മണര്കാട് പൊലീസ് സ്റ്റേഷനിലെ ശുചിമുറിയില് യുവാവ് ആത്മഹത്യ ചെയ്ത സംഭവത്തില് രണ്ട് പൊലീസ് ഉദ്യോഗസ്ഥര്ക്ക് സസ്പെന്ഷന്
മണര്കാട് പൊലീസ് സ്റ്റേഷനിലെ ശുചിമുറിയില് യുവാവ് ആത്മഹത്യ ചെയ്ത സംഭവത്തില് രണ്ട് പൊലീസ് ഉദ്യോഗസ്ഥര്ക്ക് സസ്പെന്ഷന്. സി.പി.ഒ സെബാസ്റ്റ്യന് വര്ഗീസ്, എ.എസ്.ഐ പ്രസാദ് എന്നിവരെയാണ് അന്വേഷണവിധേയമായി സസ്പെന്ഡ് ചെയ്തത്. കസ്റ്റഡിയിലുള്ള ആളെ സംരക്ഷിക്കുന്നതില് വീഴ്ച വരുത്തിയെന്ന സ്പെഷ്യല് ബ്രാഞ്ച് ഡി.വൈ.എസ്.പിയുടെ അന്വേഷണ റിപ്പോര്ട്ടിന്റെ അടിസ്ഥാനത്തിലാണ് ഈ അച്ചടക്ക നടപടി.
വീഴ്ചവരുത്തിയ പൊലീസുകാര്ക്കെതിരെ നടപടിക്ക് പൊലീസ് മേധാവി ലോക്നാഥ് ബെഹ്റ എറണാകുളം റേഞ്ച് ഐ.ജി വിജയ് സാഖറെക്കും കോട്ടയം ജില്ല പൊലീസ് മേധാവി ഹരിശങ്കറിനും കഴിഞ്ഞ ദിവസം നിര്ദേശം നല്കിയിരുന്നു. ഇതിന്റെ അടിസ്ഥാനത്തിലാണ് രണ്ടു പേരെ സസ്പെന്ഡ് ചെയ്തത്.
കൂടാതെ സംഭവത്തില് മജിസ്ട്രേറ്റുതല അന്വേഷണവും പ്രഖ്യാപിച്ചിട്ടുണ്ട്. വീട്ടില് മദ്യപിച്ച് ബഹളമുണ്ടാക്കിയതിന് പൊലീസ് കസ്റ്റഡിയിലെടുത്ത അരീപ്പറമ്പില് പറപ്പള്ളിക്കുന്ന് രാജീവ്ഗാന്ധി കോളനി എടത്തറ പരേതനായ ശശിയുടെ മകന് യു. നവാസാണ് മണര്കാട് സ്റ്റേഷനില് തൂങ്ങി മരിച്ചത്.
ഇന്നലെ രാവിലെ 9.15നാണ് സ്റ്റേഷനിലെ സന്ദര്ശകര്ക്കുള്ള ശുചിമുറിയിലെ ജനലില് ഉടുമുണ്ട് ഉപയോഗിച്ച് തൂങ്ങിയ നിലയില് നവാസിനെ കണ്ടെത്തിയത്. പൊലീസുകാര് കോട്ടയം മെഡിക്കല് കോളജ് ആശുപത്രിയില് എത്തിച്ചെങ്കിലും മരിച്ചു. തിങ്കളാഴ്ച രാത്രി മദ്യപിച്ച് ബഹളമുണ്ടാക്കിയ നവാസ് ഭാര്യയെയും മകളെയും ട്രാന്സ്ജെന്ഡറായ സഹോദരന് നൗഷാദിനെയും (മാളവിക) മര്ദിക്കുകയായിരുന്നു.
പൊലീസില് അറിയിച്ചതിനെ തുടര്ന്ന് മണര്കാട് എസ്.ഐയുടെ നേതൃത്വത്തിലുള്ള സംഘം എത്തിയെങ്കിലും നവാസ് രക്ഷപ്പെട്ടു. വീണ്ടുമെത്തി പരാക്രമം കാട്ടിയതോടെ പൊലീസ് കസ്റ്റഡിയിലെടുത്ത് രാത്രി 10.30ന് സ്റ്റേഷനില് കൊണ്ടുവന്നു. ഇന്നലെ രാവിലെ ജാമ്യത്തില് വിടാന് തീരുമാനിച്ചിരുന്നു. ആത്മഹത്യ വിവരം പുറത്തുവന്നതിന് പിന്നാലെ മരണത്തില് ദുരൂഹതയുണ്ടെന്ന് ആരോപിച്ച് ബന്ധുക്കള് രംഗത്തെത്തി.
https://www.facebook.com/Malayalivartha
