കെ.എസ്.ആര്‍.ടി.സിയിലെ എംപാനല്‍ ഡ്രൈവര്‍മാരെ സുപ്രീംകോടതിയുടെ വിധി കണക്കിലെടുത്ത് ജോലിയില്‍ നിന്ന് ഒഴിവാക്കാനും ശേഷം ഇവര്‍ക്ക് തന്നെ നിയമാനുസൃതമായ താല്‍ക്കാലിക നിയമനം നല്‍കാനും ആലോചന. എംപാനല്‍ കണ്ടക്ടര്‍മാരെ പുനര്‍വിന്യസിച്ച രീതി ഡ്രൈവര്‍മാരുടെ കാര്യത്തിലും പരിഗണിക്കും. താല്‍ക്കാലിക ഡ്രൈവര്‍മാരെ പിരിച്ചുവിടുന്നതിന് ജൂണ്‍ 30 വരെ സുപ്രീംകോടതി സാവകാശം അനുവദിച്ചത് മാനേജ്മന്റെിന് ആശ്വാസമേകുന്നുണ്ട്.
ജീവനക്കാരുടെ ക്ഷാമം കാരണം ബസ് മുടങ്ങാതെ ക്രമീകരണം നടത്താനുള്ള സാവകാശം ലഭിച്ചിട്ടുണ്ട്. ഡ്രൈവര്‍മാരെ പൂര്‍ണമായും ഒഴിവാക്കുന്നത് 700 ഓളം സര്‍വിസുകളെ ബാധിക്കുമെന്നാണ് മാനേജ്മന്റെിന്റെ വിലയിരുത്തല്‍. താല്‍ക്കാലിക ഡ്രൈവര്‍മാരെ നിലനിര്‍ത്തിയിരുന്ന രീതിയെയാണ് കോടതി വിമര്‍ശിച്ചതെന്നാണ് വിലയിരുത്തല്‍.
താല്‍ക്കാലിക നിയമനമാണെങ്കില്‍ 179 ദിവസത്തില്‍ കൂടുതല്‍ തുടര്‍ച്ചയായി ജോലി നല്‍കാന്‍ പാടില്ലെന്നാണ് വ്യവസ്ഥ. 179 ദിവസത്തിനു ശേഷം ഒരു ദിവസം ജോലിയില്‍നിന്ന് മാറ്റി നിര്‍ത്താം. അതിനു ശേഷം വീണ്ടും അവരെ തന്നെയോ പുതിയ പട്ടികയില്‍ നിന്നോ 179 ദിവസത്തേക്ക് നിയമനം നടത്താം. താല്‍ക്കാലിക ജീവനക്കാരെ കാലാവധി കഴിയുമ്പോള്‍ ഒരു ദിവസം മാറ്റി നിര്‍ത്തണമെന്ന് ഡിപ്പോ മേധാവിമാര്‍ക്ക് നിര്‍ദേശം നല്‍കിട്ടുണ്ട്.
എന്നാല്‍, താല്‍ക്കാലിക ജീവനക്കാരെ തുടര്‍ച്ചയായി ജോലിക്ക് നിയോഗിക്കുന്ന നിലവിലെ രീതി ഇനിയുണ്ടാകില്ല. പുതിയ സ്ഥിരനിയമനം സാധ്യമല്ലെന്ന രീതിയാണ് മാനേജ്മന്റെിനുള്ളത്. കെ.എസ്.ആര്‍.ടി.സിയില്‍ ബസും ജീവനക്കാരും തമ്മിലുള്ള അനുപാതം ദേശീയ ശരാശരിയെക്കാള്‍ കൂടുതലാണെന്നും ഇത് കുറക്കുന്നതിന് സ്ഥിരം നിയമനങ്ങള്‍ കുറക്കണമെന്നുമാണ് സുശീല്‍ ഖന്ന നിര്‍ദേശിച്ചിട്ടുള്ളത്.