തിരുവല്ലയില് പൊള്ളലേറ്റ യുവതിയെ 43 മിനിട്ടില് എറണാകുളത്ത് എത്തിച്ച 102 ആംബുലന്സ് ടീമിന് ബിഗ് സല്യൂട്ട്
തിരുവല്ലയില് പൊള്ളലേറ്റ് അതീവ ഗുരുതരാവസ്ഥയിലായ യുവതിയുമായി ആംബുലന്സ് സംഘം എറണാകുളം വരെ എത്തിയത് 43 മിനിട്ടില്. ഇന്നലെ രാവിലെ തിരുവല്ല നഗരത്തില് യുവാവ് പെട്രോള് ഒഴിച്ച് തീ കൊളുത്തിയതിനെ തുടര്ന്ന് അതീവ ഗുരുതരാവസ്ഥയില് പുഷ്പഗിരി മെഡിക്കല് കോളജില് പ്രവേശിപ്പിക്കപ്പെട്ട 19-കാരിയെ ഉച്ചയോടെയാണ് വിദഗ്ധ ചികിത്സയ്ക്കായി എറണാകുളം മെഡിക്കല് ട്രസ്റ്റിലേക്കു കൊണ്ടുപോയത്.
യുവതിയെ സകല സജ്ജീകരണങ്ങളുമായി ആശുപത്രിയിലേക്കു കൊണ്ടുപോയത് ഐഐഇഎംഎസ് 102 മെഡിക്കല് സംഘമാണ്. പുഷ്പഗിരിയില് പ്രാഥമിക ചികിത്സ നല്കി ആംബുലന്സ് വെന്റിലേറ്ററിലേക്ക് കണക്ട് ചെയ്ത് മറ്റ് അത്യാധുനിക ജീവന് രക്ഷാ ഉപകരണങ്ങളും, ജീവന് രക്ഷാ മരുന്നുകളും നല്കി ഐഐഇഎംഎസ് 102 മെഡിക്കല് ടീമംഗങ്ങളായ അഖില് കൃഷ്ണന്, അനന്തു മനോഹരന് എന്നിവരാണ് തിരുവല്ലയില് നിന്നും യുവതിയെയും കൊണ്ട് പുറപ്പെട്ടത്. യാത്രയ്ക്കു മുമ്പായി പോലീസ് വേണ്ട സജ്ജീകരണങ്ങള് നടത്തിയിരുന്നു.
തിരുവല്ല, ആലപ്പുഴ, ചേര്ത്തല, അരൂര് വഴി എറണാകുളം വരെ എത്തുന്നതിന് ആവശ്യമായ ട്രാഫിക് ക്രമീകരണങ്ങള് തിരുവല്ല സിഐ സന്തോഷ് കുമാര് ഇടപെട്ട് നടത്തി. എല്ലാ സ്റ്റേഷനുകളിലേക്കും സന്ദേശം പോയതനുസരിച്ച് മുന്കൂട്ടി പോലീസ് റോഡില് നിരന്നു.
പോലീസ് വാഹനവും ആംബുലന്സിന് അകമ്പടിയായി. 108 കോള് സെന്ററില് നിന്നുള്ള നിര്ദേശവും സ്വീകരിച്ച യാത്രയില് ഇടയ്ക്കൊക്കെ യുവതിക്ക് അസ്വസ്ഥത ഉണ്ടായപ്പോള് മെഡിക്കല് ടീം വേണ്ട ചികിത്സ നല്കി.മെഡിക്കല് സെന്ററില് യുവതിയെ എത്തിച്ച് തീവ്രപരിചരണ വിഭാഗത്തില് പ്രവേശിപ്പിക്കുമ്പോള് സംഘത്തിനും വലിയൊരു ചുമതല പൂര്ത്തിയാക്കിയതിന്റെ ആശ്വാസം.
https://www.facebook.com/Malayalivartha
