ബിവറേജസ് കോര്‍പറേഷന്‍, കണ്‍സ്യൂമര്‍ഫെഡ് എന്നിവക്ക് കീഴിലുള്ള മുഴുവന്‍ മദ്യവില്‍പനശാലകളും സി.സി.ടി.വി ക്യാമറ നിരീക്ഷണത്തിലേക്ക്
ബിവറേജസ് കോര്‍പറേഷന്‍, കണ്‍സ്യൂമര്‍ഫെഡ് എന്നിവക്ക് കീഴിലുള്ള മുഴുവന്‍ മദ്യവില്‍പനശാലകളും സി.സി.ടി.വി ക്യാമറ നിരീക്ഷണത്തിലേക്ക്. ഇതിനുള്ള നടപടികള്‍ ആരംഭിച്ചു. സംസ്ഥാനത്തെ ചില്ലറ മദ്യവില്‍പനശാലകളില്‍ വിജിലന്‍സ് നടത്തിയ മിന്നല്‍ പരിശോധനയില്‍ ജീവനക്കാരുടെ ഭാഗത്തുനിന്ന് ഗുരുതരമായ ക്രമക്കേടുകള്‍ കണ്ടെത്തിയ സാഹചര്യത്തിലാണ് നടപടി. ബിവറേജസ് കോര്‍പറേഷന്‍ ചെയര്‍മാന്‍ കൂടിയായ എക്‌സൈസ് കമീഷണര്‍ ഋഷിരാജ്‌സിങ്ങിന്റെ നിര്‍ദേശാനുസരണമാണ് കാര്യങ്ങള്‍ പുരോഗമിക്കുന്നത്.
ക്രമക്കേടുകള്‍ കണ്ടെത്താന്‍ എക്‌സൈസ് കമീഷണറുടെ നേരിട്ടുള്ള പരിശോധനയും ആരംഭിച്ചു. എക്‌സൈസ് ഇന്റലിജന്‍സ് വിഭാഗം മുമ്പ് നടത്തിയ പരിശോധനയിലും ക്രമക്കേടുകള്‍ കണ്ടെത്തിയിരുന്നു. വ്യക്തമായ തെളിവുകളില്ലാത്തതിനാല്‍ തുടര്‍നടപടികള്‍ കൈക്കൊള്ളാന്‍ സാധിച്ചിരുന്നില്ല.എന്നാല്‍, വിജിലന്‍സ് റിപ്പോര്‍ട്ടിന്റെ അടിസ്ഥാനത്തില്‍ കൂടുതല്‍ സംവിധാനങ്ങള്‍ ഏര്‍പ്പെടുത്താനാകുമെന്നാണ് എക്‌സൈസിന്റെ പ്രതീക്ഷ.
ഉപഭോക്താക്കളില്‍നിന്ന് യഥാര്‍ഥ വിലയെക്കാള്‍ അധിക തുക ഈടാക്കുക, കമീഷന്‍ കുറവ് ലഭിക്കുന്ന മദ്യങ്ങള്‍ സ്‌റ്റോക്കില്ലെന്ന് പറഞ്ഞ് ഉപഭോക്താക്കളെ തെറ്റിധരിപ്പിക്കുക, കമീഷന്‍ കൂടുതല്‍ ലഭിക്കുന്ന മദ്യങ്ങള്‍ മാത്രം വില്‍പന നടത്തുക, ന്യൂസ് പേപ്പറില്‍ മദ്യം പൊതിഞ്ഞ് നല്‍കാതെ ന്യൂസ് പേപ്പര്‍ വാങ്ങാനെന്ന പേരില്‍ തുകകള്‍ എഴുതിയെടുക്കുക തുടങ്ങിയ ക്രമക്കേടുകള്‍ വിജിലന്‍സ് പരിശോധനയില്‍ കണ്ടെത്തിയിരുന്നു.
https://www.facebook.com/Malayalivartha
