കണ്ണൂര്‍ വിമാനത്താവളത്തില്‍നിന്ന് ഡല്‍ഹിയിലേക്ക് എയര്‍ഇന്ത്യയുടെ വിമാനസര്‍വീസ് എപ്രില്‍ ഒന്നിനു തുടങ്ങും. ഞായര്‍, ചൊവ്വ, ബുധന്‍, വെള്ളി, ശനി ദിവസങ്ങളിലാണ് സര്‍വീസ്. ഡല്‍ഹിയില്‍നിന്ന് കണ്ണൂര്‍ വഴി കോഴിക്കോട്ടേക്കും തിരിച്ചുമാണ് സര്‍വീസുകള്‍. രാവിലെ 9.05ന് ഡല്‍ഹിയില്‍ നിന്ന് പുറപ്പെടുന്ന വിമാനം 12.15ന് കണ്ണൂരിലെത്തും. ഉച്ചയ്ക്ക് ഒന്നിന് കണ്ണൂരില്‍നിന്നു പുറപ്പെട്ട് 1.30ന് കോഴിക്കോട്ടെത്തും. തിരിച്ച് 2.15നാണ് കണ്ണൂരിലേക്കുള്ള സര്‍വീസ്. 2.45ന് കണ്ണൂരില്‍ എത്തിച്ചേര്‍ന്ന ശേഷം 3.30ന് ഡല്‍ഹിയിലേക്കു പറക്കും. വൈകീട്ട് 6.45ഓടെയാണ് ഡല്‍ഹിയില്‍ എത്തിച്ചേരുക.
കണ്ണൂരില്‍ നിന്ന് എയര്‍ഇന്ത്യയുടെ ആദ്യസര്‍വീസാണിത്. പി.കെ.ശ്രീമതി എം.പി.ക്കാണ് എയര്‍ഇന്ത്യാ ഓഫീസില്‍നിന്ന് ഇതുസംബന്ധിച്ച അറിയിപ്പ് ലഭിച്ചത്. കണ്ണൂരില്‍ നിന്ന് ഡല്‍ഹിയിലേക്ക് 4200 രൂപയും കോഴിക്കോട്ടേക്ക് 1500 രൂപയുമാണ് കുറഞ്ഞ നിരക്ക്.
ഡല്‍ഹിക്കു സമീപത്തെ ഹിന്‍ഡന്‍ വിമാനത്താവളത്തിലേക്ക് കണ്ണൂരില്‍ നിന്നുള്ള ഉഡാന്‍ സര്‍വീസ് മേയ്മാസം തുടങ്ങും. ഇന്‍ഡിഗോയാണ് സര്‍വീസ് നടത്തുക.