ശബരിമല അയ്യപ്പനെ അപമാനിച്ച് ഫെയിസ്ബുക്ക് പോസ്റ്റിട്ട സംവിധായകന് പ്രിയനന്ദനെതിരെ കേസ് എടുക്കാത്ത പൊലീസ് നടപടിയില് ഹൈക്കോടതി വിശദീകരണം തേടി, ആലപ്പുഴ സ്വദേശി കെ.എ.അഭിജിത്തണ് ഹര്ജി നല്കിയത്
ശബരിമല അയ്യപ്പനെ അപമാനിച്ച് ഫെയിസ്ബുക്ക് പോസ്റ്റിട്ട സംവിധായകന് പ്രിയനന്ദനെതിരെ കേസ് എടുക്കാത്ത പൊലീസ് നടപടിയില് ഹൈക്കോടതി വിശദീകരണം തേടി. ആലപ്പുഴ സ്വദേശി കെ.എ.അഭിജിത്തണ് ഹര്ജി നല്കിയത്. പോസ്റ്റ് ഹൈന്ദവ വിശ്വാസികളെ അപകീര്ത്തിപ്പെടുത്തുന്നതാണെന്ന് കാട്ടി പൂച്ചാക്കല് പൊലീസില് പരാതി നല്കിയെങ്കിലും കേസ് എടുക്കാന് തയ്യാറായില്ലെന്ന് ഹര്ജിക്കാരന് ആരോപിക്കുന്നു. സൈബര് നിയമം ഉള്പ്പെടുന്ന കേസായതിനാല് പ്രത്യേക സംഘത്തെ നിയമിക്കണമെന്നും ഹര്ജിക്കാരന് ആവശ്യപ്പെട്ടു. സ്വാമി അയ്യപ്പനെതിരെ സംസ്കാരശൂന്യമായ ഭാഷയിലാണ് പ്രിയനന്ദന് പോസ്റ്റിട്ടത്. സംഭവം വിവാദമായതോടെ നീക്കം ചെയ്തെങ്കിലും തന്റെ നിലപാടില് ഉറച്ചുനില്ക്കുന്നതായി അദ്ദേഹം വ്യക്തമാക്കിയിരുന്നു.
ഇതോടെ ആര്.എസ്.എസും ബി.ജെ.പിയും ശബരിമല കര്മസമിതിയും മതനിന്ദ ആരോപിച്ച് സംവിധായകനെതിരെ രംഗത്തെത്തി. പൊലീസ് സുരക്ഷയില്ലാതെ വീടിന് വെളിയില് ഇറങ്ങാന് കഴിയില്ലെന്ന് ബി.ജെ.പി സംസ്ഥാന ജനറല് സെക്രട്ടറി ബി. ഗോപാലകൃഷ്ണന് ഭീഷണിപ്പെടുത്തി. എന്ത് വന്നാലും നിലപാടില് മാറ്റമില്ലെന്നും കൊല്ലാമെങ്കില് കൊന്നോളൂ ഭീഷണിയെ ഭയക്കുന്നില്ലെന്നും താന് വീട്ടില് തന്നെയുണ്ടെന്നും പ്രിയനന്ദന് മറുപടിയും നല്കിയിരുന്നു. ഏതാനും ദിവസങ്ങള്ക്ക് ശേഷം ആര്.എസ്.എസ് പ്രവര്ത്തകന് പ്രിയനന്ദനന്റെ ദേഹത്ത് ചാണകവെള്ളമൊഴിച്ചു. വല്ലച്ചിറയില് പ്രിയനന്ദന്റെ വീടിനടുത്തുള്ള കടയുടെ മുന്നിലായിരുന്നു ആക്രമണം. അയ്യപ്പനെ അപമാനിച്ചതിന്റെ ശിക്ഷയാണെന്ന് ആക്രോശിച്ച് മര്ദ്ദിച്ച ശേഷമാണ് ചാണകവെള്ളം ഒഴിച്ചത്. അക്രമിയായ തൃശൂര് വല്ലച്ചിറ സ്വദേശിയായ സരോവറിനെ കൊടുങ്ങല്ലൂരില് നിന്നാണ് പൊലീസ് അറസ്റ്റ് ചെയ്തത്.
പ്രിയനന്ദന്റെ പരാതിയെ തുടര്ന്നാണ് സരോവറിനെ അറസ്റ്റ് ചെയ്തത്. സരോവര് തനിക്കറിയാവുന്ന ബിജെപി പ്രവര്ത്തകനാണെന്ന് പ്രിയനന്ദന് മൊഴി നല്കിയിരുന്നു. മര്ദ്ദനത്തില് പ്രിയനന്ദനന്റെ ചെവിക്ക് പരിക്കേറ്റിരുന്നു. ഫേസ്ബുക്ക് പോസ്റ്റിന്റെ പേരില് സംഘപരിവാര് സംഘടനകള് നേരത്തെ പ്രതിഷേധവുമായി രംഗത്തെത്തിയിരുന്നു. സൈബര് ആക്രമണം നേരിടേണ്ടി വന്നതിനെ തുടര്ന്നാണ് ഫേസ്ബുക്ക് പോസ്റ്റ് പിന്വലിച്ചതെന്നും അദ്ദേഹം പറഞ്ഞിരുന്നു. എന്നാല് പോസ്റ്റിലെ ഭാഷ മോശമെന്ന് ബോദ്ധ്യപ്പെട്ടതുകൊണ്ടാണ് പോസ്റ്റ് പിന്വലിച്ചതെന്നും നിലപാടില് മാറ്റമില്ലെന്നും ഇതിന്റെ പേരില് മാപ്പ് പറയില്ലെന്നും നേരത്തെ പ്രിയനന്ദനന് വ്യക്തമാക്കിയിരുന്നു. ഇത് സംഘപരിവാര് ശക്തികളെ ഏറെ പ്രകോപിതരാക്കിയിരുന്നു.
പ്രിയനന്ദനെ ആക്രമിച്ചത് ആര്.എസ്.എസും ബി.ജെ.പിയും അല്ലെന്ന് ബി.ജെ.പി നേതാവ് ബി.ഗോപാലകൃഷ്ണന് വ്യക്തമാക്കിയിരുന്നു. പ്രിയനന്ദനെ ആക്രമിക്കണമെങ്കില് നേരത്തേ ആവാമായിരുന്നു. ഫേസ്ബുക്ക് പോസ്റ്റിന്റെ പേരില് അദ്ദേഹത്തിന്റെ വീട്ടിലേക്ക് ജനാധിപത്യ രീതിയില് പ്രതിഷേധ പ്രകടനം നടത്തിയിരുന്നു. അന്നത് പൊലീസ് തടഞ്ഞിരുന്നു. പോസ്റ്റിനെതിരെ പൊലീസില് പരാതി നല്കിയതിനെ തുടര്ന്ന് കേസ് രജിസ്റ്റര് ചെയ്തിരുന്നു. അതോടെ ബി.ജെ.പിയുടെ പ്രതിഷേധം അവസാനിച്ചെന്നും ഗോപാലകൃഷ്ണന് വ്യക്തമാക്കി. ഇപ്പോള് വീണ്ടും പരാതിയുമായെത്തിയ അഭിജിത്തിന് എന്തെങ്കിലും രാഷ്ട്രീയ താല്പര്യമുണ്ടോ എന്നും പൊലീസ് അന്വേഷിക്കുന്നുണ്ട്.
https://www.facebook.com/Malayalivartha
