ചീഫ് സെക്രട്ടറിയാകുമെന്ന് ഏതാണ്ട് ഉറപ്പായ ഘട്ടത്തില്‍ വെള്ളിടി പോലെ ജിജി തോംസണെ പാമോലിന്‍ ഭൂതം പിടികൂടി. പാമോലിന്‍ കേസിലുള്‍പ്പെട്ട ജിജി തോംസണെ ചീഫ് സെക്രട്ടറിയാക്കരുതെന്ന് പ്രതിപക്ഷ നേതാവ് വി.എസ് അച്യുതാനന്ദന്‍ പറഞ്ഞതിനു പിന്നാലെ ഹൈക്കോടതി വിധിയും വന്നു.

പാമോലിന്‍ കേസ് അവസാനിപ്പിക്കണമെന്ന സര്‍ക്കാരിന്റെ റിവിഷന്‍ ഹര്‍ജി ഹൈക്കോടതി തള്ളി. സംസ്ഥാന സര്‍ക്കാരിന്റെ എല്ലാ വാദങ്ങളെയും തള്ളിക്കളഞ്ഞാണ് ഹൈക്കോടതി സിംഗിള്‍ ബെഞ്ച് ഹര്‍ജി തള്ളിയത്. കേസില്‍ വിചാരണ നടപടികള്‍ തുടരണമെന്നും ഹൈക്കോടതി ആവശ്യപ്പെട്ടു. കേസ് അവസാനിപ്പിക്കാനാകില്ലെന്ന വിജിലന്‍സ് കോടതിയുടെ വിധി ഹൈക്കോടതി അംഗീകരിക്കുന്നതായും ഹൈക്കോടതി ചൂണ്ടിക്കാട്ടി.
കോടതി വിധിയോടെ പ്രതിപക്ഷം സടകുടഞ്ഞെഴുന്നേറ്റു. മുഖ്യമന്ത്രി ഉമ്മന്‍ചാണ്ടിയെ ദുര്‍ബലമാക്കാനുള്ള എല്ലാ സാധ്യതകളും ആരായുകയാണ് എല്‍ഡിഎഫ്. ഇതോടൊപ്പം പാമോലിന്‍ കേസില്‍ ആരോപണ വിധേയനായ ജിജി തോംസന്റെ ചീഫ് സെക്രട്ടറി സ്ഥാനവും അനിശ്ചിതത്വത്തിലാണ്. ജിജി തോംസണ്‍ വന്നാല്‍, പാമോലിനില്‍ ആരോപണ വിധേയരായ രണ്ടു പേര്‍ ഉന്നത സ്ഥാനത്തിരിക്കും. മുഖ്യ മന്ത്രിയും ചീഫ് സെക്രട്ടറിയും. പിന്നെയെന്ത് പാമോലിന്‍. 
ഇതിനെതിരെയാണ് വിഎസ് പ്രതികരിച്ചത്. അഴിമതി കേസിലെ പ്രതിയെ ഏറ്റവും ഉന്നതമായ പദവിയില്‍നിയമിക്കാനുള്ള നീക്കം സുപ്രീം കോടതി വിധിയോടുള്ള വെല്ലുവിളിയാണെന്നാണ് വി.എസ് പറയുന്നത്. പാമോലിന് കേസില്‍ കുറ്റവിചാരണ നേരിടുന്ന പി.ജെ തോമസിനെ ചീഫ് വിജിലന്‍സ് ഓഫീസറാക്കിയ തീരുമാനത്തിനെതിരായ കോടതി വിധി ആയുധമാക്കിയാണ് ജിജി തോംസണെ ചീഫ് സെക്രട്ടറിയാക്കുന്നതിനെതിരെ വി.എസ് രംഗത്ത് വന്നത്. അഴിമതിക്കേസിലെ പ്രതിയായ ഉദ്യോഗസ്ഥനെ സ്ഥാനക്കയറ്റത്തിനുപോലും പരിഗണിക്കാന്‍ പാടില്ലെന്ന് 2001ലെ സുപ്രീം കോടതി വിധി ചൂണ്ടിക്കാട്ടി വി.എസ് പറഞ്ഞു. സുപ്രീം കോടതിയുടെ ഈ വിധി ജിജി തോംസന്റെ കാര്യത്തിലും ബാധകമാണെന്നും വി.എസ് പറഞ്ഞു.
പാമോലിന്‍ അഴിമതി കേസിലെ പ്രധാനപ്രതിയാണ് മുഖ്യമന്ത്രി ഉമ്മന്‍ ചാണ്ടി. ഉമ്മന്‍ ചാണ്ടിയുടെ കീഴില്‍ സംസ്ഥാനത്തെ ഏറ്റവും ഉയര്‍ന്ന ഉദ്യോഗസ്ഥനായി അതേ അഴിമതി കേസില്‍ വിചാരണ നേരിടുന്ന ജിജി തോംസണ്‍ കൂടി എത്തുന്നതോടെ ഭരണ നേതൃത്വം അഴിമതിയുടെ കേളീരംഗമായി മാറുമെന്നും വി.എസ് പറഞ്ഞു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha