തൊടുപുഴയില്‍ ഏഴു വയസുകാരന്‍ ക്രൂരമര്‍ദനത്തിനിരയായ സംഭവത്തില്‍ ഹൈക്കോടതി സ്വമേധയാ കേസെടുത്തു. സംഭവവുമായി ബന്ധപ്പെട്ട് ജസ്റ്റിസ് ദേവന്‍ രാമചന്ദ്രന്‍ ചീഫ് ജസ്റ്റിസിന് സമര്‍പ്പിച്ച കത്തിന്റെ അടിസ്ഥാനത്തിലാണ് ഹര്‍ജി ഫയല്‍ ചെയ്തിരിക്കുന്നത്.

അരുണ്‍ ആനന്ദ് എന്നയാളുടെ മനുഷ്യത്വരഹിതമായ ആക്രമണമാണ് രണ്ട് കുട്ടികള്‍ക്കും നേരെയുണ്ടായതെന്ന് കത്തില്‍ ചൂണ്ടിക്കാട്ടുന്നു. മാധ്യമങ്ങളും ആശുപത്രി അധികൃതരും നല്‍കുന്ന വിവരമനുസരിച്ച്‌ അതീവ ഗുരുതരാവസ്ഥയിലുള്ള ഏഴ് വയസുള്ള മൂത്ത കുട്ടി ആശുപത്രിയില്‍ മരണത്തോട് മല്ലടിക്കുകയാണ്. സംഭവവുമായി ബന്ധപ്പെട്ട ഒരു കേവല നിയമ നടപടി എന്നതിനപ്പുറം ഭാവിയില്‍ ഇത്തരം പ്രവണതകള്‍ തടയുന്നതിനും, കുട്ടികള്‍ക്കെതിരായ ക്രൂരതകള്‍ക്കെതിരെ ഫലപ്രദവും ശക്തവുമായ നടപടികള്‍ ഉറപ്പാക്കാനും കത്ത് സ്വമേധയാ ഹര്‍ജിയായി സ്വീകരിക്കണമെന്നാണ് ആവശ്യം.
അതേസമയം തൊടുപുഴയില്‍ അമ്മയുടെ സുഹൃത്ത് ക്രൂരമായി മര്‍ദ്ദിച്ച ഏഴ് വയസ്സുകാരന്‍റെ ആരോഗ്യനില അതീവ ഗുരുതരമായി തുടരുന്നു. വെന്റിലേറ്ററിന്റെ സഹായത്തോടെ ജീവന്‍ നിലനിര്‍ത്തുന്ന കുട്ടിക്ക് ദ്രവരൂപത്തിലാണ് ആഹാരം കൊടുക്കുന്നത്. കുട്ടിയുടെ തലച്ചോറിലേക്കുള്ള രക്തയോട്ടം 90 ശതമാനത്തിലധികവും നിലച്ചതായാണ് ആശുപത്രി വൃത്തങ്ങള്‍ വൃക്തമാക്കുന്നത്.

മറ്റ് അവയവങ്ങള്‍ പ്രവര്‍ത്തിക്കുന്നതിനാല്‍ കുട്ടിയെ വെന്‍റിലേറ്ററില്‍ തുടരാന്‍ അനുവദിക്കാനാണ് മെഡിക്കല്‍ ബോര്‍ഡിന്റെ തീരുമാനം. ഏറ്റവും മികച്ച ചികിത്സകള്‍ ലഭ്യമാക്കിയിട്ടും ശരീരം മരുന്നുകളോട് പ്രതികരിക്കുന്നില്ലെന്നാണ് കോലഞ്ചേരി മെഡിക്കല്‍ കോളേജ് വൃത്തങ്ങള്‍ വ്യക്തമാക്കുന്നത്.

തലക്ക് ശക്തമായ ക്ഷതമേറ്റതും ആന്തരിക അവയവങ്ങള്‍ക്ക് പരിക്കേറ്റതുമാണ് കുട്ടിയുടെ ആരോഗ്യ നില കൂടുതല്‍ വഷളാക്കിയത്. കഴിഞ്ഞ ദിവസം വെന്റിലേറ്ററില്‍ നിന്ന് കുട്ടിയെ മാറ്റിയെങ്കിലും ശ്വാസ തടസം അനുഭവപ്പെട്ടതിനെ തുടര്‍ന്ന് അല്‍പ സമയത്തിനകം പുനസ്ഥാപിക്കുകയായിരുന്നു.