സ്‌കൂള്‍ ബാഗിന്റെ ഭാരംകുറയ്ക്കാന്‍ നടപടി സ്വീകരിച്ചതായി പൊതുവിദ്യാഭ്യാസവകുപ്പ് ഹൈക്കോടതിയില്‍. സ്‌കൂള്‍ ബാഗിന്റെ അമിതഭാരം നിയന്ത്രിക്കണമെന്നാവശ്യപ്പെട്ടുള്ള ഹര്‍ജിയിലാണ് ഈ സത്യവാങ്മൂലം. ഭാരംകുറഞ്ഞ വസ്തുക്കള്‍കൊണ്ടു നിര്‍മിച്ച ബാഗുകള്‍ ഉറപ്പാക്കാന്‍ പ്രധാന അധ്യാപകര്‍ക്ക് നിര്‍ദേശം നല്‍കിയതായി പൊതുവിദ്യാഭ്യാസവകുപ്പ് അഡീഷണല്‍ ഡയറക്ടര്‍ ജെസ്സി ജോസഫ് വ്യക്തമാക്കി.

വാട്ടര്‍ ബോട്ടിലുകള്‍ ഒഴിവാക്കി കഌസ് മുറികളില്‍ കുടിവെള്ളം നല്‍കും. വലുപ്പവും പേജും കുറഞ്ഞ നോട്ടുബുക്കുകളാണ് ഉപയോഗിക്കുന്നതെന്ന് ഉറപ്പാക്കും. അനാവശ്യ സാധനങ്ങള്‍ കഌസില്‍ കൊണ്ടുവരുന്നില്ലെന്ന് കുട്ടികളുടെ ബാഗ് പരിശോധിച്ച് ടീച്ചര്‍മാര്‍ ഉറപ്പാക്കുമെന്നും സത്യവാങ്മൂലത്തില്‍ പറയുന്നു.

പൊതുപ്രവര്‍ത്തകനായ ശ്രീകുമാര്‍ നൂറനാട് നല്‍കിയ പരാതിയില്‍ സ്‌കൂള്‍ ബാഗിന്റെ ഭാരം കുറയ്ക്കാനുള്ള നിര്‍ദേശങ്ങളുമായി മനുഷ്യാവകാശ കമ്മിഷന്‍ ഉത്തരവിറക്കിയിരുന്നു. ഇതനുസരിച്ച് പാഠപുസ്തകങ്ങള്‍ ഒന്നിലേറെ ഭാഗങ്ങളാക്കി. 2016-17 അധ്യയന വര്‍ഷത്തില്‍ രണ്ടുഭാഗമായിരുന്ന പുസ്തകങ്ങള്‍ ഉത്തരവിനെത്തുടര്‍ന്ന് 2017-18 മുതല്‍ മൂന്നു ഭാഗമാക്കാന്‍ തീരുമാനിച്ചു. ആദ്യ രണ്ട് ഭാഗങ്ങള്‍ വേനലവധിക്കാലത്തും മൂന്നാം ഭാഗം ക്രിസ്മസ് അവധിക്കാലത്തും വിതരണം ചെയ്യാനും നിശ്ചയിച്ചു. ഓരോ ഭാഗവും 60 പേജുകളില്‍ കൂടരുതെന്നും നിഷ്‌കര്‍ഷിച്ചിട്ടുണ്ട്.