ഇന്ന് മഹാശിവരാത്രി. നാടെങ്ങും പഞ്ചാക്ഷര മന്ത്രമുഖരിതമാണിന്ന്. ശിവക്ഷേത്രങ്ങളില്‍ പ്രത്യേക പൂജകളും വഴിപാടുകളും നടക്കും. ശിവരാത്രി വൃതവും ഏറെ പ്രശസ്തമാണ്. കുംഭമാസത്തിലെ കൃഷ്ണപക്ഷത്തിലെ പതിമൂന്നാം രാത്രിയും പതിനാലാം പകലുമാണ് ശിവരാത്രിയായി ആഘോഷിക്കുന്നത്. കാമ ക്രോധ ലോഭ മദമാത്സര്യങ്ങളെ ഉള്ളില്‍ നിന്ന് കഴുകിക്കളയാനുും ശുഭവും ശൈവ ചിന്തയിലും മനസ്സ് നിറയാനുമാണ് ശിവരാത്രി വൃതം അനുഷ്ഠിക്കുന്നത്.
ഉദ്ദിഷ്ട കാര്യ സിദ്ധിക്കും കുടംബത്തില്‍ ശാന്തിയും സമാധാനവും കൈവരുന്നതിനും സന്താന സൗഭാഗ്യത്തിനും മംഗല്യ ഭാഗ്യത്തിനുമൊക്കെയായി ഭക്തര്‍ ശിവരാത്രി വൃതമനുഷ്ഠിക്കുന്നു. പരമശിവനെ ഭര്‍ത്താവായി ലഭിക്കാന്‍ പാര്‍വ്വതി ദേവി ഉറക്കമിളച്ച് തപസ്സനുഷ്ഠിച്ച ദിവസമാണ് ശിവരാത്രിയെന്നും ശിവന്റെ ആദിയും അന്തവും കണ്ടെത്താന്‍ ബ്രഹ്മാവും വിഷ്ണുവും തര്‍ക്കമുണ്ടായ ദിവസമെന്നും ദേവാസുരന്മാര്‍ പാലാഴി കടഞ്ഞ പ്പോള്‍ ലഭിച്ച വാസുകിയുടെ ഉള്ളില്‍ നിന്ന് വമിച്ച കാളകൂട വിഷം ഭൂമിയില്‍ പതിക്കാതിരിക്കാന്‍ പരമേശ്വരന്‍ പാനം ചെയ്ത ദിവസമെന്നും ശിവരാത്രിയെ വിശേഷിപ്പിക്കുന്നു. ഈ ദിനത്തില്‍ ഉറക്കമിളച്ചും ഭക്ഷണമുപേക്ഷിച്ചും ഒരിക്കലുണ്ടുമെല്ലാം ഭക്തര്‍ ശിവരാത്രി വൃതമനുഷ്ഠിക്കുന്നു.

ഈ ദിവസം എല്ലാ ശിവക്ഷേത്രങ്ങളിലും വിശേഷാല്‍ പൂജകളും വഴിപാടുകളും നടക്കും.
ആലുവ മഹാക്ഷേത്രത്തിലുള്‍പ്പെടെ പിതൃതര്‍പ്പണകര്‍മ്മങ്ങള്‍ക്കും സൗകര്യമൊരുക്കും. ശിവരാത്രി വൃതം നോറ്റ് ശിവലിംഗത്തില്‍ അഭിഷേകവും കൂവളത്തിലകൊണ്ട് അര്‍ച്ചനയും നടത്തിയാല്‍ ആ ആത്മാവ് ശിവലോകം പൂകുമെന്നും വിശ്വാസമുണ്ട്‌