പൊലീസിന് തലവേദനയായിരുന്ന, തിരുവനന്തപുരം നഗരത്തിലെ പ്രധാന മാല മോഷ്ടാവിനെ ട്രാഫിക് പൊലീസ് ഉദ്യോഗസ്ഥന് കുടുക്കി
പൊലീസിന് തലവേദനയായിരുന്ന, തിരുവനന്തപുരം നഗരത്തിലെ പ്രധാന മാല മോഷ്ടാവിനെ ട്രാഫിക് പൊലീസ് ഉദ്യോഗസ്ഥന് കുടുക്കി. ട്രാഫിക് പോലീസ് ഉദ്യോഗസ്ഥനായ ബിജുകുമാറിന്റെ സമയോചിത ഇടപെടലിലൂടെ നഗരത്തിലെ ധാരാളം മാലപൊട്ടിക്കല് കേസുകളിലെ പ്രതിയായ പൂജപ്പുര സ്വദേശി സജീവ് (38) ആണ് പിടിയിലായത്. സംഭവം ഇങ്ങനെയാണ്, ബുധനാഴ്ച രാവിലെ പൂജപ്പുരയില് വെച്ച് വൃദ്ധയോട് വഴി ചോദിച്ചെത്തിയ ബൈക്ക് യാത്രക്കാരന് അവരുടെ കഴുത്തിലുണ്ടായിരുന്ന മൂന്നു പവന് തൂക്കമുള്ള സ്വര്ണമാല പൊട്ടിച്ചു കടന്നു കളഞ്ഞു. വിവരം ഉടന് സിറ്റി പൊലീസ് കണ്ട്രോള് റൂമിലെത്തി. ഉടന് നഗരത്തിലെ എല്ലാ പൊലീസുകാര്ക്കും വയര്ലസ് സന്ദേശം പാഞ്ഞു.
മാല പൊട്ടിക്കുന്നത് സമീപത്തെ സി.സി.ടി.വി ക്യാമറയില് പതിഞ്ഞിരുന്നു. ദൃശ്യത്തില് നിന്നും മോഷ്ടാവിന്റെയും ബൈക്കിന്റെയും സൂചനകള് പൊലീസിന് ലഭിച്ചു. ആ വിവരവും വയര്ലസ് സൈറ്റിലൂടെ പൊലീസ് കണ്ട്രോള് റൂമില് നിന്നും എല്ലാ പൊലീസുകാര്ക്കും കൈമാറി. ബൈക്കിന്റെ നമ്പര് പ്ലേറ്റില് ഒരു നമ്പര് മായ്ച്ച് കളഞ്ഞിരുന്നു. മാത്രമല്ല പ്രതി ഹെല്മറ്റും ധരിച്ചിരുന്നതിനാല് പെട്ടെന്ന് കണ്ടെത്തുക ബുദ്ധിമുട്ടായിരുന്നു. പക്ഷെ, ഏതൊരു ക്രൈമിലും കുറ്റവാളി വിട്ട്പോകുന്നൊരു തെളിവ് കാണും. അത് കണ്ടെത്തുന്നതിലാണ് അന്വേഷണ ഉദ്യോഗസ്ഥന്റെ മിടുക്ക്. ആ മിടുക്ക് മ്യൂസിയം സ്റ്റേഷനു മുന്നില് ട്രാഫിക് ഡ്യൂട്ടിയിലായിരുന്ന ബിജു എന്ന ഉദ്യോഗസ്ഥന് കാണിച്ചുതന്നു. തന്റെ വയര്ലെസ് സെറ്റിലൂടെ സന്ദേശം കേട്ടപ്പോള് മുതല് ബിജു റോഡിലും പരിസരത്തും നിരീക്ഷണം നടത്തിയിരുന്നു. അതിന് ശേഷമാണ് പ്രതിയുടെയും ബൈക്കിന്റെയും സി.സി.ടി.വി ദൃശ്യങ്ങളും ലഭിച്ചത്. അതോടെ കാര്യങ്ങള് കുറേക്കൂടി എളുപ്പമായി.
വയര്ലെസ് സന്ദേശത്തില് അറിയിച്ച നമ്പരിലുള്ള ബൈക്ക് കനകക്കുന്നിന് സമീപം പാര്ക്ക് ചെയ്തിരിക്കുന്നതായി കണ്ടെത്തി. നമ്പരില് ക്രിതൃമം കാട്ടിയതിനാല് പ്രതിക്ക് രക്ഷപെടാനുള്ള വഴിയാകാം. അതൊകൊണ്ട് മണിച്ചിത്രത്താഴിട്ട് പൂട്ടണമെന്ന് തീരുമാനിച്ചു. വാഹനം പരിശോധിച്ചപ്പോള് പിന്നിലെ ടയറിന്റെ മുകളിലെ ക്രാഷ്ഗാര്ഡില് ഒരു ചിത്രം വരച്ചത് ശ്രദ്ധയില്പ്പെട്ടു. അതും സി.സി.ടി.വി ദൃശ്യവും പരിശോധിച്ചപ്പോള് ഒന്നാണെന്ന് മനസിലായി. അതോടെ വാഹനം നിരീക്ഷിച്ച ശേഷം മ്യൂസിയം പൊലീസില് വിവരം അറിയിച്ചു. അല്പനേരം കഴിഞ്ഞ് ബൈക്ക് എടുക്കാന് വന്ന യുവാവിനെ പൊലീസ് എത്തും വരെ ബിജു തടഞ്ഞു നിര്ത്തി. യുവാവുമായി സ്റ്റേഷനില് ചെന്ന പൊലീസ് വീണ്ടും സി.സി. ടി.വി ദൃശ്യം പരിശോധിച്ചു. മോഷ്ടാവ് അയാളാണെന്ന് ഉറപ്പാക്കുകയും ചെയ്തു.
ഇതിനിടെ ഷാഡോ പൊലീസെത്തുകയും മുമ്പ് നടന്നിട്ടുള്ള മാല മോഷണ കേസുകളിലും ഉള്പ്പെട്ടിരുന്ന പൂജപ്പുര സ്വദേശി സജീവ് (38) ആണെന്ന് സ്ഥിരീകരിക്കുകയും ചെയ്തു. പ്രതിയെ കണ്ടെത്തുന്നതിന് നിര്ണായക ഇടപെടല് നടത്തിയസിറ്റി ട്രാഫിക് പോലീസ് സ്റ്റേഷനിലെ സിവില് പോലീസ് ഓഫീസറായ ബിജുകുമാര് തിരുവല്ലം വണ്ടിത്തടം സ്വദേശിയാണ്. ബിജുകുമാറിനെ സിറ്റി പോലീസ് കമ്മീഷണര് അഭിനന്ദിച്ചു. വൃദ്ധയോട് ഇടവഴിയില് വെച്ച് വഴി ചോദിച്ച സജീവ് അവരുടെ കഴുത്തിലെ മാല വലിച്ച് പൊട്ടിച്ച ശേഷം ബൈക്കില് പോവുകയായിരുന്നു. സജീവിന്റെ കയ്യില് കടന്ന് പിടിച്ച വൃദ്ധ ബൈക്ക് മുന്നോട്ട് എടുത്തപ്പോള് റോഡില് വീഴുകയും ചെയ്തു. അവര് നിലവിളിച്ചെങ്കിലും പ്രദേശത്ത് ആരുമുണ്ടായിരുന്നില്ല. ദീര്ഘനാളായി വൃദ്ധയെ നിരീക്ഷിച്ച ശേഷമാണ് മോഷണം ആസൂത്രണം ചെയ്തെന്നാണ് വിവരം.
https://www.facebook.com/Malayalivartha
