അടുത്തിടെ തിരുവനന്തപുരം സെക്രട്ടറിയേറ്റ് പരിസരത്തിലൂടെ നടക്കുന്ന ആര്‍ക്കും കാണാം സെക്രട്ടറിയേറ്റിന്റെ മതിലുകളിലെല്ലാം മുഖ്യ തെരഞ്ഞെടുപ്പ് ഓഫീസര്‍ ടിക്കാറാം മീണയുടെ മള്‍ട്ടികള്‍ പോസ്റ്റര്‍. ഇതെന്താ ടിക്കാറാം മീണ മത്സരിക്കുന്നോ? അടുത്ത് പോയി നോക്കുമ്പോഴാണ് ഇത് അവബോധ പോസ്റ്ററാണെന്ന് മനസിലാക്കുന്നത്. വോട്ട് ചെയ്യാന്‍ ജനങ്ങളെ പ്രേരിപ്പിച്ചുള്ള പോസ്റ്റര്‍. അതിലെന്തിനാണ് ടിക്കാറം മീണയുടെ പോസ്റ്ററെന്നാണ് ജനങ്ങളുടെ ചോദ്യം. ഈ ചോദ്യം ബിജെപി ഏറ്റെടുത്തതോടെ സംഗതി ഉഷാറായി. ഇതോടെ ശ്രീനിവാസന്റെ ഉദയനാണ് താരത്തിലെ പ്രശസ്ത ഡയലോഗ്‌സാണ് ഓര്‍മ്മയില്‍ വരുന്നത്. 

സ്വന്തം ചിത്രങ്ങള്‍ വെച്ച പോസ്റ്ററുകള്‍ പതിച്ചെന്ന് ആരോപിച്ച് ടിക്കാറാം മീണയ്‌ക്കെതിരെ ബിജെപി പരാതി നല്‍കി. മുഖ്യ തെരഞ്ഞെടുപ്പ് ഓഫീസര്‍ തന്നെ പെരുമാറ്റച്ചട്ടം ലംഘിക്കുന്നതായി സിവില്‍ ആപ്പ് വഴിയാണ് പരാതി നല്‍കിയത്. ബിജെപി സംസ്ഥാന നേതൃത്വം നല്‍കിയ പരാതിയില്‍ അദ്ദേഹത്തിനെതിരെ തെരഞ്ഞെടുപ്പ് കമ്മീശന്‍ നടപടി സ്വീകരിക്കണമെന്നും ആവശ്യപ്പെട്ടിട്ടുണ്ട്.

പൊതുസ്ഥലത്ത് സ്ഥാനാര്‍ത്ഥികളുടെ ഫോട്ടോ പതിക്കരുതെന്ന് കമ്മീഷന്‍ തന്നെയാണ് നിര്‍ദേശം നല്‍കിയത്. എന്നിട്ട് അധ്യക്ഷന്‍ തന്നെ അത് ലംഘിച്ചതിനെതിരേയാണ് ബിജെപി രംഗത്തെത്തിയത്. 

തെരഞ്ഞെടുപ്പില്‍ ശബരിമല പ്രചാരണ വിഷയമാക്കരുത് എന്ന നിര്‍ദ്ദേശത്തിനെതിരെയും ബിജെപി പരാതി നല്‍കി. ശബരിമല പ്രചരണവിഷമാക്കരുതെന്ന നിര്‍ദ്ദേശം ദുരുദ്ദേശപരമാണെന്ന് പരാതിയില്‍ ആരോപിക്കുന്നു. തിരഞ്ഞെടുപ്പ് ഓഫീസറുടേത് അധികാര ദുര്‍വിനിയോഗമാണെന്ന് ആരോപിക്കുന്ന പരാതിയില്‍ അദ്ദേഹത്തെ പദവിയില്‍ നിന്ന് നീക്കണമെന്നും ആവശ്യപ്പെടുന്നു.

അങ്ങനെ ടിക്കാറാം മീണയും ബിജെപിയും തമ്മിലുള്ള തര്‍ക്കം തുടരുകയാണ്. തങ്ങള്‍ക്കെതിരെ ടിക്കാറാം മീണ നോട്ടീസ് നല്‍കുമ്പോള്‍ കേന്ദ്ര തെരഞ്ഞെടുപ്പ് കമ്മീഷനെ കൊണ്ട് ഇടപെടുവിക്കാന്‍ ശ്രമിക്കുകയാണ് ബിജെപിയും.

അതിനിടെ ടിക്കാറാംമീണ ഇന്നലെ പ്രധാനമന്ത്രി നരേന്ദ്രമോദിയെ അഭിനന്ദിച്ച് രംഗത്തെത്തിയതും വിവാദമായിരുന്നു. ശബരിമലയെന്ന വാക്ക് ഉപയോഗിക്കാതെ വിഷയം പരാമര്‍ശിച്ച പ്രധാനമന്ത്രി നരേന്ദ്ര മോദിയുടെ ശൈലി എല്ലാവരും മാതൃകയാക്കണമെന്നാണ് മീണ പറയുന്നത്. കോഴിക്കോട്ടെ സമ്മേളനത്തില്‍ പ്രധാനമന്ത്രി ശബരിമല എന്ന വാക്ക്് പറഞ്ഞിട്ടില്ല. പ്രചാരണത്തില്‍ ശബരിമല വിഷയം ഉന്നയിക്കാം. അതു രാഷ്ട്രീയവും സാംസ്‌കാരികവുമായ വിഷയമാണ്. ആചാരങ്ങളും അനുഷ്്ഠാനങ്ങളും എന്നാണു പ്രധാനമന്ത്രി പറഞ്ഞത്. ആരെങ്കിലും ലക്ഷ്്മണ രേഖ ലംഘിച്ചാല്‍ നടപടിയുണ്ടാകും. മതം, ജാതി, ദൈവം തുടങ്ങിയവയുടെ പേരില്‍ വോട്ട് ചോദിക്കരുത്. കാസര്‍കോട്, തൃശൂര്‍, കൊല്ലം കലക്ടര്‍മാര്‍ക്കു ലഭിച്ച പെരുമാറ്റച്ചട്ടലംഘന പരാതികളില്‍ അവര്‍ക്കു യുക്തമായ നടപടി സ്വീകരിക്കാം. അമിതമായി മതവും വിശ്വാസവും ചര്‍ച്ചചെയ്തു സൗഹാര്‍ദ്ദം തകര്‍ക്കാനുള്ള ശ്രമം ആരുടെ ഭാഗത്തു നിന്നും ഉണ്ടാകരുതെന്നും മീണ പറഞ്ഞു.

എന്നാല്‍ മീണയുടെ വാക്കുകള്‍ പൊളിച്ചടുക്കുന്നതായിരുന്നു നരേന്ദ്ര മോദിയുടെ പ്രസംഗം. കേരളത്തില്‍ അയ്യപ്പന്റെ പേര് പറയാന്‍ പറ്റാത്ത അവസ്ഥയാണെന്നാണ് മോദി പറയുന്നത്. കമ്മ്യുണിസ്റ്റുകാര്‍ ഭരിക്കുന്നിടത്താണ് ഈ അവസ്ഥ. ബി.ജെ.പി സ്ഥാനാര്‍ത്ഥിക്ക് ജയിലില്‍ കിടക്കേണ്ടി വന്നുവെന്നും മോഡി പറഞ്ഞു. 

വിശ്വാസങ്ങളെയും ആചാരങ്ങളെയും തകര്‍ക്കാനുള്ള അപകടകരമായ നീക്കമാണ് നടന്നതെന്നും മോഡി തേനി റാലിയില്‍ ആരോപിച്ചു. വിശ്വാസങ്ങളെയും ആചാരങ്ങളെയും തകര്‍ക്കാനുള്ള അപകടകരമായ നീക്കമാണ് നടക്കുന്നത്. കേരളത്തില്‍ ബി.ജെ.പി ഉള്ളടത്തോളം അത് നടക്കില്ലെന്ന് മോഡി പറഞ്ഞു. ഇതോടെ മോദിയെ പുകഴത്തിയ ടിക്കാറാം മീണ വീണ്ടും വെട്ടിലായി.