കാറ്റിലും മഴയിലും തകർന്ന ദേവാലയം പുനർനിർമ്മിച്ച് യുവജന കൂട്ടായ്മ മാതൃകയാകുന്നു . കൊല്ലം കടയ്ക്കലിലെ ദർപ്പക്കാട് സ്ഥിതിചെയ്യുന്ന ബേദലഹേം ദേവാലയമാണ് ഇന്ത്യ ഇവാഞ്ചലിക്കൽ ലൂഥറൻ സഭയിലെ യുവജന കൂട്ടായ്മയായ ലൂഥറൻ യൂത്ത് ഫെലോഷിപ്പ് പുതുക്കി പണിതത്. കഴിഞ്ഞ പ്രളയകാലത്തെ മഴയിലാണ് ദേവാലയം പൂർണ്ണമായും നിലംപൊത്തിയത്. തുടർന്ന് പതിവായി നടത്തിവരാറുള്ള ആരാധനകൾ വിശ്വാസികളുടെ ഭവങ്ങളിൽ വച്ചാണ് നടത്തിയിരുന്നത്. പുതിയ ദേവാലയം പുതുക്കിപ്പണിയുന്നതിനുള്ള പണം വിശ്വാസികൾക്ക് കണ്ടെത്താൻ കഴിയാതെ വന്നതോടെയാണ് ഇന്ത്യ ഇവാഞ്ചലിക്കൽ ലൂഥറൻ സഭയിലെ യുവജന കൂട്ടായ്മയായ ലൂഥറൻ യൂത്ത് ഫെലോഷിപ്പ് നിർമ്മാണ പ്രവർത്തനങ്ങൾ ഏറ്റെടുത്തത്.

ലൂഥറൻ യൂത്ത് ഫെലോഷിപ്പ് പ്രമോട്ടറായാ റവ.സന്തോഷ് രാജിന്റെ നേതൃത്വത്തിൽ ഇരുന്നൂറോളം വരുന്ന യുവജനങ്ങളാണ് ദേവാലയം പുതുക്കി പണിതത്. പതിനെട്ടിനും നാല്പതിനും ഇടയിൽ പ്രായമുള്ള യുവജനങ്ങൾ നാല് മാസംകൊണ്ടാണ് നിർമ്മാണ പ്രവർത്തനങ്ങൾ പൂർത്തിയാക്കിയത്. തിരുവനന്തപുരം സിനഡിൽ ഉൾപ്പെടുന്ന വിവിധസഭകളിലെ യുവാക്കൾ സൗജന്യമായാണ് ദേവാലയത്തിന് വേണ്ടിയുള്ള നിമ്മാണപ്രവർത്തനങ്ങൾ ചെയ്തത്.

പുതുക്കിപ്പണിത ദേവാലയം റവ.വൈ ക്രിസ്റ്റഫർ പ്രതിഷ്ഠിച്ചു. വിവിധ സഭകളിൽ നിന്നായി അൻപതോളം പുരോഹിതന്മാരും വിശ്വാസികളും ആരാധനയിൽ പങ്കെടുത്തു.പ്രതിഷ്‌ഠ ആരാധനയ്ക്ക് മുൻമ്പായി ബാൻഡ് മേളത്തിന്റേയും ചിങ്കാരി മേളത്തിന്റേയും അകമ്പടിയോട്കൂടി റാലിയും സംഘടിപ്പിച്ചു.