അമ്മക്ക് കുഴപ്പമൊന്നുമില്ല, ഇടക്കിടക്ക് ഇങ്ങനെ ഉണ്ടാവുന്നതല്ലേ, മോള് നന്നായി പരീക്ഷയെഴുതിയിട്ടു വരൂ' അമ്മയുടെ ഈ വാക്കുകള് അവള്ക്ക് താങ്ങാനാവുന്നില്ല... പരീക്ഷ എഴുതി അഭിരാമി വീട്ടില് എത്തുമ്പോഴേക്കും...
ബുധനാഴ്ച പ്ലസ് ടു ഹ്യുമാനിറ്റീസ് പരീക്ഷ എഴുതി അഭിരാമി വീട്ടില് എത്തുമ്പോഴേക്കും നന്നായി പരീക്ഷ എഴുതിയിട്ടു വരാന് അനുഗ്രഹിച്ചു വിട്ട ആ അമ്മ അവളെ വിട്ടു പോയിരുന്നു. 'അമ്മക്ക് കുഴപ്പമൊന്നുമില്ല; ഇടക്കിടക്ക് ഇങ്ങനെ ഉണ്ടാവുന്നതല്ലേ. മോള് നന്നായി പരീക്ഷയെഴുതിയിട്ടു വരൂ'' ലളിതാംബിക മകള് അഭിരാമിയോട് പറഞ്ഞ അവസാന വാക്കുകളായിരുന്നു. അതോര്ക്കുമ്പോള് അവള്ക്ക് താങ്ങാനാവുന്നില്ല.
അമ്മയുടെ വേര്പാടിന്റെ വേദന ഉള്ളിലടക്കിയാണ് അഭിരാമി ഇന്നലെ പരീക്ഷയെഴുതാന് ആലപ്പുഴ സെന്റ് ജോസഫ്സ് സ്കൂളിലെത്തിയത്. വേഗം പരീക്ഷയെഴുതി തീര്ത്ത് അമ്മയെ അവസാനമായി കാണാന് ഓടിയെത്തുകയും ചെയ്തു. തൂക്കുകുളം ചീതക്കോട്ടുവെളി വീട്ടില് ലളിതാംബിക ബുധനാഴ്ചയാണ് മരണപ്പെട്ടത്. പ്ലസ് ടു പരീക്ഷ എഴുതാന് മകള് അഭിരാമി പോകുംമുമ്പ് തന്നെ അമ്മക്ക് ശ്വാസംമുട്ടലും പ്രയാസവും അനുഭവപ്പെട്ടിരുന്നു. ആശുപത്രിയില് പോകാന് നിര്ബന്ധിച്ചപ്പോള് തനിക്ക് ഇടക്കിടക്ക് ഇങ്ങനെയുണ്ടാകുന്നതാണെന്നും മകള് നന്നായി പരീക്ഷയെഴുതണമെന്നും പറഞ്ഞ് യാത്രയാക്കുകയായിരുന്നു. പരീക്ഷയെഴുതി വീട്ടിലെത്തിയപ്പോള് ലളിതാംബിക ആശുപത്രിയിലാണന്ന വാര്ത്തയാണ് അഭിരാമി അറിഞ്ഞത്.
ഊണ് കഴിക്കാനെത്തിയ ഭര്ത്താവ് അശോകന് ആശുപത്രിയില് എത്തിക്കുകയായിരുന്നെന്ന് ബന്ധുക്കള് പറഞ്ഞു. അപ്പോഴേക്കും മരണപ്പെട്ടിരുന്നു. അമ്മയുടെ മരണത്തിന്റെ വേദനയും ഉള്ളിലേന്തിയാണ് ഇന്നലെ അഭിരാമി പരീക്ഷയെഴുതാന് സ്കൂളിലെത്തിയത്. പരീക്ഷ വേഗം പൂര്ത്തിയാക്കി അമ്മയെ അവസാനമായി കാണാനെത്തുകയായിരുന്നു. അഭിരാമി എത്തി മിനിറ്റുകള്ക്കകം സംസ്കാരവും നടന്നു.
https://www.facebook.com/Malayalivartha
