കാണിക്കയിടരുതെന്ന ശബരിമല കര്‍മ്മസമിതിയുടെ ആഹ്വാനം ഫലം കണ്ടതായി സൂചന. ശബരിമല പ്രതിഷേധം ആളിക്കത്തിച്ച് അതിലൂടെ കോണ്‍ഗ്രസിലെ ഹിന്ദു വോട്ട് ചോര്‍ത്താമെന്നാണ് സിപിഎം വിചാരിച്ചത്. എന്നാല്‍ കഥയാകെ മാറി. സിപിഎമ്മിലെ തന്നെ ഭക്തര്‍ ഇതേറ്റെടുക്കുകയും അവര്‍ സര്‍ക്കാരിനെതിരായി വോട്ട് ചെയ്യുകയും ചെയ്തു. ഇതിനിടെയാണ് കൂനില്‍മേല്‍ കുരു പോലെ കാണിക്കയും പോയത്. 

സാമ്പത്തിക പ്രതിസന്ധി രൂക്ഷമായതിനെ തുടര്‍ന്ന തിരുവിതാംകൂര്‍ ദേവസ്വം ബോര്‍ഡ് സംസ്ഥാന സര്‍ക്കാരിന്റെ സഹായം തേടാനൊരുങ്ങുകയാണ്. പണം ഇല്ലാത്തതിനെ തുടര്‍ന്നു ദൈനംദിന ചെലവുകള്‍ നിറവേറ്റുന്നതിനായി 20 വര്‍ഷമായി ബോര്‍ഡ് നടത്തി വന്ന ഹ്രസ്വകാല സ്ഥിര നിക്ഷേപങ്ങളും മുടങ്ങി.

മണ്ഡല മകര വിളക്കു വരുമാനത്തില്‍ നിന്നു 2018 ജനുവരിയില്‍ 20 കോടി രൂപയും ഫെബ്രുവരി മുതല്‍ ജൂലൈ വരെ മാസങ്ങളില്‍ 22 കോടിയും ഓഗസ്റ്റില്‍ 42 കോടി രൂപ ലഭിക്കുന്ന വിധം ഹ്രസ്വകാല സ്ഥിര നിക്ഷേപങ്ങളാണ് നടത്തിയത്. എന്നാല്‍ ഈ വര്‍ഷം 116 കോടി രൂപ ലഭിക്കുന്ന വിധത്തില്‍ നിക്ഷേപം നടത്തുന്നതിനു മാത്രമാണ് സാധിച്ചത്. വ്യത്യാസം 78 കോടി രൂപയാണ്. കാണിക്ക ബഹിഷ്‌ക്കരണ ആഹ്വാനത്തെ തുടര്‍ന്ന് നെയ്യാറ്റിന്‍കര മുതല്‍ ഹരിപ്പാടു വരെയുള്ള 20 ഗ്രൂപ്പുകളില്‍ മുന്‍ വര്‍ഷത്തെ അപേക്ഷിച്ച് 37.76 കോടി രൂപയുടെ കുറവുണ്ടായി.

ഇതിനു പുറമെ 2018 സെപ്റ്റംബര്‍ വരെയുള്ള മരാമത്തു ബില്ലുകള്‍ക്കു അനുമതി നല്‍കിയതു പ്രകാരം തിരുവനന്തപുരം മാവേലിക്കര കോട്ടയം പത്തനം തിട്ട, എസ്‌റ്റേറ്റ് ഡിവിഷനുകള്‍ക്കായി 67.28 കോടി രൂപ നല്‍കാനുമുണ്ട് സര്‍ക്കാര്‍ കനിഞ്ഞില്ലെങ്കില്‍ അടുത്ത ശബരിമല സീസണ്‍ വരെയെങ്കിലും ദേവസ്വം ബോര്‍ഡിനു പിടിച്ചു നില്‍ക്കല്‍ ബുദ്ധിമുട്ടായേക്കും.

അതേ സമയം സിപിഎമ്മിനെ വലയ്ക്കുന്ന എക്‌സിറ്റ് പോള്‍ ഫലമാണ് വന്നിരിക്കുന്നത്. ശബരിമല വിഷയം തെരഞ്ഞെടുപ്പില്‍ പ്രതിഫലിപ്പിക്കുമെന്നാണ് എക്‌സിറ്റ് പോള്‍ ഫലങ്ങള്‍ പറയുന്നത്. 

ശബരിമല വിഷയം തിരഞ്ഞെടുപ്പില്‍ പ്രതിഫലിച്ചിട്ടുണ്ടെന്നാണ് മന്ത്രി കടകംപള്ളി സുരേന്ദ്രനും വ്യക്തമാക്കിയത്. ശബരിമല വിഷയം സര്‍ക്കാരിനെതിരെ ഉപയോഗിക്കുന്നതില്‍ വര്‍ഗീയ പാര്‍ട്ടികള്‍ ഒരളവ് വരെ വിജയിച്ചെന്നും ഇത് ചിലരെയെല്ലാം സ്വാധീനിച്ചിട്ടുണ്ടെന്നും കടകംപള്ളി സുരേന്ദ്രന്‍ പറഞ്ഞു. കൊച്ചിയില്‍ മാധ്യമപ്രവര്‍ത്തകരോട് പ്രതികരിക്കുകയായിരുന്നു അദ്ദേഹം. 

ചെയ്യാത്ത കുറ്റം സര്‍ക്കാരിനുമേല്‍ ചാര്‍ത്തി സര്‍ക്കാരിനെ പ്രതിക്കൂട്ടിലാക്കാന്‍ വര്‍ഗീയ കോമരങ്ങള്‍ക്ക് സാധിച്ചു. അതില്‍ ഒരളവ് വരെ അവര്‍ വിജയിച്ചെന്നത് വാസ്തവമാണ്. അതേസമയം, ചിന്താശേഷിയുള്ള ജനങ്ങള്‍ സംസ്ഥാന സര്‍ക്കാരിന്റെ കഴിഞ്ഞകാലത്തെ പ്രവര്‍ത്തനം വിലയിരുത്തിയിട്ടുണ്ടെന്നും അങ്ങനെയാണെങ്കില്‍ ഈ സര്‍ക്കാരിനെതിരെ വോട്ട് ചെയ്തിട്ടുണ്ടാകില്ലെന്നും കടകംപള്ളി വിശദീകരിച്ചു. 

കഴിഞ്ഞദിവസം പുറത്തുവന്ന എക്‌സിറ്റ് പോള്‍ ഫലങ്ങളെയും മന്ത്രി തള്ളിപ്പറഞ്ഞു. എക്‌സിറ്റ് പോള്‍ ഫലങ്ങള്‍ പോലെയാകില്ല യഥാര്‍ഥ ഫലമെന്നായിരുന്നു അദ്ദേഹത്തിന്റെ പ്രതികരണം.

അതേസമയം പല എക്‌സിറ്റ്‌പോള്‍ പ്രവചനങ്ങളും പാളിപ്പോയിട്ടുണ്ടെന്നാണ് മുഖ്യമന്ത്രി പിണറായി വിജയന്‍ പറയുന്നത്. കേരളത്തില്‍ ഇടതുമുന്നണിക്ക് മികച്ച വിജയമുണ്ടാകുമെന്നും അദ്ദേഹം പറഞ്ഞു. ഒരു ഊഹത്തെ വേറെ ഊഹങ്ങള്‍വെച്ച് ചര്‍ച്ച ചെയ്യേണ്ടെന്നും എക്‌സിറ്റ് പോള്‍ ഫലങ്ങളെക്കുറിച്ച് മുഖ്യമന്ത്രി പ്രതികരിച്ചു. 'ഏതായാലും 23 വരട്ടെ. 2004ല്‍ എന്‍.ഡി.എ. വരുമെന്ന് മിക്ക എക്‌സിറ്റ് പോളുകളും പ്രവചിച്ചു. യു.പി.എ. ആണ് അധികാരത്തില്‍ വന്നത്. അങ്ങനെ പലഘട്ടങ്ങളിലും സംഭവിച്ചിട്ടുണ്ടെന്നും അദ്ദേഹം പറഞ്ഞു.