സംസ്ഥാനത്ത് അടുത്തിടെയുണ്ടായ കര്‍ഷക ആത്മഹത്യകള്‍ നാളെ ചേരുന്ന മന്ത്രിസഭായോഗം പ്രത്യേകം ചര്‍ച്ച ചെയ്യും. പ്രളയം കര്‍ഷകര്‍ക്ക് ഇരുട്ടടി സമ്മാനിച്ച പശ്ചാത്തലത്തില്‍ കാര്‍ഷിക വായ്പകള്‍ക്ക് സര്‍ക്കാര്‍ മൊറട്ടോറിയം പ്രഖ്യാപിച്ചിരുന്നു.
എന്നാല്‍ സര്‍ക്കാര്‍ നിര്‍ദ്ദേശങ്ങള്‍ പാലിക്കാന്‍ തയാറാകാതെ ബാങ്കുകള്‍ ജപ്തി നടപടികളുമായി മുന്നോട്ടുപോകുന്നതാണ് കര്‍ഷകരെ സമ്മര്‍ദ്ദത്തിലാക്കാന്‍ കാരണമെന്നാണ് സര്‍ക്കാരിന്റെ വിലയിരുത്തല്‍.
നിലവിലെ സാഹചര്യത്തില്‍ എന്ത് നടപടി സ്വീകരിക്കാന്‍ കഴിയുമെന്നാകും ചൊവ്വാഴ്ചത്തെ മന്ത്രിസഭായോഗം പരിഗണിക്കുക. മുഖ്യമന്ത്രി ബാങ്കുകളുടെ യോഗം വിളിച്ചു ചേര്‍ക്കുന്ന കാര്യവും മന്ത്രിസഭായോഗം ചര്‍ച്ച ചെയ്യും.
അതേസമയം സംസ്ഥാനതല ബാങ്കേഴ്‌സ് സമിതിയുടെ യോഗവും ചൊവ്വാഴ്ച ചേരുന്നുണ്ട്. കാര്‍ഷിക വായ്പ സംബന്ധിച്ച വിഷയം ഈ യോഗത്തിലും ചര്‍ച്ചയാകും.