ഉത്സാവാഘോഷത്തിന്റെ ഭാഗമായി സംഘടിപ്പിച്ച റിമിടോമിയുടെ ഗാനമേളക്കിടെ കൂട്ടത്തല്ല്. കരുനാഗപ്പള്ളി തഴവ ശ്രീകൃഷ്ണ സ്വാമിയ ക്ഷേത്രത്തിലെ ഉത്സവാഘോഷ ചടങ്ങിനിടെ സംഘടിപ്പിച്ച ഗാനമേളയാണ് സംഘര്‍ഷത്തില്‍ അവസാനിച്ചത്. പത്താം ഉത്സവത്തോട് അനുബന്ധിച്ചാണ് ഗാനമേളയ്ക്കിടെയാണ് സംഘര്‍ഷമുണ്ടായത്. പ്രശസ്ത ഗായിക റിമി ടോമിയുടെ സംഘം നയിച്ച ഗാനമേളയ്ക്കിടെയാണ് സംഘര്‍ഷമുണ്ടായത്.

അതേ സമയം സംഘര്‍ഷ സ്ഥലത്തു നിന്നും ഗായിക റിമിടോമി ഓടി രക്ഷപ്പെട്ടു. തല്ല് മുറുകിയപ്പോഴാണ് റിമി അവിടെ നിന്നും പിന്‍വാങ്ങിയത്. യുവാവിനൊപ്പമുള്ള സംഘവും നാട്ടുകാരും രണ്ട് ചേരിതിരിഞ്ഞാണ് സംഘര്‍ഷമുണ്ടായത്. സംഘര്‍ഷത്തില്‍ ഗാനമേള സംഘത്തിന്റെ വാദ്യോപകരണങ്ങള്‍ക്കും നാശം വരുത്തിയിട്ടുണ്ട്.

'ചേമന്തിച്ചേലും കൊണ്ടേ' എന്ന ഗാനം ആലപിക്കുന്നതിനിടെ ഒരു യുവാവ് കാണികള്‍ക്കിടയിലൂടെ സ്റ്റേജില്‍ കയറിവന്ന് ഗായകനൊപ്പം നൃത്തം ചെയ്യുകയായിരുന്നു. ഇടയ്ക്ക് ഗായകന്റെ ചെവിയില്‍ യുവാവ് എന്തോ പറയുകയും ചെയ്തു. തുടര്‍ന്ന് യുവാവിനെ സ്റ്റേജില്‍ നിന്ന് സംഘാടകര്‍ ഇറക്കിവിടുന്നതിനിടെയാണ് സംഘര്‍ഷമുണ്ടായത്.

ദൂരദേശങ്ങളില്‍ നിന്നു പോലും നിരവധി ആളുകള്‍ കുടുംബസമേതവും അല്ലാതെയും പരിപാടി കാണാനെത്തിയിരുന്നു. ഗാനമേള നടക്കുന്നതിനിടെ പരിസരവാസിയായ യുവാവ് സ്റ്റേജില്‍ കയറി നൃത്ത ചുവട് വച്ചതോടെയാണ് സംഘര്‍ഷത്തിന് തുടക്കമായത്. യുവാവ് നൃത്തം ചെയ്യുന്നത് ഗാനം ആലപിച്ചുകൊണ്ടിരുന്നയാള്‍ വിലക്കി. എന്നാല്‍ അത് മറികടന്ന് യുവാവ് നൃത്തം തുടരുകയായിരുന്നു. ആവശ്യത്തിലധികം സ്റ്റേജില്‍ കേറ്റിയല്ലോ ചേട്ടാ… എന്ന് ഗായകന്‍ മൈക്കിലൂടെ വിളിച്ചുപറയുന്നുണ്ട്.

ഇതോടെ ഗാനമേള നിര്‍ത്തിവച്ചു. ഈ സമയം ഉത്സവ കമ്മിറ്റി അംഗങ്ങള്‍ സ്റ്റേജിലേക്ക് കടന്നു വരികയും യുവാവിനെ സ്റ്റേജില്‍ നിന്നും പിടിച്ചിറക്കുകയും ചെയ്തു. ഇതില്‍ പ്രകോപിതനായ യുവാവ് വീണ്ടും സ്റ്റേജിലേക്ക് ചാടി കയറുകയും കമ്മിറ്റി അംഗങ്ങളുമായി ഉന്തും തള്ളും ഉണ്ടാക്കുകയും ചെയ്തു.

കമ്മറ്റി അംഗങ്ങള്‍ യുവാവിനെ കൈവച്ചതോടെ ഒപ്പമുണ്ടായിരുന്ന മറ്റുള്ളവരെക്കൂടി യുവാവ് സ്റ്റേജിലേക്ക് വിളിച്ചു കയറ്റി. ഇതോടെ സംഭവം കൈവിട്ടുപോവുകയായിരുന്നു. യുവാവിനെയും സംഘത്തെയും കമ്മിറ്റിക്കാരും നാട്ടുകാരും ശരിക്ക് കുടഞ്ഞിരുന്നു. സംഘര്‍ഷം ഒരു വിധം അവസാനിച്ചപ്പോഴാണ് അതുവരെ സംഭവം കണ്ടു നിന്ന പൊലീസുകാര്‍ സ്റ്റേജിലേക്ക് പാഞ്ഞടുത്തത്. കരുനാഗപ്പള്ളി എസ്‌ഐ മഹേഷിന്റെ നേതൃത്വത്തിലുള്ള പൊലീസ് സംഘം സ്റ്റേജില്‍ കയറി നൃത്തം വച്ച യുവാവിനെയും സംഘത്തെയും അടിച്ചു നിലം പരിശാക്കി. പിന്നെ കമ്മറ്റി അംഗങ്ങളെയും തിരഞ്ഞു പിടിച്ച്‌ തല്ലി. ഇതോടെ ഗാനമേള കാണാനെത്തിയവര്‍ ചിതറി ഓടി. എങ്ങും നിലവിളിയും ഒച്ചപ്പാടുമായി.

ശബ്ദവും വെളിച്ചവും പ്രവര്‍ത്തിപ്പിച്ചു കൊണ്ടിരുന്ന ആളുകളോട് ലൈറ്റ് ഓഫ് ചെയ്യാന്‍ പൊലീസ് ആവശ്യപ്പെട്ടു. എന്നാല്‍ സ്റ്റേജിനു സമീപത്തല്ല ക്ഷേത്രത്തിനടുത്താണ് ഓഫ് ചെയ്യാനുള്ള യുണിറ്റ് എന്ന് പറഞ്ഞു. ഓഫ് ചെയ്തില്ലെങ്കില്‍ തല്ലി പൊട്ടിക്കും എന്ന് ഭീഷണി മുഴക്കിയപ്പോള്‍ എന്ത് വേണേലും ചെയ്‌തോ എന്നായി ഓപ്പറേറ്റര്‍. ലൈറ്റ് ഓഫ് ചെയ്യാത്തതിന്റെ കലിപ്പില്‍ സമീപത്തുണ്ടായിരുന്ന സാധനങ്ങളൊക്കെ പൊലീസ് തകര്‍ത്തു. പൊലീസ് ലാത്തി ചാര്‍ജില്‍ നിരവധി പേര്‍ക്ക് പരിക്കേറ്റു. സംഘര്‍ഷം ഉണ്ടാക്കിയവരെ മുഴുവന്‍ സ്ഥലത്ത് നിന്നും ഒഴിപ്പിച്ചതിന് ശേഷമാണ് പൊലീസ് പിന്‍ വാങ്ങിയത്.

'ചെക്കന്‍ അധികപ്പറ്റാണ് കാണിക്കുന്നതെന്നും, ഈ വഴക്കുണ്ടാക്കേണ്ട വല്ല ആവശ്യവുമുണ്ടോ എന്ന് കാണികളില്‍ ചിലര്‍ ചോദിക്കുകയും ചെയ്യുന്നുണ്ട്'. സംഭവത്തിന്റെ ദൃശ്യങ്ങള്‍ ഇതിരനോടകം വൈറലാകുന്നുണ്ട്. പത്ത് ലക്ഷം രൂപയുടെ നഷ്ടമുണ്ടായതായിട്ടാണ് ലഭിക്കുന്ന വിവരം. നാലു ലക്ഷം രൂപയ്ക്കായിരുന്നു ഗാനമേള നടത്തിയത്. പരിപാടി പകുതി ആകുന്നതിന് മുന്‍പായിരുന്നു സംഘര്‍ഷം തുടങ്ങിയത്.