭാഗത്തുനിന്നാണു കല്ലെറിഞ്ഞതെന്നു മഞ്‌ജു പോലീസിനു നല്‍കിയ മൊഴിയില്‍ പറയുന്നു. കൂടുതല്‍ പോലീസ്‌ സ്‌ഥലത്തെത്തി അന്വേഷണം തുടങ്ങി.

കൂടുതല്‍ പൊലീസ് സ്ഥലത്തെത്തി അന്വേഷണം തുടങ്ങി. ആദ്യം ശബരിമല ദര്‍ശനം നടത്താന്‍ ശ്രമിച്ചു പരാജയപ്പെട്ടപ്പോള്‍ വീടിനു നേരേ ആക്രമണം നടന്നിരുന്നു. രണ്ടാമത്തെ തവണ മുടി നരപ്പിച്ചു വേഷം മാറി ശബരിമലയില്‍ ദര്‍ശനം നടത്തിയെന്നു മഞ്ജു അവകാശപ്പെട്ടിരുന്നു. ഇതു സംബന്ധിച്ച മൂന്നു വീഡിയോ ദൃശ്യങ്ങളും നവോത്ഥാന കേരളം ശബരിമലയിലേക്ക് എന്ന ഫേസ്‌ബുക്ക് പേജിലൂടെ പുറത്തുവിട്ടിരുന്നു. എന്നാല്‍, പൊലീസോ ദേവസ്വം ബോര്‍ഡോ ഇക്കാര്യം സ്ഥിരീകരിച്ചിരുന്നില്ല.

ദളിത് മഹിളാ ഫെഡറേഷന്‍ നേതാവാണ് മഞ്ജു. ക്ഷേത്രസന്നിധിയിലൂടെ നടന്നുപോകുന്ന വീഡിയോ സഹിതം, നവോത്ഥാന കേരളം ശബരിമലയിലേക്ക് എന്ന ഫേസ്‌ബുക്ക് ഗ്രൂപ്പിലൂടെയാണ് ഇവര്‍ വിവരം പുറത്തുവിട്ടത്. നവോത്ഥാന കേരളം ശബരിമലയിലേക്ക് സമൂഹ മാധ്യമ കൂട്ടായ്മയുടെ നേതൃത്വത്തില്‍ ദലിത് പ്രവര്‍ത്തക മഞ്ജു ജനുവരി എട്ടിന്‌രാവിലെ 7 .30 ന് ശബരിമല സന്ദര്‍ശിച്ച ചിത്രങ്ങള്‍ ഞങ്ങള്‍ പുറത്തു വിടുന്നു..' എന്ന കുറിപ്പോടെയാണ് വീഡിയോ പോസ്റ്റ് ചെയ്തിരിക്കുന്നത്.നേരത്തെ തുലാമാസ പൂജയുടെ നാലാം ദിവസം ശബരിമലയില്‍ ക്ഷേത്ര ദര്‍ശനത്തിനെത്തിയ മഞ്ജുവിന് നേരെ പ്രതിഷേധമുയര്‍ന്നിരുന്നു. പമ്ബയും പരിസരവും സംഘര്‍ഷഭരിതമായതിനെ തുടര്‍ന്ന് അന്ന് മഞ്ജു പിന്‍വാങ്ങുകയായിരുന്നു. തുടര്‍ന്ന് മഞ്ജുവിന്റെ വീടിനു നേരേ പ്രതിഷേധക്കാര്‍ ആക്രമണം നടത്തിയിരുന്നു.