അദാനി നല്കിയ കമ്മീഷന് ഉപയോഗിച്ചാണോ മുഖ്യമന്ത്രി പിണറായി വിജയന് ലണ്ടനില് പോയതെന്ന് വ്യക്തമാക്കണമെന്ന് കെ.മുരളീധരന് എം.എല്.എ
പ്രമുഖ വ്യവസായിയും പ്രധാനമന്ത്രി നരേന്ദ്രമോദിയുടെ അടുത്ത സുഹൃത്തുമായ അദാനി നല്കിയ കമ്മീഷന് ഉപയോഗിച്ചാണോ മുഖ്യമന്ത്രി പിണറായി വിജയന് ലണ്ടനില് പോയതെന്ന് വ്യക്തമാക്കണമെന്ന് കെ.മുരളീധരന് എം.എല്.എ ആവശ്യപ്പെട്ടു. ഖജനാവിലെ പണം കൊണ്ടാണ് ലണ്ടനില് പോയതെങ്കില് തെറ്റില്ല. എന്നാല് ഭാര്യയേയും മകളേയും കൊച്ചുമക്കളേയും കൂടെ കൂട്ടിയത് ശരിയായില്ലെന്നും മുരളീധരന് ചൂണ്ടിക്കാട്ടി. തെരഞ്ഞെടുപ്പ് പെരുമാറ്റച്ചട്ടം നിലനിന്നപ്പോള് മുഖ്യമന്ത്രി വിദേശയാത്ര നടത്തിയത് പരിശോധിക്കണമെന്നും അദ്ദേഹം കോഴിക്കോട് ആവശ്യപ്പെട്ടു. സാധാരണ മുഖ്യമന്ത്രി വിദേശയാത്ര നടത്തുമ്പോള് ഭാര്യയെ മാത്രമേ കൂടെ കൂട്ടാറുള്ളൂ. ഇത്തവണ കൊച്ചുമകനെ ഉള്പ്പെടെ കൊണ്ടുപോയതിനെതിരെയാണ് ആക്ഷേപം ഉയര്ന്നിരിക്കുന്നത്.
പ്രധാനമന്ത്രി നരേന്ദ്ര മോദിയും മുഖ്യമന്ത്രി പിണറായി വിജയനും ഒരേ സ്വഭാവക്കാരാണ്. അതുകൊണ്ട് കേരളത്തില് മോദിക്ക് ഏറ്റവും ഇഷ്ടമുള്ള വ്യക്തി പിണറായിയാണ്. പ്രതിപക്ഷ നേതാവ് രമേശ് ചെന്നിത്തലയോട് മാന്യമായി ചര്ച്ച നടത്താന് പിണറായിക്കാകുന്നില്ല. ഏറ്റവും മോശം കാര്യങ്ങള്ക്ക് അവാര്ഡ് ഉണ്ടെങ്കില് പിണറായിക്കാണോ മോദിക്കാണോ കൊടുക്കേണ്ടതെന്ന കാര്യത്തില് ജഡ്ജിംഗ് കമ്മിറ്റിക്ക് ആശയക്കുഴപ്പമുണ്ടാകുമെന്നും മുരളീധരന് പരിഹസിച്ചു. ലാവ്ലിന് കമ്പനിയുമായി ബന്ധമുള്ള മറ്റൊരു കമ്പനി മസാല ബോണ്ട് വാങ്ങിയതില് ദുരൂഹതയുണ്ടെന്നും അതേക്കുറിച്ച് അന്വേഷണം നടത്തണമെന്നും പ്രതിപക്ഷ നേതാവ് രമേശ് ചെന്നിത്തല ആവശ്യപ്പെട്ടതിന് പിന്നാലെയാണ് കെ.മുരളീധരന് ലണ്ടണന് യാത്രാവിവാദം ആളിക്കത്തിക്കാന് ശ്രമിക്കുന്നത്.
ബോണ്ടുകള് കുറഞ്ഞ പലിശക്കാണ് വിറ്റതെന്ന മുഖ്യമന്ത്രിയുടെ വാദം തെറ്റാണെന്നാണ് പ്രതിപക്ഷത്തിന്റെ പ്രധാന ആരോപണം. എട്ട് ശതമാനത്തില് താഴെ പലിശ നിരക്കിലാണ് കേന്ദ്ര സര്ക്കാരും വിവിധ ഏജന്സികളും മസാല ബോണ്ടുകള് പുറത്തിറക്കിയിട്ടുള്ളതെന്ന് ചെന്നിത്തല ചൂണ്ടിക്കാട്ടുന്നു. 1.3 ശതമാനം പലിശയ്ക്കാണ് കൊച്ചി മെട്രോക്ക് യു.ഡി.എഫ് സര്ക്കാര് വായ്പ എടുത്തത്്. അതിനാല് ഉയര്ന്ന പലിശക്ക് മസാല ബോണ്ട് ഇറക്കി ഭാരം ഭാവി തലമുറയുടെ ചുമലില് വെച്ചുകെട്ടിയെന്നും രമേശ് ചെന്നിത്തല കുറ്റപ്പെടുത്തി. ലാവ്ലിന് ഉദ്യോഗസ്ഥര് മാര്ച്ച് 23 മുതല് 27 വരെ തിരുവനന്തപുരത്തുണ്ടായിരുന്നു. ആരൊക്കെയാണ് അവരുമായി ചര്ച്ച നടത്തിയെന്ന് സര്ക്കാര് വ്യക്തമാക്കണമെന്നും പ്രതിപക്ഷം ആവശ്യപ്പെട്ടിരുന്നു. അതിനൊന്നും മറുപടി നല്കാന് സര്ക്കാരോ, മുഖ്യമന്ത്രിയോ തയ്യാറായില്ല.
ലണ്ടന് എക്സചേഞ്ച് വഴി ബോണ്ട് വില്പന നടത്തുന്നതിന് റിസര്വ് ബാങ്കിന്റെ അനുമതിയുണ്ട്, അത് പ്രതിപക്ഷം വിവാദമാക്കുന്നത് വികസനം തടയാനെന്നാണ് മുഖ്യമന്ത്രി പിണറായി വിജയന് പ്രതികരിച്ചത്. ലാവ്ലിന് കമ്പനിയെ ഇതുമായി ബന്ധപ്പെടുത്തുന്നത് പ്രത്യേക മാനസികാവസ്ഥ ഉള്ളവരാണെന്നും മുഖ്യമന്ത്രി ഇന്നലെ ആരോപിച്ചിരുന്നു. അല്ലാതെ പ്രതിപക്ഷത്തിന്റെ ചോദ്യങ്ങള്ക്ക് മറുപടി നല്കാന് തയ്യാറായില്ല. 12 ദിവസത്തെ വിദേശയാത്രയില് മുഖ്യമന്ത്രിക്കൊപ്പം ധനമന്ത്രി തോമസ് ഐസക്, ചീഫ് സെക്രട്ടറി ടോംജോസ്. കിഫ്ബി മുതിര്ന്ന ഉദ്യോഗസ്ഥന് കെ.എം എബ്രഹാം എന്നിവരും ഉണ്ടായിരുന്നു.
https://www.facebook.com/Malayalivartha