ജോയ്സ് ജോര്ജിന് വീണ്ടും കുരുക്ക്; ജോയ്സ് ജോര്ജ് എം.പി പ്രളയാനന്തര പുനര്നിര്മാണത്തിന്റെ കരാര് തന്റെ സഹോദരനും, സി.പി.എം. നേതാവിനും നല്കിയെന്ന് ആരോപണം
ഇടുക്കി എം പിക്കെതിരെ കോടികളുടെ തട്ടിപ്പ് ആരോപണം. ജോയ്സ് ജോര്ജ് എം.പി പ്രളയാനന്തര പുനര്നിര്മാണത്തിന്റെ കരാര് തന്റെ സഹോദരനും, സി.പി.എം. നേതാവിനും നല്കിയെന്നാണ് ആരോപണം. കോടികളുടെ നിര്മാണ ജോലികള് തരപ്പെടുത്തിയതില് വ്യാപകമായ അഴിമതിയുണ്ടെന്ന് കെ.പി.സി.സി. ന്യൂനപക്ഷ വിഭാഗം കോര്ഡിനേറ്റര് മനോജ് കോക്കാട്ട് ആരോപിച്ചു.
ഇടുക്കി ജില്ലയില് പ്രളയത്തില് തകര്ന്ന കൊച്ചി ധനുഷ്കോടി ദേശീയ പാതയുടെയും, ചെറുതോണി ടൗണ് പുനര്നിര്മാണം ഉള്പ്പെടെയുള്ള പൊതുമരാമത്ത് റോഡ്സ് ഡിവിഷന്റെയും പരിധിയിലുള്ള നിര്മാണ കരാര് നല്കുന്നതില് സ്വജനപക്ഷപാതം ഉണ്ടായെന്നാണ് ആരോപണം. കോടികളുടെ കരാറിന്റെ എം ബുക്ക് രേഖപ്പെടുത്തുവാനോ, ബില്ലെഴുതിക്കൊടുക്കാനോ ഇന്നുവരെ തയ്യാറായില്ല. കരാറനുസരിച്ച് ജോലി 15 ദിവസത്തിനകം പൂര്ത്തീകരിക്കണമെന്നിരിക്കെ പഴയ തീയതി വച്ച് കള്ളബില്ല് ഉണ്ടാക്കാനാണ് നീക്കം.
എം.പി. യുടെ സഹോദരന് ആറുകോടിയില് അധികം രൂപയുടെ നിര്മാണ ജോലിയാണ് തരപ്പെടുത്തിയതെന്നും ആക്ഷേപം. കരാറിന്റെ അടിസ്ഥാനത്തില് നിര്മാണ ജോലികള് ഇപ്പോഴും പുരോഗമിക്കുകയാണ്. ജോയ്സ് ജോര്ജ് എം പി യുടെ അഴിമതിക്കും സ്വജനകപക്ഷപാതത്തിനും എതിരെ പൊലീസില് പരാതി നല്കുമെന്ന് മനോജ് കോക്കാട്ട് അറിയിച്ചു. വിവരവകാശ രേഖകളുടെ അടിസ്ഥാനത്തിലാണ് ആരോപണം.
https://www.facebook.com/Malayalivartha
