സ്വന്തമായി അച്ചടിച്ച നോട്ടുമായി വ്യാപാരസ്ഥാപനത്തിലെത്തിയ എത്തിയ സംഘം പിടിയിൽ. സിഗരറ്റ് വാങ്ങാനായാണ് സംഘം കടയിലെത്തിയത്. കുറ്റിച്ചല്‍, കോട്ടൂര്‍ സ്വദേശികളായ മൂന്നു യുവാക്കളെ നെയ്യാര്‍ ഡാം പൊലീസ് അറസ്റ്റു ചെയ്തത് .കുറ്റിച്ചൽ കള്ളോട് സ്വദേശി ഷാജഹാൻ, സഹായികളായ അർഷാദ്, കോട്ടൂർ സ്വദേശി സൗദ് എന്നിവരെയാണ് പോലീസ് പിടികൂടിയത്.

സിഗരറ്റ് വാങ്ങാന്‍ നല്‍കിയ നോട്ടില്‍ സംശയം തോന്നിയ കടയുടമയും നാട്ടുകാരും ചേർന്നാണ് കള്ളനോട്ടു നിര്‍മിച്ചു വിതരണം ചെയ്യുന്ന ഈ സംഘത്തെ കുടുക്കിയത്.

നെയ്യാർ ഡാംതുണ്ടുനടയിൽ വ്യാപാര സ്ഥാപനത്തിൽ സിഗരറ്റ് വാങ്ങുന്നതിനായി നല്‍കിയ നോട്ടില്‍ ഉടമക്കു സംശയം തോന്നുകയായിരുന്നു. തുടർന്ന് നാട്ടുകാരുമൊത്ത് ഇയാളെ തടഞ്ഞുവച്ചശേഷം പൊലീസിനെ അറിയിക്കുകയായിരുന്നു. തുടർന്ന് നടത്തിയ അന്വേഷണത്തില്‍ അച്ചടിച്ചു സൂക്ഷിച്ചിരുന്ന പത്തോളം നൂറിന്റെയും ഇരുന്നൂറിന്റെയും വ്യാജനോട്ടുകൾ കണ്ടെടുത്തു. ശേഷം നോട്ടുകൾ അച്ചടിക്കാനായി ഉപയോഗിച്ച മഷിയും പ്രിന്ററുകളും അനുബന്ധ സാധനങ്ങളും പോലീസ് പിടിച്ചെടുത്തു.

സംഘത്തെക്കുറിച്ചു വിശദമായ അന്വേഷണം നടത്തുമെന്നു പൊലീസ് അറിയിച്ചു. കൂടുതൽ പേര്‍ സംഘത്തിലുണ്ടോ എന്നും അന്വേഷിക്കും. മലയോര മേഖലയിൽ നാളുകളായി കള്ളനോട്ടു സംഘങ്ങൾ സജീവമാണ്. അടുത്തിടെ കാട്ടാക്കട സ്റ്റേഷൻ പരിധിയിൽ ചന്തയിൽ അഞ്ഞൂറിന്റെ കള്ളനോട്ടു മാറാൻ എത്തിയ സംഘത്തെ കച്ചവടക്കാർ തടഞ്ഞുവച്ച് പൊലീസിനു കൈമാറിയിരുന്നു.