നവജ്യോത് സിങ് സിദ്ധുവിനെ സിദ്ധിഖ് ആക്കി, എ.എന് രാധാകൃഷ്ണനെ ട്രോളുന്നു... ഉമ്മന്ചാണ്ടിയുടെ ട്വിറ്റര് സന്ദേശം പകര്ത്തി എഴുതി കൊണ്ടുവന്നു വായിച്ചപ്പോഴാണ് രാധാകൃഷ്ണന് അബദ്ധം പറ്റിയത്
ബി.ജെ.പിക്കാരുടെ തലയില് ആളില്ലെന്ന് പൊതുവേ സി.പി.എം പരിഹസിക്കാറുണ്ടെങ്കിലും ചില ബി.ജെ.പി നേതാക്കളുടെ പ്രസ്താവനകള് കാണുമ്പോള് അതിലെന്തോ ഇല്ലേയെന്ന് തോന്നിപ്പോകും. ബി.ജെ.പി സംസ്ഥാന ജനറല് സെക്രട്ടറി എ.എന് രാധാകൃഷ്ണന് വ്യാഴാഴ്ച രാവിലെ എറണാകുളത്ത് നടത്തിയ വാര്ത്താസമ്മേളനം പക്ഷെ, സി.പി.എമ്മിനല്ല, കോണ്ഗ്രസിന് ട്രോളാനുള്ള നല്ലൊരു വിഭവമാണ്. സംഭവം ഇങ്ങിനെയാണ്... ബി.ജെ.പിയുടെ പരിവര്ത്തന യാത്രയുടെ ഭാഗമായാണ് വാര്ത്താസമ്മേളനം വിളിച്ചത്. ഉമ്മന്ചാണ്ടിയുടെ ട്വിറ്റര് സന്ദേശം പകര്ത്തി എഴുതി കൊണ്ടുവന്നു വായിച്ചപ്പോഴാണ് രാധാകൃഷ്ണന് ആദ്യ മണ്ടത്തരം എഴുന്നള്ളിച്ചത്.
പാക് യുദ്ധവിമാനത്തെ തറപറ്റിച്ച ഇന്ത്യന് വിങ് കമാന്ഡര് അഭിനന്ദന്റെ മോചനവുമായി ബന്ധപ്പെട്ട ട്വിറ്റര് സന്ദേശത്തില് ഉമ്മന്ചാണ്ടി താങ്ക്സ് റ്റു സിദ്ധു എന്ന് കുറിച്ചിരുന്നു. സിദ്ധുവിനു ഇതിലെന്ത് കാര്യമെന്നും കോഴിക്കോട് ഡിസിസി പ്രസിഡന്റ് ടി. സിദ്ധിഖ് എന്തെങ്കിലും പറഞ്ഞാല് പാകിസ്ഥാന് കേള്ക്കണമെന്നുണ്ടോ എന്നുമായിരുന്നു രാധാകൃഷ്ണന്റെ ചോദ്യം. അത് കേട്ട് പത്രസമ്മേളനത്തിനെത്തിയ മാധ്യമപ്രവര്ത്തകര് പരസ്പ്പരം നോക്കി. പിന്നീടാണ് സംഗതിയുടെ കിടപ്പ് മനസിലായത്. കോണ്ഗ്രസ് നേതാവും മുന് ക്രിക്കറ്റ് താരവുമായ നവ്ജ്യോത് സിങ് സിദ്ധുവിനെയാണ് കോഴിക്കോഴ് ഡി.സി.സി പ്രസിഡന്റായ സിദ്ധിഖ് ആക്കിയത്.
സിദ്ധു കോണ്ഗ്രസ് നേതാവും പഞ്ചാബ് മന്ത്രിയുമാണെന്നറിയാതെ കോഴിക്കോട് ഡിസിസി പ്രസിഡന്റ് ടി.സിദ്ധിഖ് ആണെന്ന് തെറ്റിദ്ധരിച്ചാണ് രാധാകൃഷ്ണന് സ്വയം ട്രോളായി മാറിയത്. നേതാവിന്റെ മണ്ടത്തരം കേട്ട് മാധ്യമപ്രവര്ത്തകര് ചിരിയടക്കാന് പാട് പെടുമ്പോഴേക്കും അടുത്ത ചിരിക്കുള്ള വകയെത്തി. തൃപ്പൂണിത്തുറ ചോറ്റാനിക്കര ക്ഷേത്രത്തില് ഗുരുതി പൂജയ്ക്ക് ചുണ്ണാമ്പിന് പകരം ബ്ലീച്ചിങ് പൗഡര് ഉപയോഗിച്ച വിഷയം പരാമര്ശിക്കവെ, ചോറ്റാനിക്കര ക്ഷേത്രത്തില് ബ്ലീച്ചിങ് പൗഡര് കലക്കിയ വെള്ളമാണ് പ്രസാദം തയാറാക്കാനും പൂജയ്ക്കും ഉപയോഗിക്കുന്നെന്നായിരുന്നു പറഞ്ഞത്. മാധ്യമപ്രവര്ത്തകര് പരസ്പരം അടക്കിപ്പിടിച്ചു സംസാരിക്കുകയും ചിരിക്കുകയും ചെയ്യുന്നത് കണ്ടതോടെ രാധാകൃഷ്ണന് വാര്ത്താസമ്മേളനം പെട്ടെന്ന് അവസാനിപ്പിച്ച് സ്ഥലം കാലിയാക്കി. അദ്ദേഹം ഓടിയ വഴിയില് പുല്ല് പോലും കിളിക്കില്ലെന്നാണ് കൊച്ചിയിലെ ഒരു മാധ്യമപ്രവര്ത്തകന്റെ ട്രോള്.
കാര്യങ്ങള് കൃത്യമായി പഠിക്കാതെയും മനസിലാക്കാതെയും വാര്ത്താസമ്മേളനങ്ങളും പ്രതികരണങ്ങളും നടത്തുന്നതിലും ഫെയിസ്ബുക്ക് പോസ്റ്റ് ഇടുന്നതിലും മറ്റ് ചില ബി.ജെ.പി നേതാക്കളും ഒട്ടും പിന്നിലല്ല. അന്താരാഷ്ട്ര ശാസ്ത്ര, പരിസ്ഥിതി കോണ്ഗ്രസില് സംസാരിച്ച മുഖ്യമന്ത്രി പിണറായി വിജയന് ചില ദേശാടനപക്ഷികള് ഇടയ്ക്കിടെ കേരളത്തിലെത്തി നാശമുണ്ടാക്കാന് ശ്രമിക്കുന്നുണ്ടെന്ന് ചൂണ്ടിക്കാട്ടിയിരുന്നു. പ്രധാനമന്ത്രി നരേന്ദ്രമോദി കേരളത്തില് സന്ദര്ശനം നടത്തുന്ന ദിവസമായിരുന്നു അന്ന്. അദ്ദേഹത്തെ പിണറായി പരിഹസിച്ചതാണെന്ന് തെറ്റിദ്ധരിച്ച ബി.ജെ.പി സംസ്ഥാന ജനറല് സെക്രട്ടറി ഫെയിസ്ബുക്ക് പോസ്റ്റുമായി എത്തി. 'മോദി വെറും ദേശാടന പക്ഷിയല്ല. മാനസസരസ്സില് നിന്നും മാലാകാരത്തിലേക്ക് പറന്നുയരുന്ന രാജഹംസമാണ്'. എന്നായിരുന്നു സുരേന്ദ്രന് ഫേസ്ബുക്കില് കുറിച്ചത്. പുഷ്പം മണക്കുന്ന മോദിയുടെ ചിത്രത്തോടൊപ്പമായിരുന്നു സുരേന്ദ്രന്റെ പോസ്റ്റ്.
https://www.facebook.com/Malayalivartha
