ആലത്തൂര്‍ ലോക്സഭാ മണ്ഡലത്തില്‍ കോണ്‍ഗ്രസ് സ്ഥാനാര്‍ത്ഥി രമ്യ ഹരിദാസ് വമ്പന്‍ ജയം നേടുമെന്ന് എക്സിറ്റ് പോള്‍ ഫലം. മാതൃഭൂമി ന്യൂസും ജിയോ വൈഡ് ഇന്ത്യയും ചേര്‍ന്ന് നടത്തിയ സര്‍വേ ഫലത്തിലാണ് പ്രവചനം. രമ്യ ഹരിദാസ് 48 ശതമാനം വോട്ട് നേടുമെന്നും ഇടതു സ്ഥാനാര്‍ത്ഥി പി കെ ബിജു 37 ശതമാനം വോട്ട് നേടുമെന്നും എന്‍ ഡി എ സ്ഥാനാര്‍ത്ഥി 13 ശതമാനം വോട്ട് നേടുമെന്നുമാണ് പ്രവചനം.

യുഡിഎഫിലെ രമ്യ ഹരിദാസിന്റെ സ്ഥാനാര്‍ഥിത്വം കൊണ്ടും എല്‍ഡിഎഫിലെ പി.കെ.ബിജു തുടര്‍ച്ചയായി മൂന്നാം തവണയും മല്‍സരിക്കാനെത്തുന്നു എന്നതുകൊണ്ടും ശ്രദ്ധിക്കപ്പെട്ട മണ്ഡലമാണ് ആലത്തൂര്‍. ഇവിടെ രമ്യ ഹരിദാസ് അട്ടിമറി വിജയം നേടുമെന്നാണു സര്‍വേ ഫലം.

സ്ഥാനാര്‍ത്ഥി രമ്യയുടെ പാട്ടും അതില്‍ സിപിഎം സോഷ്യല്‍ ചേരിയില്‍ നിന്നുണ്ടായ പ്രതികരണവും രമ്യയ്ക്ക് അനുകൂലമായി കാര്യങ്ങള്‍ എത്തിച്ചെന്ന് യുഡി​എഫ് കണക്ക് കൂട്ടുന്നു. എല്‍ഡിഎഫ് കണ്‍വീനറുടെ രമ്യയ്ക്കെതിരായ രമ്യയ്ക്ക് പരമാര്‍ശം സ്ത്രീകള്‍ക്കിടയില്‍ അവര്‍ക്ക് സ്വീകാര്യത നല്‍കിയെന്ന വിലയിരുത്തലും ഉണ്ട്.

രാഹുല്‍ തരംഗവും മണ്ഡലത്തിലെ ഉയര്‍ന്ന പോളിങ്ങ് ശതമാനവും പ്രതീക്ഷ ഉയര്‍ത്തുന്നുണ്ടെന്ന് രമ്യ ഹരിദാസ് തന്നെ സമ്മതിക്കുന്നു. ഇത്തവണ ആലത്തൂരില്‍ 80.32 ശതമാനമായിരുന്നു പോളിങ്ങ്. സിപിഎമ്മിന്‍റെ ശക്തികേന്ദ്രമായ മണ്ഡലത്തില്‍ ഇത്തവണ പോളിങ്ങ് ഉയര്‍ന്നതില്‍ എല്‍ഡിഎഫിനുള്ളില്‍ അങ്കലാപ്പുണ്ട്.