രാജ്യത്ത് 20 രൂപയുടെ പുതിയ നാണയമിറക്കാൻ കേന്ദ്ര ധനകാര്യമന്ത്രാലയം തീരുമാനിച്ചു. പന്ത്രണ്ട് വശങ്ങളും കോണുകളുമുള്ള (dodecagon) രൂപത്തിലായിരിക്കും നാണയം. ഇതുമായി ബന്ധപ്പെട്ട് കേന്ദ്ര ധകാര്യമന്ത്രാലയത്തിന്റെ ഉത്തരവിറങ്ങി.

നോട്ടുകളെ അപേക്ഷിച്ച് നാണയങ്ങൾ ദീർഘകാലം നിലനില്‍ക്കും എന്നതിനാലാണ് നാണയം പുറത്തിറക്കാന്‍ ഒരുങ്ങുന്നതെന്ന് ആര്‍.ബി.ഐ വൃത്തങ്ങള്‍ അറിയിച്ചു. അതുകൊണ്ടുതന്നെ നാണയങ്ങൾ പുറത്തിറക്കുന്നത് ഇനിയും തുടരും. 27 മില്ലീ മീറ്റര്‍ നിളത്തിലുള്ള നാണയം നിലവിലുള്ള 10 രൂപ നാണയത്തില്‍ നിന്ന് വ്യത്യസ്തമായിരിക്കും. എന്നാല്‍ 10 രൂപ നാണയം പോലെ 20 രൂപ നാണയവും രണ്ട് നിറത്തിലാവും പുറത്തിറങ്ങുക.

നാണയത്തിന്റെ പുറത്തുള്ള വൃത്തം 65 ശതമാനം ചെമ്പും 15 ശതമാനം സിങ്കും 20 ശതമാനം നിക്കലും ഉപയോഗിച്ചാവും നിര്‍മിക്കുക. ഉള്ളിലെ വൃത്തത്തില്‍ 75 ശതമാനം ചെമ്പും 20 ശതമാനം സിങ്കും 5 ശതമാനം നിക്കലും ഉപയോഗിക്കും. നാണയത്തിന്റെ രൂപത്തെ കുറിച്ച് കൂടുതല്‍ സൂചനകളൊന്നും പുറത്തുവന്നിട്ടില്ല.

10 രൂപ നാണയം ഇറങ്ങി കൃത്യം 10 വര്‍ഷം കഴിയുന്ന സമയത്താണ് 20 രൂപ നാണയമിറക്കാന്‍ സര്‍ക്കാര്‍ തീരുമാനിക്കുന്നത്. 10വര്‍ഷം മുമ്പ് 2009 മാര്‍ച്ചിലായിരുന്നു നിലവിലുള്ള 10 രൂപയുടെ നാണയം ആര്‍.ബി.ഐ പുറത്തിറക്കിയത്. പിന്നീട് 13 പ്രാവശ്യം നാണയത്തിന്റെ പുതിയ പതിപ്പുകള്‍ പുറത്തിറങ്ങി. 14 തവണയായി പുറത്തിറങ്ങിയ നാണയങ്ങള്‍ തമ്മില്‍ വ്യത്യാസങ്ങള്‍ ഉണ്ടായിരുന്നത് ആളുകള്‍ക്കിടയിലും ആശങ്കയുണ്ടാക്കി. പിന്നീട് ഈ നാണയങ്ങളെല്ലാം തന്നെ നിയമപരമായി നിലനിൽക്കുമെന്ന് റിസർവ് ബാങ്ക് വ്യക്തമാക്കുകയായിരുന്നു.