കന്യാസ്ത്രീയെ ബലാല്സംഗം ചെയ്ത കേസില് അറസ്റ്റിലായ ബിഷപ്പ് ഫ്രാങ്കോ മുളയ്ക്കലിനെതിരായ സമരത്തില് പങ്കെടുത്ത സിസ്റ്റര് ലൂസി കളപ്പുരയ്ക്കല് സഭ വിട്ട് പോകണമെന്ന് നോട്ടീസ്
കന്യാസ്ത്രീയെ ബലാല്സംഗം ചെയ്ത കേസില് അറസ്റ്റിലായ ബിഷപ്പ് ഫ്രാങ്കോ മുളയ്ക്കലിനെതിരായ സമരത്തില് പങ്കെടുത്ത സിസ്റ്റര് ലൂസി കളപ്പുരയ്ക്കല് സഭ വിട്ട് പോകണമെന്ന് നോട്ടീസ്. ഫ്രാന്സിസ്കന് ക്ലാരിസ്റ്റ് (എഫ്സിസി) സഭാംഗം വയനാട് കാരയ്ക്കാമല മഠത്തിലെ മദര് സുപ്പീരിയറാണ് നോട്ടീസ് നല്കിയത്. സഭ നടപടി ഖേദകരമെന്ന് സിസ്റ്റര് ലൂസി കളപ്പുര പ്രതികരിച്ചു. സന്യാസം തുടരുമെന്നും അവര് അറിയിച്ചു. സന്യാസം ഉപേക്ഷിക്കില്ല, വ്രതം തുടരാനാണ് തീരുമാനം. മുമ്പ് മൂന്ന് തവണ സഭ നോട്ടീസ് നല്കിയിരുന്നു. അന്ത്യശാസനം എന്ന നിലയിലാണ് ഇപ്പോള് നോട്ടീസ് നല്കിയിരിക്കുന്നത്. സഭയുടെ നിലപാടിനെതിരെ പൊതുസമൂഹത്തില് നിന്ന് വ്യാപക പ്രതിഷേധമാണ് ഉയര്ന്നിരിക്കുന്നത്.
സഭ നല്കിയ മൂന്ന് നോട്ടീസിനും കനോന് നിയമവും ചട്ടവും പ്രകാരം മറുപടി നല്കിയിരുന്നെന്നും സിസ്റ്റര് ലൂസി കളപ്പുര വ്യക്തമാക്കി. സിസ്റ്റര് സഭ വിട്ട് പുറത്തു പോയില്ലെങ്കില് പുറത്താക്കുമെന്നാണ് ഭീഷണി. സഭാ സിനഡ് തീരുമാനം മറികടന്ന് ചാനല് ചര്ച്ചകളില് പങ്കെടുത്തെന്നാണ് സിസ്റ്റര്ക്കെതിരായ പ്രധാന കുറ്റം. കാറുവാങ്ങിയതും ശമ്പളം മഠത്തിന് നല്കാത്തതും ദാരിദ്യവ്രതത്തിന് വിരുദ്ധമാണെന്നും നോട്ടീസില് പറയുന്നു. അതേസമയം സഭകള്ക്കുള്ളില് നിന്ന് തന്നെ അഭിപ്രായഭിന്നതകള് ഉയര്ന്നതിനെ തുടര്ന്ന് ബിഷപ്പ് ഫ്രാങ്കോയ്ക്കെതിരായ സമരത്തില് പങ്കെടുത്തു എന്ന കുറ്റം ഇന്ന് ലഭിച്ച നോ്ട്ടീസില് പറയുന്നില്ല.
സഭ വിട്ടില്ലെങ്കില് അടുത്ത മാസം 16ന് മുമ്പ് കാരണം അറിയിക്കണം. കാനോന് നിയമപ്രകാരം ഒരു കന്യാസ്ത്രി പാലിക്കേണ്ട ചട്ടങ്ങള് സിസ്റ്റര് ലൂസി മറികടന്നെന്നും നോട്ടീസില് ആരോപിക്കുന്നു. ഫ്രാങ്കോയ്ക്കെതിരായ സമരത്തില് പങ്കെടുത്തതും സിസ്റ്റര് പുതിയ കാര് വാങ്ങിയതും പുസ്തകം പ്രസിദ്ധികരിച്ചതും അനുമതി ഇല്ലാതെയാണെന്നും കാണിച്ചാണ് ആദ്യം നോട്ടീസ് നല്കിയത്. വിശദീകരണം തൃപ്തികരം അല്ലെങ്കില് കാനോനിക നിയമം അനുസരിച്ച് നടപടി ഉണ്ടാകുമെന്നും മുന്നറിയിപ്പ് നല്കിയിരുന്നു. സിസ്റ്റര് സഭയുടെ കൊച്ചി ആസ്ഥാനത്തെത്തി നേരിട്ട് ഹാജരായി വിശദീകരണം നല്കണമെന്നായിരുന്നു ആവശ്യം. സിസ്റ്റര് നേരിട്ട് ഹാജരാകാതെ വിശദീകരണം നല്കി. ഇതേ തുടര്ന്ന് രണ്ടാമതും നോട്ടീസ് നല്കിയിരുന്നു.
ബിഷപ്പ് ഫ്രാങ്കോയ്ക്കെതിരായ സമരത്തില് പങ്കെടുത്ത ശേഷം വയനാട്ടിലെത്തിയ സിസ്റ്റര് ലൂസി കളപ്പുരയ്ക്കലിനെ സഭാശുശ്രൂഷകൡ നിന്ന് വിലക്കിയിരുന്നു. തുടര്ന്ന് വയനാട് കാരക്കാമല പള്ളിയില് ഇടവക അംഗങ്ങള് പ്രതിഷേധവുമായി എത്തുകയും സഭ മുട്ടുമടക്കുകയുമായിരുന്നു. രണ്ടാമത് നല്കിയ നോട്ടീസിന് മറുപടി നല്കിയെങ്കിലും വിശദീകരണം തൃപ്തികരമല്ലെന്ന് പറഞ്ഞാണ് വീണ്ടും നോട്ടീസ് നല്കിയത്. ഇതെല്ലാം കാനോന് നിയമപ്രകാരം സിസ്റ്റര് ലൂസിയെ പുറത്താക്കുന്നതിന് മുമ്പുള്ള നടപടിക്രമങ്ങളായിരുന്നെന്ന് ഇപ്പോള് വ്യക്തമായി.
https://www.facebook.com/Malayalivartha
